Ermənistan hərbi xərclərin artım sürətinə görə Azərbaycanı üstələyir - təhlükə böyüyür...
Ramil Məmmədli: "Ermənistanın militaristləşdirilməsinin arxasında bir sıra planlar dayanır"
İqtisadiyyat və Sülh İnstitutu (IEP) dünyanın hərbi sənayelərindəki tendensiyaları təsvir edən "Militarizasiyada mövcud trendlər" adlı hesabat dərc edib. Hesabat müəllifləri, digər məsələlərlə yanaşı, müxtəlif ölkələrin büdcələrində hərbi xərclərin hansı yeri tutduğunu da hesablayıblar.
Hesabat müəlliflərinin fikrincə, keçmiş SSRİ dövlətləri arasında Ermənistan (4,2%) və Azərbaycan (3,8%) siyahıda daha yüksək yerlərdə qərarlaşıb. Qeyd olunur ki, Ermənistanda bu göstərici 2008-ci ilin məlumatı ilə müqayisədə 0,7%, Azərbaycanda isə 0,5% artıb. Məsələn, Gürcüstanda bu rəqəm cəmi 1,3% təşkil edirsə, 2008-ci ildən bu yana 6,6% azalıb. Rusiyada bu rəqəm 2,4%, Türkiyədə 0,7%, İranda 2,2% olub. ABŞ iqtisadiyyatında isə hərbi xərclər 3,1% təşkil edir. 15 il əvvəl bu göstərici 4,7% olub.
Burada diqqəti çəkən məqam odur ki, Ermənistan Azərbaycana nisbətən hərbi xərclərini çoxaldıb. Nəzərə alsaq ki, Ermənistan əhalisi Azərbaycandan 3 dəfədən çox azdır, ərazisi ölkəmizlə müqayisədə 3 dəfəyədək kiçikdir, o zaman bu, Ermənistanın militaristləşməsinə açıq sübutdur.
"Söhbət təkcə haylardan Azərbaycana qarşı təzyiq aləti kimi istifadə etməkdən, revanşizmi körükləməkdən getmir..."
Sözügedən məsələni "Bakı-Xəbər"ə şərh edən hərbi ekspert Ramil Məmmədli hesab edir ki, bütün bunlar Ermənistanın sürətlə silahlandırılmasına dair növbəti faktlardır: "Məlum olduğu kimi, son illər Fransa başda olmaqla bir sıra ölkələr açıq şəkildə Ermənistanı silahlandırmağa başlayıblar. Bu prosesə son günlər Birləşmiş Ştatlar da qoşulub. Fransa Ermənistanı hava hücumundan müdafiə vasitələri ilə, zirehli maşınlarla təmin edir. Eyni zamanda Fransa Ermənistana 40 ədəddən çox "Sezar" özüyeriyən haubitsaların verilməsinə qərar verib. Faktiki olaraq, Ermənistan hücum sılahları ilə təmin edilir. Digər tərəfdən, Hindistan bu ilin sonunadək Ermənistana "Akash-1S" hava hücumundan müdafiə üzrə mobil sistemlərin tədarükünü həyata keçirəcək. Belə ki, "Bharat Dynamics Limited" şirkətinin istehsalı olan bu sistem istiqamətləndirici döyüş başlığı ilə təchiz edilib. Ümumilikdə, Ermənistan 2022-ci ildə Hindistandan 15 ədəd "Akash-1S" sistemləri alıb. Bu müqavilənin maya dəyəri 720 milyon dollar təşkil edib. Nəzərə aısaq ki, Azərbaycan beynəlxalq hüquqa və BMT-nin 4 məlum qətnamələrinə əsaslanaraq öz ərazi bütövlüyünü təmin edib, sülh danışıqları və sərhədlərin delimitasiyası ilə bağlı proseslər gedir, o zaman bütün bunlar nə deməkdir? Ermənistanın militaristəşdirilməsində məqsəd nədir? Görünən odur ki, bəzi Qərb dövlətləri Ermənistanı sürətlə silahlandıraraq ondan maşa kimi region ölkələrinə qarşı istifadə etmək istəyir. Burada söhbət təkcə Ermənistandan Azərbaycana qarşı təzyiq aləti kimi istifadə etməkdən, revanşizmi körükləməkdən getmir. Həm də Ermənistandan İrana qarşı istifadə etməkdən gedir. ABŞ hərbiçilərinin Zəngəzura yerləşdirilməsi Ermənistan vasitəsilə İran barədə kəşfiyyat məlumatları toplamaq, lazım gələrsə diversiya qruplarını bu ölkəyə keçirmək məqsədi daşıyır. O cümlədən, məqsəd həm də Rusiyanı Ermənistandan çıxarmaqdır. Bir sözlə, Ermənistanın militaristləşdirilməsinin arxasında bir sıra planlar dayanır".
Vidadi ORDAHALLI
