Hökumətin 5-dən 2-yə düşən inflyasiya proqnozu mübahisəli qarşılandı...
Azərbaycan hökuməti builki inflyasiya ilə bağlı proqnozlarını azaldıb. Maliyyə Nazirliyinin məlumatında bildirilir ki, 2024-cü ildə Azərbaycanda orta illik inflyasiya üzrə ilkin proqnoz 5,3% səviyyəsində nəzərdə tutulsa da, yenidən baxılma ilə inflyasiya proqnozu 2,7%-ə qədər azaldılıb.
Maraqlıdır, inflyasiya proqnozu 5.3 faizdən 2.7 faizə azaldılıbmı? Bu nə qədər real rəqəmdi?
Natiq Cəfərli: “Yanacaq qiymətinin dəyişməsi nəzərə alınsa inflyasiyanın 5,3 faizdən 2,7 faizə salınması inandırıcı görünmür"
İqtisadçı ekspert Natiq Cəfərli “Bakı-Xəbər”ə açıqlamasında qeyd etdi ki, Azərbaycanda inflyasiyanın hesablanması qaydasında ciddi dəyişikliyə ehtiyac var: "Məlumat üçün deyim ki, ölkəmizdə inflyasiya 500 adda mal və xidmət üzrə hesablanır. Bu isə vətəndaşların gözləntilərinə və real inflyasiya rəqəmlərinə cavab vermir. Əslində, bir çox ölkələrdə olduğu kimi, ən çox istifadə olunan 30 ərzaq və xidmətlə bağlı ayrıca xidmət göstəricisi hesablansa daha yaxşı olar. Bu, ümumi vəziyyəti daha aydın görməyə imkan yaradacaq. Azərbaycanda inflyasiya ilə bağlı əhalini narahat edən əsas məsələ ərzaq məhsulları inflyasiyasıdır. İndi Maliyyə Nazirliyinin proqnozu iqtisadi nəzəriyyəyə uyğun deyil. Çünki bu yaxınlarda ölkədə benzin və dizel yanacağının qiyməti dəyişdi. Dizelin qiyməti 25 faiz yüksəldi. Dizel yanacağının qiymətinin dəyişməsi həm yükdaşıma, həm aqrar, həm də ərzaq məhsullarının qiymətinə təsir göstərir. Bu səbəbdən də açıqlanan proqnozun nəyə əsasən tərtib edildiyi bəlli deyil. Yanacaq qiyməti nəzərə alınsa inflyasiyanın 5,3 faizdən 2, 7 faizə aşağı salınması inandırıcı görünmür".
Elşad Məmmədli: “İnflyasiya göstəriciləri daha yüksək rəqəmlərlə ifadə olunacaq”
İqtisadçı professor Elşad Məmmədov “Bakı-Xəbər”ə açıqlamasında qeyd etdi ki, ilin sonuna qədər qiymətlərin bir qədər artmasının şahidi olacağıq. Qiymət artımı həm mövsumi xarakter daşıyır, həm də qiymət artımı üçün müvafiq şərait formalaşır: “Yanacağın qiymətinin dəyişməsi, kredit resurslarına çıxış imkanının məhdud olması ilə bağlı istehsalın kifayət qədər geniş həcmdə olmaması idxalın payına təsir edir. Bu kimi amillər idxal inflyasiyasını sürətləndirir. Hesab edirəm ki, 2,7 faiz göstərici ilə inflyasiyanın olması proqnozu reallaşmayacaq. Zənnimcə, inflyasiya göstəriciləri daha yüksək rəqəmlərlə ifadə olunacaq”.
Kamran Məmmədli: “İnflyasiya ilə bağlı pessimist düşünməməliyik, ölkəmizin gələcək iqtisadi inkişafı sabit və stabil formada davam edəcək”
İqtisadçı Kamran Məmmədli “Bakı-Xəbər”ə açıqlamasında bildirdi ki, bu gün ümumi daxilin məhsulun tərkibində qeyri-neft sektorunun payı artır. Bununla yanaşı, gələcəkdə ölkəmizin alternativ və bərpa olunan enerji potensialına geniş imkanlar yaranır, böyük investisiyalar yatırılır: “Bu baxımdan da hesab edirəm ki, inflyasiya ilə bağlı pessimist düşünməmliyik. Ölkəmizin gələcək iqtisadi inkişafı sabit və stabil formada davam edəcək”.
Günel CƏLİLOVA
