Facebook-Avrokomissiya-Makron üçlüyü "Bakı-Xəbər"dən qisas alır...
İlon Maskla Avrokomissiyanın münaqişəsi Azərbaycan mediasına ziyan vurur
Mətləb Salahov: “Avropa İttifaqı informasiya azadlığı üçün ən böyük maneəyə çevrilir”
Bir müddət əvvəl amerikalı iş adamı, "Tesla"nın qurucusu və X sosial şəbəkəsinin sahibi İlon Mask açıqlama verərək bildirib ki, Avropa Komissiyası (Avropa Birliyi) sosial media rəhbərlərinə qanunsuz məxfi sövdələşmə təklif edib. Maskın sözlərinə görə, təklifə əsasən, əgər sosial mediada söz azadlığına sakitcə senzura qoysalar, Avrokomissiya onları cərimələməyəcək.
İ.Mask digər sosial platformaların bu qanunsuz razılaşmanı qəbul etdiyini, X sosial şəbəkəsinin isə buna qarşı çıxdığını deyib.
Artıq bu, Azərbaycana münasibətdə hiss olunmağa başlayıb. Bir müddətdir “Bakı-Xəbər” qəzetinin eyni adlı saytından (baki-xeber.com) paylaşılan yazılar sosial mediada dərhal və səbəbsiz olaraq silinir. Bu, xüsusilə də Facebook sosial platformasında daha açıq formada müşahidə edilir. Belə ki, “Bakı-Xəbər”in Facebook hesabında Fransa ilə bağlı paylaşılan materiallar dərhal silinir. Sözügedən yazılarda Fransada Makron rejiminin xarici siyasəti, eləcə də bir çox ölkələrə qarşı müstəmləkəçilik və zorakı siyasəti ciddi tənqid olunur.
Facebook bu istiqamətdə yazılan məqalələri dərhal və guya “İcma standartlarının pozulması” kimi dəyərləndirərək silir. Ancaq platformanın prosedur qaydalarına uyğun olaraq dəfələrlə edilən etirazlara isə heç bir cavab verilmir. Bu cür hallar, xüsusilə iyun, iyul aylarında daha çox müşahidə edilib.
Bütün bunlar Azərbaycan mediasına qarşı açıq-aşkar senzura tətbiq edildiyini göstərir. Bu həm də İlon Maskın ifşa etdiyi Avropa təsisatlarının sosial platformalarlara gizli senzura sövdələşməsinin nəticəsidir.
“Bakı-Xəbər”ə qarşı bu çirkin addım da özlərini demokrat və söz azadlığının müdafiəçiləri kimi qələmə verən Facebook-Avrokomissiya-Makron üçlüyünün Azərbaycan mediasına qarşı sövdələşdiyini çılpaqlığı ilə ortaya qoyur. Bu həm də Avropa təsisatlarının əslində söz azadlığına nə qədər dözümsüz yanaşdığını təsdiqləyir.
“Biz onların apardığı çirkin sövdələşmənin nümunələrindən birini baki-xeber.com saytında Fransanın siyasətini tənqid edən yazıların Facebookda paylaşılan kimi dərhal silinməsində də görürük”
Jurnalist-ekspert Mətləb Salahov “Bakı-Xəbər”ə şərhində “Avropa İttifaqı informasiya azadlığı üçün ən böyük maneəyə çevrilir. Avropa İttifaqı (Avrokomissiya) rəhbərlərinin heç bir məntiqə sığmayan bu addımı ilk növbədə illərdir yalançı şüara çevirdikləri "demokratiya prinsipləri"nə daban-dabana ziddir. Öz siyasi məqsədləri üçün informasiya sektorunu alətə çevirmək, milyonlarla insanın informasiya azadlığını həbs etmək, insan hüquq və azadlıqlarını barbarcasına tapdalamaq, görünür, bu təşkilat başbilənləri üçün artıq əsas hədəf halını alacaq. Onların bu son addımları qətiyyən heç bir məntiqə sığmır. Bəs illərdir iyrənc şüara çevirdiyiniz, sözünüzə baxmayan müstəqil ölkələrə qarşı əlinizdə qalxana çevirdiyiniz "insan hüquq və azadlıqları başlıca məsələdir" prinsipi harda qaldı?
Sosial şəbəkələrdən, informasiya portallarından, başda Fransa olmaqla, Avropa İttifaqı rəhbərliyinin ikili standart siyasətini tənqid edən yazıların yoxa çıxardılması artıq Avropa qitəsindəki siyasi rejimlərin bütün hədləri keçdiyini, heç bir sərhəd tanımadıqlarını ortaya qoyur. Əgər bu gün Avropa İttifaqı 30 ildir Azərbaycan torpaqlarını işğal altında saxlamış mürtəce Ermənistanı yenidən qisas əməliyyatlarına sövq edirsə, qanlı qisas planı və hərbi təxribat üçün 270 milyon avrosundan keçirsə, demək ki, ən iyrənc yollar artıq bunlar üçün məqbul variantdır”-deyə bildirdi.
M.Salahov qeyd etdi ki, siyasi imici yerlə yeksan olmuş, Parisdə keçirilən Olimpiya Oyunlarında fransızların fitə basdıqları Emmanuel Makronun siyasi iyrənclikləri üçün informasiya azadlığını bu şəkildə tapdalamaq açıq-aşkar barbarlıqdır. İlon Maskın etiraf etdiyi kimi Aİ rəhbərliyi sosial şəbəkələrdə belə iyrənc oyunlara əl atırsa, bu o deməkdir ki, bu mürtəce təşkilat dünyadakı milyonlarla insanın informasiya azadlığı üçün də ən böyük maneəyə çevrilməkdədir".
M.Salahovun sözlərinə görə, baki-xeber.com saytında gedən, Fransanı, Makronun mənfur siyasətini tənqid edən yazıların Facebook tərəfindən silinməsi Avropa Birliyinin, onun əsas təsisatlarından olan Avropa Komissiyasının iç üzünü ifşa edir. “Biz onların apardığı çirkin sövdələşmənin nümunələrindən birini baki-xeber.com saytında Fransanın siyasətini tənqid edən yazıların Facebookda paylaşılan kimi dərhal silinməsində də görürük. Makronun apardığı irticaçı siyasəti tənqid edilən yazıların dərhal sosial platformalar, xüsusilə də Facebook tərəfindən silinməsi açıq göstərir ki, Avropa Birliyi həqiqətən də sosial şəbəkə rəhbərləri ilə sövdələşməyə gedib. Belə olmasaydı, baki-xeber.com saytında gedən yazılar paylaşılarkən Facebook onları silməzdi. Bu, əlbəttə, söz azadlığına böyük əngəl törədən amildir” - deyə M.Salahov əlavə etdi.
İradə SARIYEVA
