Qərbdən sursat gəlir, MQ buraxılmır, Ordubadın Gənzəsi atəşə tutulur - İrəvan nəyin dalınca qaçır?..
Əli Mustafa: “Son vaxtlar ard-arda baş verənləri əsla təsadüf hesab etmək olmaz”
Azərbaycanla Ermənistan arasında aparılan sülh danışıqlarının hələ də nəticəsiz qalması bölgədə təhlükəsizliyin təminatını sual altında qoyur. Maraqlıdır ki, 4 ildir tərəflər arasında sülh müqaviləsinin bağlanmasını sözdə ən prioritet məsələ hesab edən beynəlxalq qurumlar, böyük dövlətlər yenə də ikili oyun oynayırlar.
Bir tərəfdən müqavilənin bağlanması üçün vasitəçilik etməyə təşəbbüs göstərirlər, digər tərəfdən isə Ermənistana hərbi yardımlar göstərirlər. Açıq-aydın görünür ki, İkinci Qarabağ müharibəsindən öncə həyata keçirilən ssenarilər bu gün başqa formatda davam etdirilir. Sözdə sülh istəyənlər, əslində, bu regionun müharibə ocağı kimi qalmasında maraqlıdırlar.
Son vavtlar Ermənistanda gedən proseslərin bir sıra məqamları və bunların arasında olan müəyyən əlaqələr diqqəti cəlb edir. Məsələ ondadır ki, Qərbdın Ermənistana hərbi texnika gətirilir, müxtəlif silah yardımları davam edir. Ardınca Ermənistan bəyan edir ki, ATƏT-in Minsk qrupunun buraxılmasına razılıq verməyəcək. Daha sonra Naxçıvanda Ordubad rayonunun Gənzə kəndi atəşə tutulur.
Maraqlıdır, bütün bu baş verənlər təsadüfdürmü?
“İndiki mürəkkəb və geosiyasi mübarizənin kəskinləşdiyi bir dövrdə biz istənilən situasiyaya hazır olmalıyıq”
Sözügedən məsələni “Bakı-Xəbər”ə şərh edən Demokratik Dəyişim Partiyası Təşkilat Komitəsinin sədri Əli Mustafa hesab edir ki, baş verənlər təsadüfə oxşamır: “Ermənilərin son vaxtlar hərbi baxımdan hazırlaşması göz qabağındadır. Yavaş-yavaş onlara silah-sursat yardımı artırılır. O silahların da əhəmiyyətli hissəsi hücum silahlarıdır. Üstəlik, Birləşmiş Ştatların Ermənistanı daha açıq və leqal şəkildə himayə etməsini, xüsusilə hərbi sahədə dəstəkləməsini müşahidə edirik. Fikrimcə, son vaxtlar Ermənistanın sərgilədiyi mövqe onu göstərir ki, İrəvan revanşa hazırlaşır. Bir formada güclənib nələrsə etməyə çalışır. Düzdür, ola bilsin Ermənistan İrana, Rusiyaya münasibətdə bir hərbi poliqon kimi istifadə olunur. Ancaq eyni zamanda onlar Azərbaycan və Türkiyəyə göz dağı funksiyasında da iştirak edə bilər. Ona görə də son vaxtlar ard-arda baş verənləri əsla təsadüf hesab etmək olmaz. Bütün hallarda dünyada nələr olduğunu görürük. Dünyanın hər yerində silahlanma, hərbi-sənaye kompleksində canlanma müşahidə olunur. Ona görə də bütün bu prosesləri Azərbaycan nəzərə almalıdır. Düzdür, növbəti müharibə, hansısa eskalasiya arzuolunan deyil. Dünyada artan geosiyasi qarşıdurmada bu bizə sərfəli deyil. Lakin istənilən halda biz buna hazır olmalıyıq. O cümlədən, ölkə daxilində çox ciddi siyasi-iqtisadi islahatların aparılmasına ehtiyac var. Yalnız hərbi sahədə deyil, sosial sahədə də islahatların aparılmasına ehtiyac var. Sosial baxımdan cəmiyyətin gücləndirilməsinə zərurət var. Dövlət-xalq etimadını gücləndirmək, bu istiqamətdə səyləri artırmaq lazımdır. Hesab edirəm ki, Ermənistanın budəfəki hazırlığı yalnız hərbi xarakter daşımır. Həm də Qərbin bir sıra ictimai-siyasi dəstəyi ilə bu həddə gəlib çatır. Ona görə də indiki mürəkkəb və geosiyasi mübarizənin kəskinləşdiyi bir dövrdə biz istənilən situasiyaya hazır olmalıyıq”.
Vidadi ORDAHALLI
