Bakıda mənzil sahibləri qazanmağın yeni yolunu tapıblar - qeydiyyata düşmək neçəyədir...
Şəmsəddin Əliyev: “Bu, tanımadıqları insanları öz evlərinə daimi qeydiyyata salan şəxslərin özləri üçün də böyük təhlükə yaradır”
Bakıda bəzən elə halla rastlaşırsan ki, təəccüblənməyə bilmirsən. Paytaxtda mövcud olan “ev bazarlarında” qəribə təkliflərə, eləcə də sosial şəbəkələrdə diqqətçəkən elanlara rast gəlinir. Bunlardan biri də paytaxtda mənzillərə daimi qeydiyyata düşmək məsələsi ilə bağlıdır.
Sosial şəbəkələrdə yayılan məlumatlardan, elanlardan məlum olur ki, son zamanlar Bakıda başqasının evinə pulla daimi qeydiyyata düşənlərin sayı artır. Dediyimiz kimi, bu barədə küçələrdə, sosial şəbəkələrdə elanlar yazılır, “ev bazarında” təkliflər irəli sürülür.
Maraqlıdır ki, paytaxtın bir çox küçələrində divarlarda, eləcə də sosial şəbəkələrdə daimi qeydiyyata düşməklə bağlı elanlara və qeydiyyata meyl edən insanlara rast gəlinir.
Bəzi ev sahibləri 300, 500, 1000, bəzən daha artıq pulun qarşılığında tanımadıqları adamları öz evlərinə qeydiyyata salırlar. Yeri gəlmişkən, belə elanlara avtobus dayanacaqlarında da rast gəlmək olur.
Məsələn, sosial şəbəkələrdə yayılan elanlardan birtinə diqqət yetirək, ev sahibi müəyyən məbləğ qarşılığında tanımadığı şəxsləri mənzilinə qeydiyyata almağı təklif edir. Həmin şəxs "ev köhnədir. İçində itlər yaşayır. Orada donuz da saxlayıram. 300 manat qarşılığında sizi bu evə qeydiyyata sala bilərəm"-yazıb. Onun bu fikirlərinə Facebook-da rast gəldik.
Tanımadığı insanları öz evinə pul qarşılığında daimi qeydiyyata salan vətəndaşları nə gözləyir? Bunun təhlükəsi varmı? Pul alıb qeydiyyata salırlar, kim təminat verir ki, sabah o adamlar mənzil sahibinə problem yaratmayacaq?
Ekspertlər bildirir ki, belələri həddən artıq çoxdur. Bu o adamlar olur ki, nə vaxtsa ev alıb və ehtiyac olmadığı üşün içində yaşamır və bu mənzildən pul qazanmaq üçün pul müqabilində insanları ora qeydiyyata salırlar. Ekspertlərin verdiyi məlumata görə, hətta Sovet dövründə rayondan gələnlərin Bakıya qeydiyyata düşməsinin problem olduğu vaxtlarda burada müəyyən adamlar pul müqabilində bu işlə məşğul olub.
