“İsrailin Azərbaycandakı silahları geri qaytarıldı, hədəf İrandır” - molla kəşfiyyatının bəyanatı...

İbrahim Rüstəmli: “Sual olunur, Azərbaycan İsraildən öz pulu ilə aldığı silahı niyə geri qaytarmalıdır ki?”

İran Azərbaycana qarşı dezinformasiya siyasətini ardıcıl olaraq davam etdirir. Biz hər gün belə dezinformasiyaların, yanlış məlumatların, əsassız iddaların şahidi oluruq. SEPAH-ın (İslam İnqilabı Keşikçiləri Korpusu) sosial şəbəkə hesablarında yayılan dezinformasiya da bu qəbildəndir.

SEPAH idda edir ki, guya son iki ildə İsraildən Bakıya göndərilən bütün silahlar İsrailə qaytarılıb. Erməni mediası yazır ki, SEPAH-a bağlı sosial şəbəkə platformalarında dərc olunan mesajda “bu, işğal olunmuş Fələstində İsraillə münaqişənin müsbət nəticələrindən biridir. Güman edilirdi ki, bu silahlar İranın şimal-qərb sərhədində regionda sabitliyi pozmaq üçün istifadə olunacaq” - deyə bildirilib.

“Bu dezinformasiyanın arxasında Azərbaycanı hədəfə almaq dayanır” 

Hərbi ekspert İbrahim Rüstəmli “Bakı-Xəbər”ə şərhində bildirdi ki, SEPAH-ın yaydığı məlumat dezinformasiyadır. “Bu dezinformasiya məqsədli şəkildə dövriyyəyə buraxılıb, onlar öz çirkin məqsədlərinə çatmaq üçün bu üsuldan istifadə edirlər. Bu dezinformasiyalar məlum mərkəzlər tərəfindən xüsusu şəkildə hazırlanıb sosial şəbəkələrə, mətbuata ötürülüb. Necə ki, koronavirusu laboratoriyada yetişdirib insanlar arasında yaydılar, eləcə də bu cür dezinformasiyaları hazırlayıb yayırlar. Onların məqsədi Azərbaycanın beynəlxalq imicinə zərbə vurmaqdır. Sual olunur, Azərbaycan İsraildən öz pulu ilə aldığı silahı niyə geri qaytarmalıdır ki? İsrail bütün dünyaya silah ixrac edir, satır. İsrail bu müharibəyə uzun illərdir ki, hazırlaşırdı, İsrail kəşfiyyatı dünyanın ən güclü kəşfiyyat institutlarından biridir. Yəni İsrail o günə qalıb ki, Azərbaycana satdığı silahları geri alsın? 

Bu iddialar əsassızdır, absurddur. Bu dezinformasiyanın arxasında Azərbaycanı hədəfə almaq dayanır. Sənin İsrailə gücün çatmır, gəlib Azərbaycanı hədəfə alırsan. Onlar həmişə əsassız olaraq Azərbaycanı hədəfə alıblar. Biz bunu həmişə görmüşük. Azərbaycanın 44 günlük müharibədə Ermənistan üzərində qələbəsi İranı narahat edir. Azərbaycanın güclənməsindən də əndişə keçirir”.

İ.Rüstəmli bildirdi ki, Azərbaycanın müstəqil dövlət kimi silah almaq, silah satmaq hüququ var və bizim hərbi sənayemiz də getdikcə inkişaf edir. İ.Rüstəmli deyir ki, SEPAH tərəfindən yayılan bu məlumat özündə ağlagəlməz yalanları əks etdirir, şər-böhtan onların öz siyasətindən, daxilindən gələn və öz siyasətlərinə xidmət edən amillərdir. 

