Bundan sonra daha bir addım və Ermənistan KTMT-dən çıxacaq - Kreml “yatır”...
Ramil Məmmədli: “Kreml bunun əks effekt verəcəyindən ehtiyat edir”
Ermənistandan KTMT-yə qarşı növbəti addım. Bu dəfə İrəvan avqustun 14-dən 16-dək Novosibirskdə baş tutacaq “Kobalt-2024” manevrlərində iştirakdan imtina edib.
Qeyd edək ki, fevralın 23-də Ermənistanın baş naziri Nikol Paşinyan bildirib ki, ölkəsinin KTMT-də iştirakı “dondurulub”. Ermənistan bundan əvvəl, 2023-cü il dekabrın 19-da KTMT parlamentinin iclasında iştirakdan imtina edib. Yanvarın 8-də Ermənistan Təhlükəsizlik Şurasının rəhbəri Armen Qriqoryan KTMT-dən heç bir gözləntinin olmadığını bildirib. Mayın 8-də isə Ermənistan KTMT-nin 23 noyabr 2023-cü il tarixli “KTMT-nin 2024-cü il büdcəsi haqqında” qərarında nəzərdə tutulmuş fəaliyyətini maliyyələşdirməyəcəyini açıqlamışdı. İndi də növbəti təlimlərə qatılmayıb.
Maraqlıdır, bundan artıq Ermənistan nə etməlidir ki, KTMT İrəvanın bu qurumda təmsilçiliyinə xitam versin?
“Moskva belə bir addım atsa, o zaman Ermənistanda Rusiyapərəst qüvvələr pis vəziyyətə düşəcəklər”
Sözügedən məsələyə aydınlıq gətirən hərbi ekspert Ramil Məmmədli “Bakı-Xəbər”ə açıqlamasında Rusiyanın KTMT-də Ermənistanın şıltaqlıqlarına dözümlü yanaşmasını bir sıra amillərlə əlaqələndirdi: “Rusiya bir sıra məsələlərə görə Paşinyan hakimiyyətinin bu siyasətinə dözür. Möskva hesab edir ki, Ermənistanı indiki dövrdə KTMT-dən uzaqlaşdırsa, bu, Paşinyanın digər kəskin addımlar atmasına şərait yaradacaq. Paşinyan bundan bəhanə kimi istifadə edərək 102-ci hərbi bazanın Gümrüdən çıxarılmasını gündəmə gətirəcək. Onsuz da Rusiyanın Ukraynada vəziyyəti yaxşı deyil. Müharibə Rusiyaya böyük resursların itkisi hesabına başa gəlir. Rusiyanın kəskin addım atmamasının bir səbəbi də erməni lobbisi ilə əlaqədardır. Orada güclü erməni diasporu olmaqla yanaşı, ermənilər Rusiyanın təbliğat ruporunda vacib rol oynayırlar. Rusiya kanallarında erməni əsilli ekspertlər Qərb və Ukrayna əleyhinə təbliğatda əsas rola malikdilər. Fikrimcə, onları incik salmamaqdan ötrü Moskva kəskin addım atmaq istəmir. Heç kimə sirr deyil ki, Rusiya iqtisadi rıçaqları işə salsa Ermənistan çətin duruma düşəcək. Ermənistan məhsulları üçün əsas bazar Rusiyadır. Həmçinin qazın qiymətini qaldırmaq kifayətdir ki, bu, Ermənistan iqtisadiyyatında özünü göstərsin. Ancaq Moskva belə bir addım atsa, o zaman Ermənistanda Rusiyapərəst qüvvələr pis vəziyyətə düşəcəklər. Onsuz da onların cəmiyyətdə nüfuzu 4 il əvvəlki dövrlə müqayisədə kəskin şəkildə aşağı düşüb. Elə bunun nəticəsidir ki, Paşinyana qarşı revanşist müxalifətin təşkil etdiyi mitinqlərin heç bir nəticəsi olmur. Belə bir məqamda iqtisadi təzyiq vasitələri işə salınsa, Rusiyaya qarşı Ermənistanda nifrət daha da artacaq. Kreml bunun əks effekt verəcəyindən ehtiyat edir. Ən nəhayət, Rusiya-Ukrayna müharibəsinin sonunu gözləyir. Məhz ondan sonra Ermənistanla bağlı hansı qərarların veriləcəyi məlum olacaq. Bax, bütün bunlar Moskvanın KTMT məsələsində seyrçi mövqe tutmasını şərtləndirir”.
Vidadi ORDAHALLI
