Fransa Olimpiyası İsa və Məhəmməd peyğəmbərlərin hər ikisini təhqir etdi...
Fransanın ev sahibliyi etdiyi Olimpiya Oyunlarının açılış mərasimində "drag queen" (qadın paltarı geyinmiş və makiyajlı kişi) performansı ilə İsa peyğəmbəri hədəf alan “Son Şam yeməyi” səhnəsi təsviri beynəlxalq ictimaiyyət tərəfindən ciddi tənqid edilir. Fransanın bu hərəkəti dini inanclı şəxslər tərəfindən qınanılır.
Qeyd edək ki, xristian və müsəlman ölkələri Fransanın bu hərəkətini sərt şəkildə tənqid edir.
Maraqlıdır, Fransa peyğəmbərləri nə məqsədlə hədəfə alıb? Fransa bununla nə demək istəyib?
Tural İrfan: “Fransanın Həzrət İsanı aşağılaması onu sübut edir ki, yaxın zamanda İslama qarşı açıq mübarizəyə başlayaraq təhqir və vandalizm aktları icra edəcək”
Ilahiyyatçı Tural İrfan “Bakı-Xəbər”ə şərhində bildirdi ki, İsa peyğəmbəri təhqir etməklə Fransa hər şeydən əvvəl dinlərə, mədəniyyətlərə, mənəvi dəyərlərə qarşı qeyri - insani davranışını büruzə verib: “Mütəmadi olaraq Quranı, müsəlmanları, Peyğəmbərimizi təhqir edən Fransa bu işi görməklə guya sübut etmək istəyib ki, təkcə İslamı təhqir etmir, həm də xristianlığı təhqir edir. Bir sözlə, zahiri cəhətdən balansı qorumaq görüntüsü yaratmaq istəyib. Bəs hardadı Fransadakı dini icmalar, xristian kilsələrinin keşişləri? Gərək ciddi etiraz etsinlər. ABŞ başda olmaqla, müsəlmanlara qarşı aparılan səlib yürüşünün ortağı kimi Fransa Ermənistanı da Azərbaycan və Türkiyəyə qarşı İslama görə yönəldir. Fransanın Həzrət İsanı aşağılaması onu sübut edir ki, yaxın zamanda İslama qarşı açıq mübarizəyə başlayaraq təhqir və vandalizm aktları icra edəcək. Bu bir görüntü idi ki, təkcə sizin peyğəmbəri təhqir etmirik, öz peyğəmbərimizi də edirik. Ancaq əsas hədəf müsəlmanlardır. Ona görə ki, İsa peyğəmbər müsəlmanların da peyğəmbəridir.
Bu məsələyə gərək müsəlmanlar, xristianlar birgə etiraz edərək bu əməli boykot etsinlər”.
T.İrfan hesab edir ki, Fransanın apardığı siyasət dünyada sülhü pozur, aqressiya yaradır. Dünyada pozğunçuluq və nifrət aşılayır.
Faiq Ələkbərli: "Fransa hökuməti yalnız peyğəmbərləri və onun həvarilərini deyil, ümumiyyətlə insanlığı hədəf alıb"
AMEA-nın əməkdaşı, türkoloq-alim Faiq Ələkbərli “Bakı-Xəbər”ə şərhində bildirdi ki, bu il Fransanın ev sahibliyi ilə həyata keçirilən Avropa Olimpiya Oyunlarının açılış mərasimində baş verənlər ürəkaçan deyil: "Bu həm bəşəri dəyərlərə, həm də insanların dini, milli inanclarına tərs gəlir. Olimpiya Oyunlarının Parisdəki açılışı göstərdi ki, burda daha çox siyasi məqamlar var. Yəni bir tərəfdə müharibə, bir tərəfdə ekoloji, digər tərəfdə isə mənəvi-psixoloji halla bağlı ciddi problemlər var. Özünü demokratiyanın beşiyi hesab edən Fransa bu işdə öncüllük edir".
Həmsöhbətimiz hesab edir ki, Olimpiya oyunlarının açılış mərasimində Fransanın göstərdiyi şou qeyri-adi məsələ deyil. Əslində digər dinlərə, bəşəriyyətə qarşı yönəlmiş bir addımdır: "İsa peyğəmbər və onun həvarilərini bu cür təqdim edilməsi qəbuledilməzdir. Hazırkı Fransa hökuməti yalnız peyğəmbərləri və onun həvarilərini deyil, ümumiyyətlə insanlığı hədəf alıb. Onlar insanları mənəviyyatsızlığa, əxlaqsızlığa sürükləyir".
F.Ələkbərlinin fikrincə, Fransanın məlum hərəkəti təsadüf ola bilməz: "Fransa bu işin arxasında tək deyil. Dini inancı beynəlxalq səviyyəli bir yarışda bu qədər aşağılamaq düzgün deyil".
Günel CƏLİLOVA