“İsrail Azərbaycanın starteji müttəfiqidir. Strateji müttəfiq kimi də Azərbaycan İsraillə silah-sursat alış-satışı həyata keçirə bilər. Eləcə də digər dövlətlərin bu istiqamətdə qarşılıqlı müqavilələri, razılaşmaları var. Dövlət rəhbərliyi səviyyəsində rəsmi qaydada ikitərəfli, üçtərəfli və sair danışıqlar var və o danışıqlar əsasında silahlar alınır, satılır. Belə deyək, Azərbaycan əgər İsraildən silah alırsa bu onun hüquqi cəhətdən haqqıdır. Yəni heç bir dövlətin ona müdaxilə etməsinin yeri yoxdur. Azərbaycan müstəqil bir dövlətdir. O ki qaldı İsrail məsələsinə, onlar çoxdandır İsrail məsələsini Azərbaycana etap etmək istəyirlər, guya onların bizdə hərbiçiləri var və sair. Burada da məqsəd Azərbaycanı hədəfə almaqdır. Bu da nədən ibarətdir? Əvvəlcə informasiya bazasını yaradırlar, belə fon formalaşdırırlar, sonra da Azərbaycanı suçlamağa çalışırlar. Halbuki, Azərbaycan öz yaxın qonşuları, Rusiya, İran, Gürcüstanla, eləcə də digər dövlətlərlə çox stabil, düşünülmüş, uzaq hədəfləri nəzərdə tutan münasibətlər qurub. Bu münasibətlərdə Rusiyaya, İrana, Gürcüstana, heç Ermənistanın özünə belə təhdid yoxdur. Bütün danışıqlar, razılaşmalar dövlət rəhbərliyi səviyyəsində əldə olunur və bilirsiz ki, Qərbi Zəngəzur məsələsi də Ermənistan hökumətinin öz məsuliyyətidir. Bir zamanlar hər şeyə razı olublar, sənəd imzalayıblar və sair. 

İndi bu məsələdə də məqsəd Azərbaycanı İsrailin strateji müttəfiqi kimi hədəfə almaqdan və İranda Azərbaycana qarşı dezinformasiya fonunda mənfi, neqativ rəy formalaşdırmaqdan ibarətdir. İranın da Azərbaycana qarşı mövqeyini bilirsiz. Onlar dünənə qədər Ermənistanla can bir qəlbdə qardaş idilər, qucaqlaşıb öpüşürdülər. İndi Amerika okeanın o tayından Ermənistana lövbər atıb, İranın da Ermənistana münasibəti dəyişib. Bilirsiz, yeni geosiyasi reallıqlar yeni geosiyasi baxışlara gətirib çıxarır. Halbuki, Azərbaycanın İsraillə münasibətlərində İrana qarşı heç bir təhdid yoxdur, ola da bilməz. Azərbaycanın İran problemi yoxdur. Birincisi, İranın İsrail problemi varsa gedib onu başqa yerdə axtarsın. İkincisi də, yenə də deyirəm, dövlət başçıları səviyyəsində dövlətlərarası razılaşmalar, müqavilələr var, Azərbaycan da bunun əsasında tək İsraildən yox, dünyanın ən müasir silah istehsalçısı olan ölkələrdən silahlar alır və bu onun konstision hüququdur, beynəlxalq hüquqdur. Azərbaycan İsrail-İran münasibətlərində hər hansı bir gərginləşməyə səbəb olacaq heç bir addım atmır. Bunu özünə münasib bilmir, özünə sığışdırmır.

İran, SEPAH tez-tez ortaya söhbətlər atır ki, guya Azərbaycan İsrailə dəstək verir. Azərbaycan heç zaman İsrail üzərindən İrana qarşı mübarizə aparmır. Azərbaycanın nə İsrail, nə İran, nə Rusiya problemi var. Azərbaycan bir dövlət olaraq müstəqil siyasət həyata keçirir. Bu siyasəti şərtləndirən əsas hədəf də ondan ibarətdir ki, Azərbaycan istər hərbi, istər siyasi, istər iqtisadi addımlarında beynəlxalq hüququn normalarını gözləyir.

Ona görə də bu kimi iddiaların əsası yoxdur, bu, xüsusi hazırlanmış dezinformasiyadır” - deyə İ.Rüstəmli bildirdi.

İradə SARIYEVA