Bakı kəndlərinə yeni avtobus marşrutları üçün müsabiqə başladı...
Məlum olduğu kimi, Azərbaycan Yerüstü Nəqliyyat Agentliyi (AYNA) sərnişindaşıma xidmətinin keyfiyyətinin artırılması ilə bağlı tədbirlər çərçivəsində 142E nömrəli şəhərətrafı (ekspres), 340, 421, 445, 446, 220, 332, 336, 442, 443, 444 nömrəli şəhərətrafı avtobus marşrutlarını müsabiqəyə çıxarır.
Bu barədə AYNA-nın yaydığı məlumatda qeyd edilir. Məlumatda bildirilir ki, müsabiqə “Avtomobil nəqliyyatı haqqında” Qanuna, Nazirlər Kabinetinin 2009-cu il 3 aprel tarixli 52 nömrəli qərarı ilə təsdiq edilmiş “Avtomobil nəqliyyatı ilə müntəzəm şəhərdaxili (rayondaxili), şəhərlərarası (rayonlararası) və beynəlxalq marşrutlar üzrə sərnişin daşımalarına daşıyıcıların cəlb olunmasına dair müsabiqənin keçirilməsi Qaydası”na uyğun olaraq təşkil edilir.
Qeyd edək ki, müsabiqəyə əsas avtobuslarla yanaşı, ehtiyat nəqliyyat vasitələri də təqdim olunacaq.
Maraqlıdır, müsabiqəyə çıxarılan şəhərətrafı avtobus marşrutları ilə bağlı şəffaflıq necə təmin olunacaq? Müsabiqə iştirakçıları üçün hansı tələblər müəyyən olunub?
AYNA: “Zərurət olduqda müsabiqədə ekspertlərin iştirakı təmin olunur”
Azərbaycan Yerüstü Nəqliyyat Agentliyindən (AYNA) “Bakı-Xəbər”ə açıqlamada bildirildi ki, şəhərlərarası (rayonlararası) və şəhərdaxili (rayondaxili) marşrut xətləri qanunvericiliyin tələblərinə uyğun olaraq mərhələli qaydada müsabiqəyə təqdim edilir: “Məqsəd sərnişindaşıma sahəsində göstərilən xidmətin keyfiyyəti, təhlükəsizliyi və rahatlığının artırılması, həmçinin marşrutların təhkim edilməsində şəffaflığın təmin edilməsidir. Müsabiqə “Avtomobil nəqliyyatı haqqında” Qanuna, Nazirlər Kabinetinin 2009-cu il 3 aprel tarixli 52 nömrəli qərarı ilə təsdiq edilmiş “Avtomobil nəqliyyatı ilə müntəzəm şəhərdaxili (rayondaxili), şəhərlərarası (rayonlararası) və beynəlxalq marşrutlar üzrə sərnişin daşımalarına daşıyıcıların cəlb olunmasına dair müsabiqənin keçirilməsi Qaydası”na uyğun olaraq təşkil edilir.
Müsabiqədə iştirak etmək üçün iddiaçılar tələb olunan sənədləri AYNA-ya təqdim edirlər. İddiaçıların təklifləri komissiya tərəfindən müsabiqə keçirilən zaman açıqlanır. İddiaçılar və onların müvafiq qaydada rəsmiləşdirilmiş sənədlə müvəkkil etdikləri səlahiyyətli nümayəndələri komissiyanın iclasında iştirak edə bilirlər. Seçim meyarlarına gəlincə, marşrutda işləmək üçün avtonəqliyyat vasitəsinə texniki xidmət göstərilməsi, onun saxlanılması və təmiri üçün texniki-istehsalat bazası olmalıdır, avtonəqliyyat vasitəsi hər hansı səbəbdən marşrut xəttindən çıxdıqda, onun dəyişdirilməsi üçün təklif olunan tədbirlərin təsviri təqdim edilməlidir, operatorun məsul şəxsi Nazirlər Kabineti tərəfindən peşəkarlıq səriştəsinə dair təsdiq olunmuş proqram üzrə hazırlıq və yenidən hazırlıq keçməlidir. Sürücü heyətinin peşəkarlığı, bu sahədə çalışması, reysin müntəzəmləyinin təmin edilməsi kimi meyarlar da nəzərə alınır. Zərurət olduqda müsabiqədə ekspertlərin iştirakı təmin olunur. Müsabiqənin foto və video çəkilişi aparılır və arxivləşdirilir. Mediada müsabiqənin elan edilməsi və nəticələri barədə məlumat paylaşılır”.
Aslan Əsədov: “Müsabiqəyə çıxarılacaq bir neçə nömrəli şəhərətrafı avtobus marşrutları bu sahədə yaşanan problemləri həll edəcək”
Nəqliyyat eksperti Aslan Əsədov “Bakı-Xəbər”ə açıqlamasında bunları qeyd etdi: “Müntəzəm şəhərətrafı avtobus xətlərinin müsabiqəyə çıxarılması onu deməyə əsas verir ki, hazırda şəhər nəqliyyatının aparıcı infrastrukturunu təşkil edən şəhərətrafı marşrutların tənzimlənməsinə başlanılıb. Bu olduqca yaxşı haldır. Nəzərə almaq lazımdır ki, şəhərətrafı qəsəbələrin sosial rifahının yaxşılaşdırılması və Bakı şəhərinin ümumi Baş Planında nəzərdə tutulan, o cümlədən, şəhərin mərkəzi ilə infrastrukturun inkişafına səbəb olacaq. Gediş-gəlişin asanlaşdırılması bu istiqamətdə müsbət mənada dəyişikliklərdən xəbər verir. Bunun prinsipial həllində məqsəd rahat gediş-gəlişi təmin etməkdir. Uzaq məsafədən gələn vətəndaşlarımız bir yox, bir neçə marşrut dəyişməyə məcbur olurlar. Üstəgəl, onlar uzun məsafəni narahat avtobusda gəlməyə məcbur olurlar. Bunları nəzərə alaraq həmin vətəndaşların da şəhərə daha rahat çatmasını təmin etmək lazımdır. Digər məsələ, şəhərətrafı qəsəbələrdəki yol infrasturkturunun səviyyəsidir”.
Həmsöhbətimiz onu da əlavə etdi ki, hazırda şəhər infrastrukturunun çətinliyi marşrut xətləri ilə bağlıdır. Müsabiqəyə çıxarılacaq bir neçə nömrəli şəhərətrafı avtobus marşrutları bu sahədə yaşanan problemləri həll edəcək: “Müsabiqəyə çıxarılan şəhərətrafı avtobus marşrutları ilə bağlı şəffaflıq təmin olunacaq”.
Günel CƏLİLOVA
