BMT məruzəçisinin Azərbaycana qarşı bu qərəzi erməniləri sevindirib...
Hüseyn İbrahimov: “BMT məruzəçisi səviyyəsində belə yalanlar ermənilərin maraqlarına xidmət edir”
Birləşmiş Millətlər Təşkilatının (BMT) Hüquq müdafiəçilərinin vəziyyəti üzrə xüsusi məruzəçisi Meri Loulor Azərbaycanda hüquq müdafiəçiləri və jurnalistlərin saxlanılması və ittiham olunmasından ciddi narahatlığını bildirib.
Bununla yanaşı, BMT məruzəçisi Azərbaycanın ünvanına bir sıra qərəzli fikirlər səsləndirib: “Son aylarda mən Azərbaycanda hüquq müdafiəçiləri və jurnalistlərə qarşı həyəcanverici həbs dalğasının və cinayət işlərinin şahidi olmuşam. Mən bu narahatedici tendensiyanın bir hissəsi olan iki belə işi hökumət qarşısında qaldırmışam”.
İddia edib ki, guya onlar peşəkar fəaliyyətlərinə görə həbs olunublar, onlarla bağlı istintaq prosesi qərəzli, ədaətsiz aparılır. Guya Azərbaycanda media təmsilçiləri təqib və təzyiqlərə məruz qalırlar. Bu arada erməni mediası da böyük sevinclə BMT məruzəçisinin qərəzli və obyektivlikdən uzaq fikirlərini tirajlayıb.
“Ərazilərimiz 30 il işğal altında olanda, məcburi köçkünlərin fundamental hüquqları pozulanda harada idilər?”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimov hesab edir ki, BMT məruzəçisi səviyyəsində belə yalanlar ermənilərin maraqlarına xidmət edir: “Əvvəla, məruzəçinin iddiaları reallıqdan uzaqdır. Məsələlərə birtərəfli yanaşmadır. Hər bir ölkənin olduğu kimi, Azərbaycanın da qanunları var və hər kəs ona əməl etməlidir. Kiminsə qanunları pozması və buna görə məsuliyyətə cəlb olunması, barəsində istintaq işinin aparılması o demək deyil ki, burada qərəz var, iş birtərəfli aparılır. Bu məsələdə yaxşı olardı ki, BMT məruzəçisi qarşı tərəfin də mövqeyinə yer versin. Əfsuslar olsun ki, biz bunu görmürük. Erməni tərəfi öz növbəsində bundan bizə qarşı istifadə edir. Bu da gözlənilən idi. Ona görə ki, Azərbaycana qarşı düşmən mövqe sərgiləyirlər. Hərbi əməliyyatlar dayansa da, siyasi, informasiya müstəvisində müharibə dayanmayıb. Tam əksinə, bütün gücü ilə davam edir. Erməni tərəfi istənilən vaxt belə subyektiv xarakterli fikirlərdən ölkəmizə qarşı maksimum istifadə etməyə, məsələləri başqa istiqamətə yönəltməyə cəhd edir. Məgər BMT məruzəçiləri bilmir ki, Ermənistanın özündə hansı proseslər gedir, insan hüquqları necə pozulur, etiraz edən tərəfin fikirləri necə görməzdən gəlinir? Ərazilərimiz 30 il işğal altında olanda, məcburi köçkünlərin fundamental hüquqları pozulanda BMT məruzəçiləri harada idi? BMT Təhlükəsizlik Şurasının qəbul etdiyi 4 qətnamə kağız üzərində qalanda bəs harada idiniz? İndi az qala hər addım başı Azərbaycanın daxili işinə müdaxilə etməyə, müəyyən məsələləri şişirtməyə, nə olursa-olsun buna siyasi don geyindirməyə çalışırlar. O baxımdan yaxşı olardı ki, xanım məruzəçisi Meri Loulor obyektiv olsun”.
Vidadi ORDAHALLI
