“Teleqram” “Votsap”ın rəqibi ola bildimi?..
Azər Həsrət: “Ümumi auditoriyaya yönəlik xəbər paylaşımında Teleqram daha öndədir, Votsap isə bir qədər geri qalır”
Teleqramın yaradıcısı Pavel Durov Bakıya gəlib. Azərbaycan mediasının məlumatına görə, bu barədə Teleqram kanallarında məlumat yayılıb.
Məlumata görə, Durov Bakıda bir sıra yerləri gəzib. Onun yüksək vəzifəli şəxslərlə görüşü nəzərdə tutulub.
Məlum olduğu kimi, “Teleqram” sosial şəbəkə platforması Rusiyanındır, bu, təxminən Votsap-a alternativ olaraq yaradılan sosial şəbəkədir. Ümumiyyətlə, Teleqram Votsapı nə dərəcədə əvəz edə bilir? Onunla rəqabət apara bilirmi? Votsap çoxdan yaranıb, bu platforma bizə Qərbdən gəlib. Teleqramı isə Rusiya yaradıb. Teleqramın Votsapdan hansısa üstünlükləri varmı? Votsapı üstələyirmi?
“Teleqramın bir üstünlüyü də var ki…”
Media mütəxəssisi Azər Həsrət “Bakı-Xəbər”ə “Əlbəttə ki, Teleqram artıq dünyada özünün əlaqələrini, mövqelərini çox ciddi şəkildə möhkəmləndirib. Azərbaycana gəlincə, ölkəmizdə də Teleqramdan fəal şəkildə, özü də gen-bol istifadə edilir. Hansı məqamlarda Teleqram Votsapı üstələyir və hansında Votsap öndədir? Şəxsi müşahidələrimə görə, Votsap daha çox birbaşa əlaqələr, şəxsi ünsiyyət üçün hələ də üstünlüyünü qoruyur. Söhbət yəni zəngləşmələrdən, görüntülü danışmalardan, şəxsi yazışmalardan, paylaşımlardan və sairdən gedir. Amma Telqaram ümumi xəbər yayımında Votsapdan daha önə keçib. Hər halda bu, mənim şəxsi müşahidələrimdir. Özüm hər ikisindən istifadə edirəm. Bilirsiz ki, bir müddət əvvəl Votsap da xəbər kanalları yaratmaq imkanı təqdim etdi, hətta Azərbaycanda da o kanallardan istifadə etmək üçün bəzi cəhdlər oldu, lakin uğurlu olduğunu deyə bilmərik. Mənim özüm də votsapda bir kanal qurmuşdum və hiss etdim ki, o kanalı irəlilətmək o qədər də asan deyil. Teleqramda isə xəbər kanalları, paylaşım kanalları qurmaq olduqca sadədir, rahatdır və əlbəttə ki, bu platformadan istifadə daha çoxdur. O baxımdan, Teleqram öndədir. Ümumi auditoriyaya yönəlik paylaşımlar baxımından Teleqram öndə görünür, amma şəxsi istifadə, birbaşa zənglər, görüntülü danışıqlar, birbaşa paylaşımlar üçün isə Votsap daha öndədir, daha əlverişli hesab edilir”-deyə bildirdi.
A.Həsrətin fikrincə, bu baxımından, onların ikisi də paralel şəkildə bizim cəmiyyətimizdə istifadə edilir, bu nə vaxta qədər davam edəcək, bunu proqnozlaşdırmaq çətindir. “Ona görə ki, daha başqa bir platforma icad edilə və onların hər ikisi keçmişdə qala bilər. Yəni bilirsiz ki, zamanla daha yeni texnologiyalar, üsullar icad olunur və köhnələr yavaş-yavaş arxivə göndərilir. O baxımdan, proqnoz verməyə çətinlik çəkirəm. Amma dediyim kimi, ümumi auditoriyaya yönəlik xəbər paylaşımında Teleqram daha öndədir, Votsap isə bir qədər geri qalır. Teleqramın həm də bir üstünlüyü də var ki, video və foto paylaşımı zamanı, Votsapdan fərqli olaraq, o həmin görüntüləri sıxıb keyfiyyətsiz bir şəkildə göndərməyə cəhd etmir. Yəni olduğu kimi göndərir. Düzdür, Votsap da bir neçə ay əvvəl keyfiyyətli göndərmələr üçün o imkanı tətbiq etməyə başladı, amma bu şəkillərdə özünü doğrultsa da, video məsələsində yenə də Votsap məhdudiyyət tətbiq edir. Yəni bizim əlimizdə olan 15-20 dəqiqəlik videoları olduğu kimi göndərə bilmirik. Vatsap onu kəsir, yarısını göndərir, yarısını göndərmir. Amma Teleqram belə etmir. Gördüyünüz kimi, hər ikisinin üstünlükləri də, çatımazlıqları da var. Ümumi götürdükdə, xəbər paylaşımlarında Teleqram daha əlverişli, daha praktik, daha əlçatan, daha uyğundur”-deyə A.Həsrət bildirdi.
İradə SARIYEVA
