Azərbaycan-Rusiya münasibətləri bu qonşulara(?) nümunədir...
Ramil Hüseynov: “Çox güman burada Gürcüstandan söhbət gedə bilər”
Azərbaycan-Rusiya münasibətləri bəzi qonşu dövlətlər üçün də bir nümunədir. Bunu Prezidenti İlham Əliyev Rusiya Federasiyası Təhlükəsizlik Şurasının katibi Sergey Şoyqunu qəbul edərkən deyib.
Dövlət başçısı iki ölkənin siyasi rəhbərliyi arasında qəbul olunmuş qərarların, məhz “Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında” Bəyannamənin müddəalarının uğurla həyata keçirilməsini məmnunluqla qeyd edib. Azərbaycan-Rusiya münasibətlərinin bəzi qonşu dövlətlər üçün də bir nümunə olduğunu deyən Prezident Əliyev bunu Cənubi Qafqazda və daha geniş məkanda mühüm təhlükəsizlik faktoru kimi dəyərləndirib.
Maraqlıdır, Prezident “Azərbaycan-Rusiya münasibətləri bəzi qonşu dövlətlər üçün də bir nümunədir” deyərkən burada hansı qonşu dövətlər nəzərdə tutula bilər?
“Azərbaycan dövləti yeritdiyi siyasətlə Vətən müharibəsində Rusiyanın neytrallığını təmin edə bildi”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynov hesab edir ki, çox güman burada Gürcüstandan söhbət gedə bilər: “Əvvəla, Azərbaycan-Rusiya münasibətləri müstəqilliyə, qarşılıqlı maraqlara söykənir. Azərbaycanın Rusiya ilə münasibətləri hansısa ölkəyə qarşı çevrilməyib. O cümlədən bu, o demək deyil ki, Moskvaya görə Bakı hansısa ölkə ilə məsafə saxlayır. Azərbaycanın Rusiya ilə yanaşı, bir sıra qərb ölkələri ilə yaxşı münasibəti var. Azərbaycanın əsas ticarət tərəfdaşı Avropa İttifaqı ölkələridir. Məlum olduğu kimi, bu gün Rusiya ilə Ukrayna arasında müharibə gedir. Ancaq Azərbaycan bu məsələdə tərəf deyil. Azərbaycan hər iki ölkə ilə normal münasibətlərə malikdir. Azərbaycan Ukraynanın ərazi bütövlüyünü dəstəkləyir. İndiyə qədər Ukraynaya 40 milyon dollar humanitar yardım göstərib. İrpen şəhərinin bərpasında Azərbaycan yaxından iştirak edib. Azərbaycan dövləti yeritdiyi siyasətlə Vətən müharibəsində Rusiyanın neytrallığını təmin edə bildi. Bu, olduqca önəmli məqam idi. Nəticədə həm ərazi bütövlüyümüz təmin olundu, həm də Qarabağda suverenliyimizi tam bərpa edildi. Bütün bunlar nəticəsində Azərbaycan cəmiyyətində Rusiyaya münasibət müsbət bənada dəyişdi, ehtimad artdı və s. Üstəlik, bütün bunlar ona gətirib çıxarmadı ki, Azərbaycan Rusiyanın yaratdığı iqtisadi və hərbi qurumlarda təmsil olunsun. Belə görünür ki, Gürcüstan Azərbaycan təcrübəsindən faydalanmağa çalışır. Rusiya ilə münasibətləri stabilləşdirməyə və bu minvalla ərazi bütövlüyünü təmin etməyə çalışır. Çünki Azərbaycan bu məsələdə həqiqətən də Gürcüstan üçün örnək ola bilər. Azərbaycan 1993-cü ildən bəri heç vaxt birtərəfli siyasət yeritmədi. Balanslaşdırılmış siyasət hesabına ölkə geosiyasi təlatümlərdən qorundu. O baxımdan hesab edirəm ki, Azərbaycan-Rusiya münasibətləri Gürcüstan üçün örnək ola bilər. Yoxsa Ermənistana baxsaq görərik ki, bu ölkə Rusiya ilə strateji, hərbi müttəfiq olsa da Paşinyan hakimiyyəti bütün bunlara tamamilə zidd siyasət aparır”.
Vidadi ORDAHALLI
