Bakıda çox dövlətlərin mobil telefon nömrələri satılır - hətta Keniya nömrələri də...
Nadim Əliyev: “Müxtəlif məqsədlərlə saxta sosial hesablar açmaq istəyənlər bu yola əl atır”
Son vaxtlar xarici nömrələrin satışına dair elanlar çoxalıb. Sosial şəbəkələrdə Tailand, İngiltərə, Hollandiya, Almaniya və Keniyaya aid telefon nömrələri satılır. Qiymətlər isə 7 - 15 manat aralığında dəyişir.
Elanlarda qeyd edilir ki, bu cür nomrələr kart deyil, virtual nömrələrdir. Bununla ya vatsap, ya telegram işlətmək olur. Elanda o da bildirilir ki, həmin nömrələr uzunmüddətli fəaliyyət göstərmir, müəyyən vaxtdan sonra avtomotik olaraq dayanır.
Maraqlıdır, bu nömrələr nə üçün istifadə olunur?
“Belə nömrələri alan şəxslər üçün müəyyən problem yarana bilər, yaxşı olar ki, insanlar bu cür elanlardan uzaq olsun”
İKT sahəsi üzrə ekspert Nadim Əliyev “Bakı-Xəbər”ə şərhində bildirdi ki, bu nömrələri satan şəxslər fırıldaqçılardır: “Sosial şəbəkələrdə ödəmə terminalları vasitəsilə kimlərinsə kart hesablarına pul köçürdüb, çekin şəklini həmin adama hansısa üsulla göndərərək, xarici virtual nömrə alanlar müşahidə olunur. Bu tipli ölkədə yaşayıb, amma xarici nömrə alanların və satanların niyyətləri müəmmalıdır. Bu tipli virtual nömrələrin real sim kartı olmur. Müxtəlif məqsədlərlə saxta sosial hesablar açmaq istəyənlər bu yola əl atır. Bu cür virtual nömrə əsasında sosial şəbəkə hesabı aktivləşdirilir və müxtəlif kirli məqsədlər üçün istifadə olunur”.
Həmsöhbətimiz onu da əlavə etdi ki, belə nömrələri alan şəxslər üçün müəyyən problem yarana bilər: “Yaxşı olar ki, insanlar bu cür elanlardan uzaq olsun. Hazırda xarici nömrələrlə insanlara zənglər gəlir. Maraqlısı odur ki, bir çox hallarda xarici nömrə ilə zəng edib rusca danışırlar. Bu da əslində bir həmlə sayılır. Azərbaycanda əksəriyyət rus dilini bildiyinə görə məhz bu dildə danışaraq cəhd edirlər. Qarşı tərəfdə danışan insandır, proqram deyil. Bu şəxslərin beynində ssenari var və onun vasitəsilə insanları aldatmağa çalışırlar. İnsanların bank məlumatlarını əldə etmək üçün əllərindən gələni edirlər. Bu mövzuda insanlar sadəcə diqqətli olmalıdırlar. Başa düşməlidirlər ki, pul qazanmaq bu qədər asan deyil”.
Günel CƏLİLOVA
