Rusiya-Ermənistan ticarəti barədə İlham Əliyevin sualı hələ cavabsızdır...
Firdovsi Şahbazov: “Qərb mediası nədənsə bunun səbəblərini araşdırmaq istəmir”
Prezident İlham Əliyev Şuşada Media Forumunda sualları cavablandırarkən qeyd edib ki, Azərbaycanla Rusiya arasında ticarət dövriyyəsinin artması bu ölkənin Ermənistanla artan ticarət əlaqələri kimi deyil.
Ölkə başçısı bunu belə əsaslandırıb: “Ticarət dövriyyəsi artır. Rusiya ilə Ermənistan arasında olduğu kimi deyil. Bildiyiniz kimi, Rusiya ilə Ermənistan arasında ticarət dövriyyəsi son iki ildə 5 dəfə artıb, 1,5 milyard dollardan 7,3 milyard dollara çatıb. Bu, bizə çox maraqlıdır. Maraqlıdır ki, Ermənistan nəyin hesabına öz ixracını bu qədər artıra bilib. Bu, necə deyərlər, ritorik sualdır. Ancaq bizim ticarət dövriyyəmiz son bir ildə təxminən 17 faiz artıb - 4 milyard 300 və ya 4 milyard 400-ə bərabər olub. Bu, sabit artımdır”.
“Avroittifaq strukturlarında Rusiya-Ermənistan ticarət əlaqələrinin arxasında dayanan məqamlar gündəmə gətirilmir”
Sözügedən məsələyə aydınlıq gətirən iqtisad üzrə fəlsəfə doktoru Firdovsi Şahbazov “Bakı-Xəbər”ə açıqlamasında qeyd etdi ki, əslində Prezident Əliyev bununla dünyaya ciddi mesaj vermiş oldu: “Prezident açıq şəkildə bununla işarə etdi ki, Ermənistan sanksiyalardan yayınaraq Rusiya ilə ticarət aparır. Halbuki, bu, Ermənistanı himayə edən Qərbin maraqlarına bilavasitə ziddir. Ancaq işlərinə gəlmədiyi üçün bunun üzərinə getmirlər. Ərdoğan bu günlərdə Qarabağla bağlı bir kəlmə işlətdi. Az qala bütün dünya mediası onun üzərinə gedir. Ancaq elə bir iqtisadi gücü olmayan Ermənistanın Rusiya ilə ticarət dövriyyəsi qısa dövr ərzində 7,3 milyard dollara qalxır, amma bu, Qərbin diqqətini çəkmir. Qərb mediası nədənsə bunun səbəblərini araşdırmaq istəmir. Avropa İttifaqı strukturlarında Rusiya-Ermənistan ticarət əlaqələrinin arxasında dayanan məqamlar gündəmə gətirilmir. Məgər onlar bilmir ki, Ermənistan Rusiyanın sanksiyalardan yayınmasında yaxından iştirak edir? Çox yaxşı bilirlər. Sadəcə, Ermənistanı cəzalandırmaq, bu ölkədən izahat tələb etmək istəmirlər. Əgər bənzər formada Azərbaycanla Rusiya arasında ticarət dövriyyəsi artsaydı, dərhal ölkəmizi hədəf alardılar. Çünki Qərbin Cənubi Qafqaz ölkələrinə münasibətdə sərgilədiyi ikili standartlar, riyakar siyasət ortadadır. Ermənistan sanksiyaya düşən məhsulları birbaşa olaraq Rusiyaya ötürür. Adını da qoyurlar ki, guya bu ölkədən Rusiyaya ixrac artıb. Soruşan yoxdur ki, məgər Ermənistanda mikroçip istehsal olunur? Haradandır bu ixracın mənbəyi? Ona görə də Prezidentin toxunduğu məsələ Ermənistana illərdir qahmar çıxan ölkələrə vurulan bir sillə idi. Yəni kimsə düşünməsin ki, biz nədənsə xəbərsizik. Bir gün Ermənistanın sanksiyalardan yayınmasına göz yumanlar buna görə cavab verməli olacaqlar”.
Vidadi ORDAHALLI
