İranın İsrailə "intiqam hücumu" planı ortaya çıxdı - İsrailin iki şəhəri, rəsmilərin iqamətgahları da vurulacaq...
HƏMAS lideri İsmayıl Haniyənin Tehranda öldürülməsi, ardından İranın İsraili hədələməsi bölgədə gərginliyi daha da artırıb. İran və bölgədə dəstəklədiyi silahlı qruplar sui-qəsddən sonra “intiqam alacaqlarına” söz veriblər.
Dünən axşam İranın bütün telekanalları normal yayımı dayandırıb hərbi marş çalmağa başlayıblar, Dövlət Televiziyası isə “Dünya yaxın saatlarda çox mühüm hadisələrin şahidi olacaq” mesajını paylaşıb.
Bütün bunların ardından ABŞ bölgəyə əlavə döyüş təyyarələri və döyüş gəmiləri göndərmək qərarına gəlib. Digər tərəfdən bir çox ölkənin hava yolu şirkətləri Beyrut və Təl-Əvivə uçuşları dayandırdıqlarını açıqlayıblar.
İranın təhdidlərinə baxmayaraq hələlik heç bir hücum baş verməyib, lakin bölgədə vəziyyət kritik olaraq qalır.
İranın dini lideri Əli Xamneyinin nümayəndəsi tərəfindən idarə olunan “Kayhan” qəzeti bugünkü sayında İranın aprel ayında İsrailə qarşı keçirdiyi və İsrail şəhərlərindən kənarda bir neçə bazanı hədəf alan əməliyyatı xatırladıb.
Qəzetdə “Haniyənin intiqamını almaq üçün geri sayım başladı” başlıqlı məqalə manşet yazısı olub. Yeni əməliyyat zamanı, əvvəlkindən fərqli olaraq, İsrailin Təl-Əviv və Hayfa kimi ölkənin dərinlikdəki bölgələri, strateji mərkəzləri və Haniyənin qətlində rolu olan İsrail rəsmilərinin iqamətgahlarının hədəf alınacağı bildirilib. Qeyd edilib ki, növbəti əməliyyat daha müxtəlif, səpələnmiş və qarşısıalınmaz olacaq.
Qəzetə görə, Tehranın İsrailə qarşı cavab əməliyyatında uzaqmənzilli və dəqiq raketlər, pilotsuz uçuş aparatları mütləq masadakı variantlar arasında yer alacaq. Lakin bu hücum apreldə İsrailə edilən hücumdan fərqli olaraq, 1500 kilometr uzaqlıqdan və yalnız İrandan atılan iki və ya üç növ raket və pilotsuz təyyarə ilə məhdudlaşmayacaq.
Qeyd edilir ki, İsrailin iqtisadi hədəfləri və Hind okeanından Aralıq dənizinə gedən İsrail gəmiləri də ağır hərbi hücumların hədəfi olacaq.
“Kayhan” qəzeti onu da yazır ki, yaxınlaşan cavab əməliyyatında İran ordusu strateji zərərlə yanaşı, “ağrılı insan itkiləri”ni də nəzərə almalıdır.
Qeyd edək ki, rəsmi Təl-Əviv də İran və bölgədə dəstəklədiyi silahlı qrupların bir neçə istiqamətdən İsrailə hücum edəcəyini gözləyir.
TAHİR
