Rusiyadan İsrailə hücuma hazırlaşan İrana hərbi dəstək - Tehrana radar və müasir HHM sistemləri göndərildi...
İran İsraillə müharibəyə hazırlaşdığına görə, Rusiyadan müasir raket əleyhinə sistemlər istəyib. Bu barədə “New York Times” məlumat yayıb.
Qəzet iki yüksək rütbəli İran rəsmisinə istinadən yazıb ki, İran Tehrana radarlar və müasir hava hücumundan müdafiə sistemləri verməsi xahişi ilə Rusiyaya müraciət edib və onların Rusiyadan İrana çatdırılmasına artıq başlanılıb.
Nəşrin məlumatına əsasən, bu mövzuda söhbət Rusiyanın sabiq müdafiə naziri Serqey Şoyqunun İrana səfəri çərçivəsində baş tutub. Şoyqu İranın yeni seçilmiş prezidenti Masud Pezeşkiyan, İranın Silahlı Qüvvələrinin generalı Mohamed Bağeri və İranın Ali Milli Təhlükəsizlik Şurasının katibi ilə görüşüb.
“Rusiya regional məsələlərdə İranla tam əməkdaşlığa hazırdır” – Şoyqu bildirib.
Qeyd edək ki, avqustun 5-də Rusiya Milli Təhlükəsizlik Şurasının katibi Şoyqu İranın Ali Milli Təhlükəsizlik Şurasının katibi Əli Əkbər Əhmədianın dəvəti ilə İrana səfər edib.
Xatırladaq ki, HƏMAS hərəkatının Siyasi Bürosunun rəhbəri İsmayıl Haniyənin İranın paytaxtı Tehranda yerli vaxtla təxminən 02:00-da qaldığı yerə raket zərbəsi endirilməsi nəticəsində öldüyü bildirilir. HƏMAS rəsmi bəyanatında Siyasi Büro rəhbərinin ölümünü təsdiqləyərək, insidentdə İsraili günahlandırıb.
TAHİR
