İlham Əliyev ukraynalı jurnalistə bu incə mesajı vermək istədi...
Təbriz Musayev: “Prezidentin arqumentləri reallığa əsaslanır”
Prezident Əliyev Şuşada Media Forumunda Ukraynadan olan jurnalistin sualını cavablandırarkən dedi ki, bütün dünya mediası sizin tərəfinizdədir, amma bu, heç də müharibənin dayandırılması üçün kifayət etmir:
“Mediaya gəldikdə, hazırda Ukrayna daha yaxşı vəziyyətdədir. Çünki Qərb mediası sizin tərəfinizdədir. Yəni, bu gün CNN, BBC, “France24”, hətta yapon mediası, Koreya mediası, bütün Qərb və digər media kanalları sizi dəstəkləyir. Bu, bizim vəziyyətdən tamamilə fərqlidir. Yenə də deyirəm, bu gün bütün dünya mediası sizin tərəfinizdədir. Ancaq görürsünüz ki, bu, heç də müharibənin dayandırılması üçün kifayət etmir. Oksforddakı tədbirlərdə Ukrayna mövzusuna böyük vaxt ayrılmışdı. Mən deyə bilərəm ki, həm açılışda və həm bağlanış sessiyasında, həm plenar sessiyada liderlərin çıxışlarının 90 faizi Ukraynaya həsr edilmişdi. Ona görə bu gün sizin çox güclü dəstəyiniz var. Ancaq yenə də bu, müharibənin dayandırılması üçün kifayət deyil”.
Əslində Prezident Əliyev bununla çox incə siyasi gediş edərək Ukraynaya dolayı da olsa çıxış yolunu göstərmiş oldu. Yəni təkcə xarici media dəstəyi yetərli deyil, digər yollar tapılmalıdır. Məsələn, Azərbaycan Birinci Qarabağ müharibəsində ciddi torpaq itkisinə məruz qaldı və 1994-cü ilin mayında Ermənistanla atəşkəsə gedərək səbrlə öz məqsədlərinə doğru getdi. Güclü ordu yaradaraq 26 il sonra ərazilərini işğaldan azad etdi.
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayev hesab edir ki, Prezidentin arqumentləri reallığa əsaslanır: “Bəli, təkcə xarici media dəstəyi yetərli deyil. Ukraynaya nəinki xarici media, bütün növ dəstək verilir. Qərb Ukraynaya hərbi, siyasi, iqtisadi, maliyyə və digər dəstəyi göstərir. Ancaq bütün bunlara baxmayaraq, Ukrayna Rusiyanın təcavüzünü tam dayandıra bilmir. Niyə? Ona görə ki, qüvvələr nisbəti arasında böyük fərq var. Rusiyanın əhalisi Ukrayna əhalisindən 3 dəfə çoxdur. Hərbi resursları qat-qat böyükdür. Rusiya dünyada ərazisinə görə birinci olduğu üçün strateji dərinlikləri böyükdür. Bu gün həqiqətən də Ukraynanın vəziyyəti ağırdır. Çünki 2 il 6 aydır amansız müharibə gedir. Bu müddət ərzində 10 milyon nəfər qaçqın düşüb, ölkənin şəhərləri, kəndləri viran qoyulub. Enerji infrastrukturuna ciddi zərər dəyib. Əfsuslar olsun ki, Qərbin Ukraynaya silah yadımında gecikmələr və həmin silahların istifadəsinə qoyulan məhdudiyyətlər də belə ağır vəziyyətin yaranmasında az rol oynamayıb. İndinin özündə də bəzi Qərb ölkələri müəyyən silahları Ukraynaya vermir. Ona görə də dövlətçiliyi qorumaq və ayaqda durmaq üçün hansısa atəşkəs razılaşmasına getmək məğlub olmaq demək deyil. Bu, yenidən toparlanmaq üçün vaxt qazanmaq deməkdir. Düzdür, Rusiya Ermənistan deyil və arada müqayisəolunmaz fərq var. Ancaq atəşkəs dövründə geosiyasi vəziyyət Ukraynanın xeyrinə dəyişə bilər. Kimin ağlına gələrdi ki, 1989-cu ildə “soyuq müharibə” bitəcək, iki alman dövləti birləşəcək? Heç kimin, amma bu, baş verdi. Üstəlik, Putin bütün ömrü boyu hakimiyyətdə qalan deyil ki... 1994-cü ildə Azərbaycan ağır şərtlər altında atəşkəsə imza atanda bizə heç media dəstəyi də yox idi. Böyük dövlətlər bir dəfə olsun belə təcavüzkar Ermənistanı qınamadılar. Əksinə erməniləri himayə edirdilər. Ancaq biz zamanla öz məqsədimizə nail olduq”.
Vidadi ORDAHALLI
