Azərbaycanda xaricilərə qarşı terror planlarının xüsusi məqsədləri var...
Şəmsəddin Əliyev: “Xarici ölkə vətəndaşına qarşı terror aktının törədilməsində məqsəd Azərbaycanı beynəlxalq aləmdə nüfuzdan salmaqdır”
Bakı Ağır Cinayətlər Məhkəməsində 38 yaşlı Elşən Nəcəfovun terror aktı hazırlığında ittiham olunması ilə bağlı cinayət işinə baxılır. İş materiallarına əsasən, o, 2023-cü ilin sentyabr ayında Dövlət Təhlükəsizliyi Xidməti (DTX) tərəfindən keçirilən xüsusi əməliyyat zamanı saxlanılıb.
Elşən Nəcəfova qarşı irəli sürülmüş ittihamda qeyd edilib ki, o, xarici ölkə ərazisində yaşayan digər Azərbaycan Respublikası vətəndaşı ilə əlbir olub xarici dövlət rəsmilərinin Azərbaycana səfəri zamanı onlara və Azərbaycanın dövlət və ictimai xadimlərinə qarşı ictimai tədbirlərdə terror hücumu etməyə hazırlıq hərəkətləri edib.
Görəsən, xarici ölkə vətəndaşına qarşı terror aktında məqsəd nədir?
“Ölkəmizə qarşı niyyəti mənfi olanlar Azərbaycanı beynəlxalq aləmdə təhlükəli zona kimi tanıtmaq istəyir, ancaq onların bu istəkləri boşa çıxır”
"Polisə Dəstək” İctimai Birliyinin sədri Şəmsəddin Əliyev “Bakı-Xəbər”ə şərhində bildirdi ki, bu məsələdə siyasi faktorlar var: “Təəsssüf ki, bəzən Azərbaycan dövlətilə hüquqi, siyasi, iqtisadi əlaqəsi olan vətəndaşlarımızın sırasında ölkənin sabitliyinin pozulması, xaotik halın baş verməsi ilə bağlı xarici ölkələrin kəşfiyyatı tərəfindən ələ alınan şəxslər tapılır. Bu qəbildən olan insanlar kifayət qədər iradəsi zəif olan şəxslərdir. Azərbaycan dövlətinə, vətəninə sədəqat nümayiş etdirə bilməyən şəxslər bu cür addım atır. Bu baxımdan hesab edirəm ki, Azərbaycanda sabitliyin və dayanıqlığın davamlı olması digər ölkələrin diqqətini cəlb edir. Beynəlxalq tədbirlərə ölkəmizin ev sahibliyi etməsi Azərbaycanı istəməyən dövlətlər arasında qıcıq yaradır. Bu insanlar müxtəlif yollarla bizim həssas, iradəsi zəif olan vətəndaşlarımızı ələ almaqla ölkədə qeydə alınan sabitliyi pozmaq istəyirlər. Həmin ölkələrin məqsədi odur ki, dünyada Azərbaycana münasibət dəyişsin. Bu baxımdan hesab edirəm ki, xarici ölkə vətəndaşına qarşı terror aktının törədilməsində məqsəd Azərbaycanı beynəlxalq aləmdə nüfuzdan salmaqdır. Ölkəmizə qarşı niyyəti mənfi olanlar Azərbaycanı beynəlxalq aləmdə təhlükəli zona kimi tanıtmaq istəyirlər, ancaq onların bu istəkləri boşa çıxır”.
Həmsöhbətimiz onu da əlavə etdi ki, ölkəmizdə müvafiq qurumların, təşkilatların, aidiyyəti orqanların bu sahədə ayıq-sayıq xidmətləri öz səmərəsini verir.
Günel CƏLİLOVA