“Ucuz qazanc yolu bildikləri bu məsələ onları təhlükəyə ata bilər”
Hüquqşünas Şəmsəddin Əliyev “Bakı-Xəbər”ə bildirdi ki, bu olduqca təhlükəli haldır. Ş.Əliyev hesab edir ki, Sovet dövründə pasport rejimi ilə həyata keçirilən təxirəsalınmaz tədbirlərə bir də qayıtmaq lazımdır. “Əslində Bakı şəhəri ölkənin paytaxtı kimi üfürülmüş şara bənzəyir. Bakıya daha çox miqrant axını var, şəhər meqapolisə çevrilib, bu gözləniləndir. Amma pasport rejiminin qaydalarına əməl olunmaması kifayət qədər həm ictimai təhlükəsizliyə, həm ictimai münasibətlərə yönəlmiş qəsdlərin çoxalması baxımından bir məsələdir, həm də gələcəkdə mənzil sahibləri üçün problem yaradacaq bir haldır. Deyək ki, keçmiş zamanlarda regionlarda yaşayan şəxslərin Bakı qeydiyyatına alınması məsələsində qohumluq münasibətləri tələb olunurdu. Normadan artıq qeydiyyata alınma halları cəmiyyət, ictimaiyyət üçün kifayət qədər problemlər yaradırdı. Ona görə də müəyyən limitlər vardı. Bakıda yaşayanların qohumlarının yalnız mənzilə qeydiyyat və orada yaşamaq hüquqları vardı, mənzilə hər hansı bir pay hüququ tanınmırdı. Amma indi bəli, bu şəkildə elanların peyda olması gələcəkdə mənzil sahibləri üçün problemlər yarada bilər. Digər tərəfdən, bunların bu şəkildə qeydiyyata düşməsi törədilən cinayətlərə görə subyektlərin müəyyən edilməsi baxımından daxili işlər orqanları üçün problem yaradır. Bundan əvvəl polis bölmələrində vətəndaşlar müəyyən limitlə qeydiyyata alınırdı. Bu da sonralar hədsiz dərəcədə çoxaldığından artıq bu da yoxdur. Deyək ki, 10 nəfər yerinə 100 nəfər qeydiyyata alınırdı. Bu da bir problem yaradırdı. Düşünürəm ki, belə halların qarşısı alınmalıdır, pasport rejiminə ciddi əməl edilməlidir. Bakıda vətəndaşların bu şəkildə, pərakəndə, yaxud başqa cür qeydiyyatı ictimai təhlükəsizlik baxımından subyektlərin axtarılması, onların şəxsiyyəti ilə bağlı müəyyən tədbirlərin həyata keçirilməsi üçün problem yaratdığından, bu, cəmiyyət üçün arzuolunan deyil”-deyə Ş.Əliyev bildirdi.
Ş.Əliyev qeyd etdi ki, bu gün Bakıda böyük tikintilər həyata keçirilir, kimin imkanı varsa, burada ev almaq hüququna malikdir, evi alırlar, amma içində yaşamırlar, bunun özü də regionlardan insanların paytaxta axınını gücləndirir. “Bunun özü də ictimai təhlükəsizliyin təmin olunması, ictimai təhlükəsizlik baxımından kifayət qədər ziyanlı məsələdir. Ona görə də, arzuedilən odur ki, bu məsələdə limitlər qoyulsun. Yəni kimlər Bakıda ev ala, kimlər Bakıda qeydiyyata alına bilər, kimlər qeydiyyata alına bilməz. Bu gün Bakının tikinti meydanında nə qədər qeydiyyatı olmayan insanlar “işlə təmin olunub”. Elə hallar var ki, turist axınının güclü olduğu Bakıda arzuolunan məsələ deyil. Bu kimi halların qarşısı alınmalıdır”.
Ş.Əliyev hesab edir ki, bütün hallarda vətəndaşlar ayıq olmalıdır və hər kəsi evinə qeydiyyata salmamalıdır. Hüquqşünasın sözlərinə görə, elə insanlar ola bilər ki, cinayət törədib, yaxud cinayətkardır, bu insanların sabah ev yiyəsinin başına hansı oyunlar açmayacağı nə məlum? “Bu, tanımadıqları insanları öz evlərinə daimi qeydiyyata salan şəxslərin özləri üçün də böyük təhlükə yaradır. Təəssüflər olsun ki, bəzi vətəndaşlar bu ciddi məsələyə diqqət yetirmirlər. Onların hansı məbləğ müqabilində evlərə daimi qeydiyyata salındığını bilmirəm, bu haqda məlumatım yoxdur. Vətəndaşlara tövsiyəm odur ki, ayıq-sayıq olsunlar, bu təhlükəli işdən çəkinsinlər. Ucuz qazanc yolu bildikləri bu məsələ onları təhlükəyə ata bilər”-deyə Ş.Əliyev qeyd etdi.
İradə SARIYEVA
