İran-İsrail “müharibəsi”: Vur - vurum...
Dünya neçə gündür ki, HƏMAS təşkilatının lideri İsmayıl Haniyənin Tehranda sui-qəsd nəticəsində öldürülməsindən sonra yaşanan gərginliklə “nəfəs” alır. Daha doğrusu, yalançı “gərginlik”, söz atışması tamaşasından bezib, təngə gəlib. Bilmək olmur kim yalandır, kim gerçək. Öz paytaxtında olduqca önəmli siyasi fiquru güdaza verən İran rejimi neçə gündür ki, İsraili hədələyir, “dəhşətli qisas” saatlarının yaxınlaşdığını elan edir, hətta İran televiziyası bir neçə saatdan sonra İran və İsrail arasında qan-qadalı “böyük buluşma” olacağını elan edir... amma farsların öz sözləri ilə desək, çi fayda. Ortada nə müharibə var, nə də burunu qanayan. Sadacə, “vur-vurum” tamaşası. Dəhşətlisi odur ki, sui-qəsdin üstündən artıq neçə günlər keçib, İran dövləti beş-üç farsı zindana atmaqdan başqa HƏMAS liderinin qatilini, bu qətlin sifarişlərinin konkret adlarını belə açıqlamayıb. Ümumu olaraq rəsmi Təl-Əvivi hədəf göstərməkdən başqa ortada konkret hüquqi qiymət yoxdur. Əlbəttə, Tehranın ortasında, güclü mühafizə olunan bir yerdə HƏMAS liderini kimsə əlini sallaya-sallaya gəlib öldürə bilməzdi. Bu işdə daxildəki qüvvələr də lokomotiv rolunu oynayır. Heç şübhəsiz ki, İrandakıların da barmaqları İ.Haniyənin qanına bulaşmış kimi görünür. Əlbəttə, İran rejiminin buna nə dərəcə “dobro” verib-verməməsindən asılı olmayaraq...
Olduqca diqqətçəkən bir fakt var. Nədənsə zaman-zaman belə sui-qəsdlər, kimlərinsə aradan götürülməsi daha çox Tehranın “qismətinə düşür”. Açıq şəkildə demək lazımdır ki, sabiq İran Prezidenti İbrahim Rəisinin və komandasının “dumanlı havada necə itdiyi” də müəmma olaraq qalır. Üstəlik, İsrailə qarşı radikal münasibəti olan HƏMAS liderinin iranlıların gözləri qarşısında öldürülməsi bütün diqqətləri artıq İsrailin deyil, məhz İranın üzərinə cəmləyir. Rəsmi Tehranın guya İ.Haniyənin uzaqmənzilli raket hücumu nəticəsində öldürüldüyü barədəki tam savadsız məlumatı onu daha da gülünc vəziyyətə qoyub. Çünki bununla bağlı dağıntı və dəqiq video fakt da ortada yoxdur. Sanki antik dövrlərdə baş verən hadisə barədə məlumat yayırlar. İran belə situasiyalarda özünü möhkəm itirir ki, bu da real vəziyyəti tez büruzə verir. 2020-ci ilin yanvarında iranlı general Qasim Süleymaninin Bağdadda öldürülməsindən sonra İran hakimiyyəti necə həyəcanlanmışdısa, Tehrandan qalxan sərnişin təyyarəsini yerlə yeksan etmişdi. O zaman xeyli Ukrayna vətəndaşı da İranın bu “çevikliyinin” qurbanı olmuşdu...
Amma HƏMAS liderinin Tehranda öldürülməsi həm də məhz İranın özünün bu təşkilata və İ.Haniyəyə olan münasibətini də gündəmə gətirir. Açıq görünür ki, HƏMAS liderinə qarşı hücum ya yaxın məsafədən, ya da binanın daxilindən həyata keçirilib. Bu da İranda İsrailə bağlı casus şəbəkəsinin varlığına dair ciddi suallar yaradır. Ələlxüsus da nəzərə alsaq ki, İ.Haniyə sui-qəsdə məruz qalarkən məskunlaşdığı bina Prezident Pezeşkianın iqamətgahından 700-800 metr aralıda yerləşir, deməli, bu hadisə hər şeydən əvvəl birinci İranın nüfuzuna xələl gətirir.
Xatırladaq ki, məhz İran liderinin şəxsən İ.Haniyəni qəbul edib “xeyir-dua” verməsindən sonra keçən ilin oktyabrında HƏMAS bir gecədə İsrailə 500 raket atmışdı və hər iki tərəfdən ölən və yaralananların sayı rekord həddə idi. Xüsusilə, bu hücumdan sonra İsrail Qəzzada müsəlmanlara qarşı xüsusi qəddar əməliyyat aparmışdı. O zaman Qəzzada inildəyən körpələrə görə İrandan bir nəfər çıxıb İsrail tanklarının, raketlərinin qarşısına çıxmadı. Hələ indiyə kimi Qəzzada günahsız uşaqları qadınları müdafiə edərkən öldürülən bir nəfər iranlıya və ya başqa bir müsəlmana rast gəlinməyib. Bunlarınkı qızışdırmaqdır. Qızışdırırlar, əvəzini günahsız uşaqlar və qadınlar qanları-canları bahasına ödəyir. Qızışdırıb sonra kənarda durmaq taktikası deyərlər buna...
Bir başqa tərəfdən çox güman ki, İranın artıq HƏMAS-la bağlı başqa planları var və Tehranda öldürülən İ.Haniyə bu planlarda yer almırdı. Tehranın HƏMAS-ın hərbi qanadının lideri Xalid Məşələ “stavka” edəcəyi də verilən məlumatlar sırasındadır. Belə görünür ki, İranın israilə qarşı qisas planı “vur-vurum” tamaşasından o tərəfə keçəsi deyil. Həmişə olduğu kimi gizli oyunlar, yalançı bəyanatlar və SÖZ OYUNU....
Mətləb Salahov
