Tənzilə Rüstəmxanlı ilə Vəfa Nağının arasında nə baş verir?..
![Image](/uploads/posts/2024-08/vefa-tenzile.webp)
Sentyabrın 1-də keçiriləcək növbədənkənar parlament seçkilərinin namizədlərindən olan ictimai fəal Vəfa Nağıyeva (Nağı) rəqibi, Vətəndaş Həmrəyliyi Partiyası sədrinin müşaviri Tənzilə Rüstəmxanlını üçüncü dəfə DSK-ya şikayət edib.
Təşviqat kampaniyası başladığı müddətdən 70 saylı Neftçala seçki dairəsindən qeydə alınan Vəfa Nağı dəfələrlə Tənzilə Rüstəmxanlının posterlərini sökdürüb.
O, rəqibinin posterini bu dəfə də Neftçalanın Mikayıllı kəndindəki “Azərsu”ya tabe olan müəssisədən sökdürərək vəziyyəti belə şərh edib: “Mikayıllı kəndində “Azərsu”nun idarəçiliyində olan dövlət müəssisənə Tənzilə Rüstəmxanlının plakatları yapışdırılıb. Oradakı şəxs deyir ki, seçki ilə bağlı posterləri yapışdıran adam Tənzilə Rüstəmxanlının posterini də yapışdırıb. Bildiyim qədəri ilə, əhalini seçkidən xəbərdar etmək üçün posterləri kəndlərdə ya bələdiyyə işçiləri, ya da ica nümayəndəsi yapışdırır. Eyni məsələ ilə bağlı DSK-a bu gün üçüncü dəfə şikayət etdim”.
İki xanım namizəd arasında nəyin baş verdiyini daha dərindən aydınlaşdırmaq üçün onların hər biri ilə əlaqə saxlamaq qərarına gəldik.
Vəfa Nağı: “Bu məsələdə dövlət qurumları açıq tərəf nümayiş etdirir”
Deputatlığa namizəd Vəfa Nağı “Bakı-Xəbər”ə açıqlamasında bildirdi ki, baş verən bütün pozuntular haqda məlumatları ümumiləşdirib video şəklində öz sosial şəbəkə hesabında paylaşıb: “Dairə Seçki Komissiyasına 4-cü şikayətimi etdim. Onlar dövlət resurslarından öz təbliğatlarında istifadə edirlər. Məsələn, öz təbliğat plakatlarını dövlət qurumlarının binalarına yapışdırırlar. Mənim şəkillərim isə cırılır. Bunu edənlərin kimliyi bizə dəqiq məlum deyil, ancaq tapşırılmasa bunu kimsə etməz. Bu məsələdə dövlət qurumları açıq tərəf nümayiş etdirir. Mənim Neftçalada yaşadığım yerə çox yaxın olan parkda elanlar yapışdırıblar. Seçiciləri köhnə park ərazisinə görüşə dəvət edirdilər. Hansı ki, belə bir yerdə görüşün keçirilməsi qanunla qadağandır. Çünki bunun üçün İcra Hakimiyyəti siyahı müəyyən edib ki, görüşlər harada keçirilə bilər. Dünən artıq 4-cü şikayətimi də etdim. Onlardan 3-ü eyni motivlidir, dövlət qurumlarına aid binalara posterlərin yapışdırılması ilə bağlıdır. Biri isə qanunla nəzərdə tutulmayan yerdə görüş təşkili ilə bağlıdı”.
Səlahiyyətli nümayəndə Fərman Hüseynov: “Bu xanımın məqsədi son dərəcə şəffaf apardığımız seçki prosesinə qara yaxmaqdır”
70 saylı Neftçala Seçki Dairəsindən deputatlığa namizəd Rüstəmxanlı Tənzilə Yolçu qızının səlahiyyətli nümayəndəsi
Fərman Hüseynov isə “Bakı-Xəbər”ə açıqlamasında bildirdi ki, onların təşviqat materialları seçki qərargahının üzvləri tərəfindən yalnız qanunla müəyyən edilmiş müvafiq yerlərə (seçki məntəqələrinin qarşısında yer alan təbliğat-təşviqat lövhələrində) və sahibkarlardan icazə alınmaq şərti ilə müvafiq özəl obyektlərə yapışdırılır: “Son günlərdə sosial media və bəzi mətbuat orqanlarda eyni dairədən namizəd olan Nağıyeva Vəfa Cəmaləddin qızı tərəfindən paylaşılan görüntülər bizə deməyə əsas verir ki, bu şəxs bizim özəl obyektlərdə olan təbliğat-təşviqat materiallarımızı qopartdıraraq qanunla qadağan edilmiş yerlərə yapışdırdıqdan sonr oradan görüntülər paylaşır və seçki kampaniyamıza qarşı qaralama kampaniyası aparır. Nəzərinizə çatdırırıq ki, təbliğat-təşviqat kampaniyamız Azərbaycan Respublikası Seçki Məcəlləsinin 13-cü fəslində qeyd edilmiş maddələrə uyğun olaraq davam edir. Biz bu barədə DSK-ya da müraciət edərək bildirmişik ki, öz təbliğatını aparmaq əvəzinə bizim əleyhimizə fəaliyyət göstərən, deputatlığa namizədimizə qarşı qaralama kampaniyası aparan Nağıyeva Vəfa Cəmaləddin qızı barəsində ölçü götürülsün. Çünki bu xanımın məqsədi son dərəcə şəffaf apardığımız seçki prosesinə qara yaxmaq, seçki sonrası ölkəmizi qaralamaq üçün Qərbin müəyyən dairələri üçün “material istehsal etmək”dir. Bu “novarçı” xanım 44 günlük Vətən savaşı zamanı Azərbaycanın müzəffər ordusuna qarşı apardığı PR kampaniyasını hazırda Tənzilə Rüstəmxanlıya qarşı aparır”.
Məhəmmədəli QƏRİBLİ