"Arzulamazdım ki, Facebook belə addımlar atsın" - Facebook-un "Bakı-Xəbər”in yazılarını silməsinə Mətbuat Şurası reaksiya verdi
“Bu cür fikirlərin silinməsi ifadə azadlığına məhdudiyyətdir, ifadə azadlığını boğur”
“Bakı-Xəbər qəzetinin, eləcə də onun baş redaktoru, Mətbuat Şurasının İdarə Heyətinin üzvü Aydın Quliyevin Facebook səhifəsini izləyirəm. Aydın müəllim həmişəki kimi beynəlxalq məsələlərlə bağlı çox maraqlı və obyektiv təhlillər paylaşır. Bu təhlillərin silinməsindən açıq-aşkar görünür ki, bu kiminsə, hansısa qüvvələrin xoşuna gəlmir, onları təmin etmir. Bu baxımdan, əlbəttə, burada siyasi məqamlar mövcuddur. Facebook sosial şəbəkəsi belə məsələlərdə həssas olmalıdır. Nələrinsə xatirinə obyektiv fikirlərə çərçivə qoymalı deyil.
Bu fikirləri “Bakı-Xəbər”ə açıqlamasında Mətbuat Şurasının sədri Rəşad Məcid “Bakı-Xəbər” qəzetinin eyni adlı saytından (baki-xeber.com) paylaşılan yazıların sosial mediada, əsasən də Facebookda dərhal və səbəbsiz olaraq silinməsinə münasibət bildirərkən deyib.
R.Məscid bildirdi ki, bu təkcə “Bakı-Xəbər”lə bağlı deyil, ümumiyyətlə bir çox mətbu orqanlarla da bağlı Facebookda analoji problem yaşanır.
“Son günlər mən də bir neçə dəfə bu halla rastlaşdım. Müxtəlif insanlar bizə müraciət edib statusların, fikirlərin Facebookdan silindiyinin səbəbi ilə maraqlanıb. Mətbuat Şurasının İdarə Heyətinin üzvü, bu sahə üzrə mütəxəssis Fərid Pərdəşünasla da fikir mübadiləsi apardım. Fəridin dediyinə görə, Facebook bəzi ölkə adlarına və sözlərə yasaq qoyub. Ümumi götürdükdə, sizin fikirlərinizdən hiss olunur ki, ola bilsin, doğrudan da Avrokomissiya ilə sosial şəbəkə platformaları rəhbərləri arasında belə bir sövdələşmə var, Fransa və bəzi ölkələr Facebook sosial şəbəkəsinə təsir göstərirlər, burada hansısa məhdudiyyətlər yaradırlar.
Deməzdim ki, bu tək Azərbaycana qarşıdır. Müşahidə etdiyimizə görə, digər məqamlar da var. Hər halda, bunu Facebook tərəfindən senzuranın bir variantı saymaq olar. İnanmaq istəmirəm və arzulamazdım ki, məhz Azərbaycan seqmentinə bu sərt münasibət göstərilir. Ola bilsin, ümumi Facebookun prinsipləridir və bu prinsiplər qəbul olunandan sonra bütün ölkələrdə bu cür məhdudiyyətlər tətbiq olunur. İndi bunu onlar, əlbəttə, başqa daha humansit məqamlarla əsaslandıra bilərlər, hansısa kin-nifrətin, qarşıdurmanın qarşısını almaq üçün belə etdiklərini söyləyə bilərlər. Amma bütün hallarda bu cür fikirlərin silinməsi ifadə azadlığına məhdudiyyətdir, ifadə azadlığını boğur”.
R.Məcid qeyd etdi ki, sosial şəbəkələrin üstünlükləri barədə çox danışırıq. “Facebook mənim ən çox istifadə etdiyim və hörmət etdiyim sosial şəbəkədir. Arzulamazdım ki, Facebook belə addımlar atsın”-deyə R.Məcid əlavə etdi.
Qeyd edək ki, bir müddətdir “Bakı-Xəbər” qəzetinin eyni adlı saytından (baki-xeber.com) paylaşılan yazılar sosial mediada dərhal və səbəbsiz olaraq silinir. Bu, xüsusilə də Facebook sosial platformasında daha açıq formada müşahidə edilir. Belə ki, “Bakı-Xəbər”in Facebook hesabında Fransa ilə bağlı paylaşılan materiallar dərhal silinir. Sözügedən yazılarda Fransada Makron rejiminin xarici siyasəti, eləcə də bir çox ölkələrə qarşı müstəmləkəçilik və zorakı siyasəti ciddi tənqid olunur.
Facebook bu istiqamətdə yazılan məqalələri dərhal və guya “İcma standartlarının pozulması” kimi dəyərləndirərək silir. Platformanın prosedur qaydalarına uyğun olaraq dəfələrlə edilən etirazlara isə heç bir cavab verilmir. Bu cür hallar, xüsusilə iyun, iyul aylarında daha çox müşahidə edilib.
Bütün bunlar Azərbaycan mediasına qarşı açıq-aşkar senzura tətbiq edildiyini göstərmirmi? Bu yaxınlarda İlon Mask da demişdi ki, Avropa Komissiyası sosial şəbəkə platformalarının rəhbərləri ilə sövdələşməyə gedib. Bu, Avrokomissiya ilə həmin sosial platformalarlara gizli senzura sövdələşməsinin nəticəsi olaraq özünü göstərir. Bizə qarşı çirkin addım da özlərini demokrat və söz azadlığının müdafiəçiləri kimi qələmə verən Facebook-Avrokomissiya-Makron üçlüyünün Azərbaycan mediasına qarşı sövdələşdiyini çılpaqlığı ilə ortaya qoyur…
İradə SARIYEVA
