Bu media qurumlarında ödənişli əsaslarla təşviqat həyata keçirilə bilər
Müşfiq Ələsgərli: “Formalaşmış seçki mədəniyyəti belə süni ajiotajlara deyil, daha çox kimin platformasında nələrin əks olunmasına diqqət yetirilməsini zəruri edir”
Azərbaycanda sentyabrın 1-də keçiriləcək növbədənkənar parlament seçkilərinin əsas mərhələlərindən biri - deputatlığa namizədliyin irəli sürülməsi başa çatıb. Artıq avqustun 2-dən Milli Məclisə seçkilərdə namizədliyin qeydə alınması üçün müvafiq sənədlərin dairə seçki komissiyalarına təqdim olunması dayandırılıb.
Növbəti mərhələdə - 2-9 avqust tarixlərində qanunvericiliklə müəyyən olunmuş vaxtda və qaydada təqdim olunan sənədlərə baxılıb və namizədliyin qeydə alınması ilə bağlı yekun qərarlar verilib.
Ardınca 23 gün davam edəcək seçkiqabağı təşviqat kampaniyası avqustun 9-da start götürüb və 31-də bitəcək. Mərkəzi Seçki Komissiyasının mətbuat xidmətindən bildirilib ki, seçki qanunvericiliyinin tələblərinə uyğun olaraq, Milli Məclisə seçkilərdə seçkiqabağı təşviqat aparmaq məqsədilə ölkə üzrə birmandatlı seçki dairələrinin 60-dan çoxunda namizədləri qeydə alınmış siyasi partiyalara, siyasi partiyaların bloklarına İctimai Televiziya və Radio Yayımları Şirkətində ödənişsiz efir vaxtı, “Azərbaycan” qəzeti, “Xalq qəzeti”, “Respublika” qəzeti və “Bakinski raboçi” qəzetlərində isə ödənişsiz dərc üçün yer ayrılacaq. Bununla yanaşı, ödənişli seçkiqabağı təşviqata qoşulmaqla bağlı 58 media qurumundan təqdim olunan məlumat da MSK-nın rəsmi İnternet səhifəsində yerləşdirilməklə ictimailəşdirilib. Bu media qurumlarında bütün təşviqat subyektləri üçün bərabərlik prinsipi gözlənilməklə, ödənişli əsaslarla seçkiqabağı təşviqat həyata keçirilə bilər.
Ancaq maraqlıdır ki, biz alternativ namizədlərin debatına rast gəlmirik. Namizədlər debatlarda iştirakdan niyə yayınır?
Media eksperti Müşfiq Ələsgərli “Bakı-Xəbər”ə açıqlamasında bildirdi ki, seçki prosesi özü vaxt baxımdan uzun müddət olsa da, təşviqat və təbliğat prosesinin konkret vaxtı qısadır: “Milli Məclis seçkiləri ilə əlaqədar olaraq təbliğat və təşviqat prosesinə yeni start verilib. Yəni avqust ayının 9 - da başlayıb. Bu baxımdan hesab edirəm ki, hələ qarşıda müddət var. Namizədlərdən kimlərsə debata maraqlı olub, ortaya çıxa bilər. Ancaq qısa müddətdə olan müşahidələrə görə, insanlarla canlı görüşlərə üstünlük verirlər. Debatların aparılması, təbliğat - təşviqat proqramlarının yayılması üçün bütün zəruri imkanlar yaradılıb. Mərkəzi Seçki Komissiyası ödənişli, ödənişsiz təbliğat aparmalı olan, bunun üçün qeydiyyatdan keçən 58 media subyektinin siyahısını MSK - nın saytında yerləşdirib. Orada hər bir kəsin durumuna uyğun olaraq, hər media subyektinin öz qiymətləri də elan olunub. Eyni zamanda Mərkəzi Seçki Komissiyası deputatlığa namizədlər üçün qapalı və açıq görüş məkanlarının da siyahısını verdi. Namizədlərin təbliğat və təşviqat işi aparması üçün debatlar, müsahibələr, açıqlamalar verməsi üçün bütün qayda - qanunlar, zəruri yerlər, məkanlar müəyyənləşdirilib. Buradan necə istifadə etmək namizədlərin özlərinin iradəsindən asılı olan bir məsələdir. Mən diqqət edirəm ki, onlar daha çox canlı görüşlərə gedirlər, görüşlər keçirirlər. Bunun üçün də onlara yetərincə imkanlar yaradılıb. İkinci istiqamət kimi sosial media platformalarının inkişafını göstərmək olar. Bizim ənənəvi media ilə yanaşı, sosial media da namizədlərin təbliğat və təşviqatı üçün müəyyən addımlar atır. Üçüncü istiqamət kimi diqqətimi çəkən məsələ odur ki, son illərdə keçirilən seçkilərdə bir seçki mədəniyyəti formalaşıb. Əvvəllər deputatlığa namizədlər bir - birinə qarşı təhqir, böhtan, aşağılayıcı ifadələr işlədirdilər. Bu da süni şəkildə bir ajiotaj, debat yaradırdı. Amma bilirsiz ki, bizim həm qanunvericiliyimiz, həm də son vaxtlar formalaşmış seçki mədəniyyətimiz bu cür qalmaqalları inkar edir. Seçki platformaları indi başqalarının aşağılanmasına deyil, hər bir şəxsin özünün fikirlərinin çatdırılmasına əsaslanır. Bu baxımdan bu platformaları da açıqlamaq üçün ölkədə kifayət qədər şərait yaradılıb. Həm alternativ media qurumlarında, sosial şəbəkədə, həm də ənənəvi mediada açıq və qapalı görüş meydanlarında bu cür şərait yaradılıb. Hesab edirəm ki, artıq qalmaqallı debatlara bir zərurət də yoxdur. Çünki formalaşmış seçki mədəniyyəti belə süni ajiotajlara deyil, daha çox kimin platformasında nələrin əks olunmasına diqqət yetirilməsini zəruri edir”.
Məlum olduğu kimi, hazırda növbədənkənar parlament seçkilərinin təbliğat-təşviqat mərhələsinə qədəm qoymuşuq. Seçki fəallığını artırmaq məqsədilə “Bakı-Xəbər” Media Qrupu namizədlər üçün ödənişsiz debat təşkil etməyə hazır olduğunu bəyan edir. Bununla bağlı alternativ namizədlər “Bakı-Xəbər” redaksiyasına müraciət edib, həm studiyanın imkanlarından yararlana bilər, həm də onların debatının “YouTube” kanalımızda yayılmasını təmin etmiş olacağıq.
Məhəmmədəli QƏRİBLİ
