“Şimal axını” boru kəmərində partlayışın pərdəarxası açılır - plan içki məclisində hazırlanıb...
ABŞ-ın tələbi ilə Zelenski geri çəkilib, ancaq Zalujnı... əməliyyatdan sonra qrupla əlaqə kəsilib...
Almaniyanın Rusiyadan Avropaya təbii qazın nəqlini həyata keçirən “Şimal axını” boru kəmərinə təxribatla bağlı təhqiqatı Ukraynanın keçmiş baş qərargah rəisi Valeri Zalujnıya yönəlib. “The Wall Street Journal” mənbələrə istinadən yazıb ki, əməliyyatı şəxsən Zalujnı idarə edib. Qəzet iddia edir ki, Ukrayna prezidenti Zelenski də əvvəlcə təxribata razılıq verib, lakin sonradan ABŞ MKİ-nin tələbi ilə geri addım atıb.
Əməliyyatda iştirak edənlərdən biri “The Wall Street Journal”a bildirib ki, plan 2022-ci ilin mayında içki məclisində hazırlanıb. Təxribatın dəyəri təxmini 300 min dollar olduğu hesablanıb. Qəzetin yazdığına görə, əməliyyat iş adamları tərəfindən maliyyələşdirilib və bütün razılaşmalar şifahi şəkildə ələ edilib. Əməliyyatda hərbçi və mülki olmaqla ümumilikdə 6 nəfər iştirak edib, əməliyyatda istifadə edilən “Andromeda” adlı yaxta isə təxminən on il əvvəl Ukrayna kəşfiyyatı tərəfindən maliyyə əməliyyatları üçün gizli şəkildə qurulan Polşa mərkəzli bir turizm agentliyi vasitəsilə icarəyə götürülüb.
Xəbərdə planın koordinatoru kimi Ukrayna Silahlı Qüvvələrinin keçmiş polkovniki Roman Çernışevskinin adı çəkilir. Çernışevski əvvəllər bu ittihamları təkzib etmişdi. Lakin “The Wall Street Journal” sonradan keçmiş polkovnikin baş verənlərin Ukrayna üçün müsbət tərəflərini dilə gətirdiyini bildirir: “Avropa ölkələri qaz tədarükündə Rusiyadan daha müstəqil oldular və Rusiyanın Ukrayna ərazisindən ixracı üçün yalnız bir marşrutu qalıb”.
Hollandiya kəşfiyyatının əməliyyatla bağlı məlumatlara malik olduğu və MKİ-yə xəbərdarlıq etdiyi də üzə çıxıb. Amerika rəsmiləri bu məlumatı Almaniyaya çatdırıb, MKİ isə Zelenskiyə əməliyyatı dayandırması barədə xəbərdarlıq edib. “The Wall Street Journal”nın məlumatına görə, Zelenski də Zalujniyə əməliyyatı dayandırmağı əmr edib, lakin Zalujni bu əmrə məhəl qoymayıb. 2022-ci ilin sentyabrında boru kəmərlərinə təxribatdan sonra Ukraynanın keçmiş baş komandanı Zelenskiyə, əməliyyata göndərilən qrupla əlaqənin kəsildiyini və onları geri çağırmağın mümkün olmadığını deyib.
Alman istintaqı Ukrayna prezidenti ilə əməliyyat arasında birbaşa əlaqə yarada bilməyib. “The Wall Street Journal”nın məlumatına görə, müstəntiqlər həm keçmiş baş komandan, həm də onun çevrəsi ilə bağlı araşdırma aparırı, lakin ortada onların təxribatda iştirakını sübut edəcək heç bir dəlil yoxdur.
Xatırladaq ki, “Şimal axını” boru kəmərlərində partlayışlar 26 sentyabr 2022-ci ildə baş verib.
TAHİR
