ABŞ-ın xarici siyasəti dəyişəcək - Departamentin bəyanatı Ermənistanın qorxusunu artırdı...
Azər Həsrət: “Başa düşürlər ki, Tramp onların çaldığı havalara oynamayacaq, bu səbəbdən narahatlıqları artıb”
ABŞ Dövlət Departamenti Amerika administrasiyasında mümkün dəyişiklikdən sonra Vaşinqtonun xarici siyasətinin dəyişdirilməsi məsələsi ilə bağlı qeyd edib ki, hökumətin xarici siyasəti müxtəlif prezident administrasiyaları dövründə dəyişə bilər, lakin ABŞ xarici siyasətinin əsas prinsipləri dəyişməz olaraq qalır.
Bu barədə ABŞ Dövlət Departamenti “Amerikanın Səsi” radiosunun erməni xidmətinin suallarını cavablandırarkən bildirib.
Dövlət Departamenti son Ermənistan-Amerika təlimləri, eləcə də Azərbaycanın onlara reaksiyası ilə bağlı sualları cavablandıraraq qeyd edib ki, rəsmi Vaşinqton Ermənistanla uzunmüddətli tərəfdaşlığa malikdir və buna misal olaraq Kanzas Milli Qvardiyası ilə əməkdaşlıq çərçivəsində sabit əməkdaşlıq edir. ABŞ Müdafiə Nazirliyinin dövlət tərəfdaşlığı proqramı var.
“Birləşmiş Ştatların Azərbaycanla ayrı-ayrı müdafiə və təhlükəsizlik əlaqələri var, o cümlədən çoxmillətli hərbi təlimlərdə əməkdaşlıq mövcuddur, Gürcüstanda bu yaxınlarda keçirilən Çevik Ruh təlimi, NATO-nun Sülh Naminə Tərəfdaşlığı və bir sıra digər ikitərəfli formatlar mövcuddur. Məsələn, ABŞ Müdafiə Nazirliyi Dövlət Tərəfdaşlığı Proqramı” - deyə qeyd olunub.
ABŞ Dövlət Departamenti Cənubi Qafqazdakı vəziyyət, eləcə də regional sabitliklə bağlı məsələlər barədə son brifinq zamanı öz nümayəndəsinin bəyanatını təsdiqləyib: “Ermənistan-Azərbaycan sülh sazişinin bağlanması istiqamətində mühüm irəliləyişə nail olmaqda davam edir və biz bu prosesi dəstəkləməyə hazırıq”.
Dövlət Departamenti ABŞ-da seçkilərdən sonra hakim administrasiyada mümkün dəyişiklikdən sonra Amerikanın Cənubi Qafqazdakı xarici siyasətinin dəyişikliklərə məruz qala biləcəyi sualına da cavab verib və qeyd edib ki, Dövlət Departamenti tərəfsiz bir qurumdur.
ABŞ hökumətinin xarici siyasəti müxtəlif prezident administrasiyalarında dəyişə bilər.
“Lakin ABŞ xarici siyasətinin əsas prinsipləri dəyişməz olaraq qalır, o cümlədən Birləşmiş Ştatlarda və dünyada təhlükəsizlik, demokratiya, rifah və inkişafı təşviq etmək”, - deyə Dövlət Departamenti bildirib.
Ermənilər ABŞ-da prezidentin dəyişməsindən niyə bu qədər narahatdırlar? Bundan nə üçün qorxuya düşüblər? Baydenin, demokratların getməsindən və respublikaçıların hakimiyyətə gəlməsindən nə üçün belə narahatdırlar? Dəqiqə başı bu barədə Dövlət Departamentinə, rəsmi şəxslərə suallar verirlər. “Amerikanın Səsi” radiosunun erməni xidməti yenə də bu barədə Dövlət Departamentinə sual ünvanlayıb. Bunlar niyə əndişədədir? Söhbət ABŞ-dan gedir, baş verənlərin bunlara nə dəxli var?
“Bayden gedəndən sonra Trampın gələcəyi ehtimalının yüksək olduğunu nəzərə alaraq indidən əndişələrini izhar edirlər”
Siyasi şərhçi Azər Həsrət “Bakı-Xəbər”ə “Ermənilər ənənəvi olaraq ABŞ-dan qondarma erməni soyqırımı ilə bağlı dəstək gözləyirlər. Təəssüflər olsun ki, ABŞ-ın hazırkı prezidenti Bayden onlara bu dəstəyi verdi. Amma Tramp və ondan əvvəlki prezidentlər, hətta Barak Obama ermənilərə bu istiqamətdə dəstək vermədilər. Əlbəttə, ona görə də, ermənilər vəziyyətin dəyişəcəyindən yenə də qorxurlar. Yəni Tramp prezident seçiləcəyi təqdirdə daha çox ABŞ-ın içərisinə yönəlik siyasətə üstünlük verəcək. Bu zaman da xaricdə problem yarada biləcək məsələlərdən çəkinəcək. Bu məsələlərdən biri də erməni məsələsidir”-deyə bildirdi.
A.Həsrətin sözlərinə görə, ABŞ qardaş Türkiyə ilə tərəfdaş dövlətdir, NATO-da birlikdədirlər, bizim bölgədə ABŞ Türkiyənin mövqeyini mütləq nəzərə alır. “Arada soyuqluq-filan olmasına baxmayaraq, bütün məsələlərdə ABŞ bölgəmizin bir nömrəli dövləti olan Türkiyənin mövqeyini mütləq hesaba da alır, nəzərə də. Bu da, əlbəttə, erməniləri narahat etməyə bilməz. Ona görə də, Bayden gedəndən sonra Trampın gələcəyi ehtimalının yüksək olduğunu nəzərə alaraq, indidən əndişələrini izhar edirlər. Yəni başa düşürlər ki, Tramp onların çaldığı havalara oynamayacaq, bu səbəbdən narahatlıqları artıb. Bir tərəfdən, reallıqlar faktiki olaraq erməniləri getdikcə daha çox narahat etməyə başlayıb. İkinci bir tərəfdən də, Ermənistanda hazırda hakimi-mütləq olan Baş nazir Nikol Paşinyan da əslində o xətti tutub ki, qədim erməni nağıllarından imtina etsin. Yəni uydurma soyqırımdan, uydurma “Böyük Ermənistandan”, uydurma “dənizdən dənizə Ermənistan”, uydurma “dünyanın ən qədim sivilizasiyası” kimi qondarma məsələlərdən Nikol Paşinyan da yavaş-yavaş imtina edir. Əlbəttə ki, ABŞ-da prezident vəzifəsinə gələcək Tramp bu xətti daha çox dəstəkləyəcək. Ona görə adamlar bundan narahatdırlar. Yəni Tramp prezident seçiləcəyi təqdirdə onların xəyalları, uydurmaları, nağılları suya düşəcək” - deyə A.Həsrət vurğuladı.
İradə SARIYEVA
