Çinin qarpız və yemişi bostançı fermerlərin "nəfəsini kəsir"…
Akif Nəsirli: “Yanvar-may aylarında yemişə olan tələbatın ödənilməsi üçün idxala üstünlük verilir”
Azərbaycan beş il iki aylıq fasilənin ardından Çindən yemiş tədarükünü bərpa edib. Bu ilin yanvar-may aylarında Azərbaycana 86 min ABŞ dolları dəyərində 120.23 ton yemiş idxal edilib. Dövlət Statistika Komitəsinin apardığı hesablamalara əsasən, bu, 2023-cü ilin eyni dövrünün göstəricisindən dəyər ifadəsində iki dəfə, kəmiyyət olaraq – 2.2 dəfə çoxdur. Qeyd edək ki, yemişi təkcə Çindən idxal etmirik.
Hesabat dövründə Azərbaycan İrandan 61.32 min ABŞ dolları dəyərində 87.66 ton, Türkiyədən 19.39 min ABŞ dolları dəyərində 27.7 ton, Braziliyadan 4.66 min ABŞ dolları dəyərində 4.66 ton, Kosta-Rikadan 0.2 min ABŞ dolları dəyərində 0.2 ton yemiş alıb.
Danılmaz faktdır ki, Azərbaycanın özünün keyfiyyətli yemiş sortları mövcuddur. Azərbaycanda kifayət qədər bostan və tərəvəz bitkilərinin əkiləcəyi torpaqlar var. Yemiş və qarpızla bağlı xüsusilə Mərkəzi Aran rayonlarında münbit şərait var. Hər il bostan mövsümü ərzində yetişdirdiyi yemişi, qarpızı sata bilməyən fermerlərin şikayətlərini eşidirik. Bəs özümüzdə bolluqdursa, yetişdirə biliriksə, yemişi niyə xaricdən idxal edirik?
Liberal İqtisadçılar Birliyinin sədri Akif Nəsirli “Bakı-Xəbər”ə açıqlamasında bildirdi ki, ölkəmizdə çox keyfiyyətli yemiş sortları yetişir. Buna baxmayaraq yemiş idxal olunur: "Məlumdur ki, Azərbaycanda yanvar-may aylarında yemiş yetişdirilmir. Qeyd edilən aylarda yemiş yalnız istixana şəraitində yetişə bilər. Bunu da bizim fermerler etmir. Yanvar-may aylarında ölkə daxilində yemiş olmadığı üçün Çindən idxal olunur. Dediyim kimi, Azərbaycanda yemiş yalnız isti aylarda bitir. Bazar iqtisadiyyatı elə bir sistemdir ki, məhsula harda tələbat varsa, məhsul həmin yerə gəlib çatır. Yanvar-may aylarında yemişə olan tələbatın ödənilməsi üçün idxala üstünlük verilir. Qeyri-mövsüm vaxtı digər ölkələrdən gətirilə bilər. Bu, bütün ölkələrdə baş verən prosesdir. Çünki yanvar-mart aylarında ölkəmizdə yemiş yetişdirilməsi mümkün deyil. Bu bitkinin istiliyə ehtiyacı var. Çinin də cənub hissəsində bəzi bölgələri var ki, isti ərazilərdir və orada məhsul tez yetişir. O səbəbdən də oradan ixrac olunur”.
Həmsöhbətimiz onu da əlavə etdi ki, hazırda ölkədə yemiş yetişir və bazarda da öz məhsulumuz satılır: “Məlumat üçün deyim ki, hazırda yemişin 1 kiloqramının qiyməti 1 manatdır. Ancaq qış aylarında bu məhsulun 1 kiloqramı 4-5 manata təklif olunurdu”.
Günel CƏLİLOVA
