Ermənistan Qərbin əsil planlarını anlayanda gec olacaq...
Ermənistanın Qərbin əlində regional maraqların təmin edilməsi üçün bir vasitə olduğu heç kimə sirr deyil. İndi Ermənistanda da etiraf olunur ki, Qərb, xüsusən də Fransa müxtəlif vədlərlə İrəvanı aldatmaqla məşğuldur. Bu xüsusda “Sputnik Armenia” portalı yazır:
“Ermənistanda iqtidarda olan Nikol Paşinyan hakimiyyətinin reytinqlərinin ardıcıl olaraq aşağı düşməsi səbəbindən “Qərb dostlarımız” tərəfindən ölkə vətəndaşlarının “aqressiv şəkildə beyinlərinin yuyulması” getdikcə daha da şiddətlənir.
Ermənistanda informasiya axınının təhlili göstərir ki, “qürurlu vətəndaşların” beyninə üç əsas tərəfdən hücum edilir. Birincisi, guya Türkiyə-Azərbaycan tandemi Ermənistana qarşı müharibə edəcək. İkincisi, amerikalılar “sülh”, avropalılar isə, təbii ki, Ermənistanın müstəqil, suveren və təhlükəsiz ölkə kimi mövcud olmaqdan imtina etməsi müqabilində vətəndaşlara “vizasız” gediş-gəliş sözü verirlər. Üçüncüsü, Ermənistana cüzi maliyyə yardımını (məsələn, Avropa Sülh Fondundan bədnam 10 milyon avro) əlavə etmək lazımdır. Həmçinin, beyin yuyulması üçün Ermənistanın media sahəsinə külli miqdarda dollar yeridilib. Burada məbləğ on milyonlarla dollar təşkil edir. Bütün bunlar isə Ermənistan hökumətinin sadəlövh marketinq hərəkətləri fonunda (velosiped marafonu, ölkənin ali rəhbərlərinin qayğısız selfiləri, Berlində, Londonda qəhvə içmək) daha intensiv xarakter alır. Təbii ki, bütün bunlar, bir tərəfdən, “Qərb üstünlükləri” müqabilində Ermənistanın de-fakto neytrallaşdırılmasına hesablanıb. Digər tərəfdən, bu, Ermənistandakı mövcud gücü yenidən “Qərb faydaları” müqabilində iqtidarda saxlamaq üsuludur. İndi isə bunların real olduğunu göstərmək üçün əslində nə baş verdiyini nəzərdən keçirək. Dövlətin yüksək vəzifəli şəxslərinin təmsil olunduğu Ermənistan hökuməti eksklüziv olaraq “sadəcə yeyin, için, vergi ödəyin, xoşbəxt olacaqsınız” üslubunda təbliğat şouları ilə məşğuldur. Avropalılar Azərbaycanı enerji sektorunda özlərinin strateji tərəfdaşı elan edirlər. Bu durumda bizdə elə bir vəziyyət yaranıb ki, Ermənistanın özü “Qərb üstünlükləri” müqabilində siyasi və ərazi subyektivliyini tamamilə itirməyə doğru sürüklənir. Bu niyə edilir? Doğrudanmı amerikalılar və ya avropalılar başa düşmürlər ki, onların indiki mərhələdə bütün addımları Ermənistan dövlətinin məhvinə gətirib çıxarır? Mən Ermənistan hakimiyyətini xüsusi qeyd etmirəm, çünki onlar sadəcə xarici oyunçuların iradəsinin icraçısıdırlar və artıq xarici diplomatik dövrədə heç nə barədə qərar vermirlər. ABŞ dövlət katibi Entoni Blinkenin dediyi kimi, Qərb vektorunun Cənubi Qafqazda əsas vəzifəsi rusları və iranlıları bölgədən sıxışdırıb çıxarmaq, çinlilərin güclənməsinin qarşısını almaqdır. Türkiyə-Amerika birgə əməliyyatı nəticəsində Ermənistanın mövcudluğunu dayandırması isə, ümumiyyətlə, heç kimi narahat etmir. Ancaq Qərb üçün başqa bir problem də var: Ermənistan əhalisini necə inandırmaq olar ki, özlərinin məhv edilməsi və öz vətənlərinin dağıdılmasında könüllü iştirakçı olsunlar? Vəzifə asan deyil, lakin onlar “Qərbə” inandıqları üçün bu vəzifə tamamilə həll edilə bilər.
Beləliklə, addım-addım təlimatlar var ki, Ermənistanı ermənilərin əli ilə necə məhv etmək olar. Bunu aşağıdakı kimi qruplaşdırmaq olar: 1. Rusiya və İran simasında düşmən obrazı yaratmaq üçün daim anti-Rusiya və İran əleyhinə ajiotaj. 2. Ermənistan hökumətinin bütün uğursuzluqlarında yenə də ruslar və iranlılar günahlandırılır. 3. Vəziyyətin daim gərginləşməsi və ya müharibə ilə şantaj - Ermənistan “bunu-bunu” etməsə, müharibə başlayacaq. 4. Kilsəyə və erməni diasporuna qarşı informasiya, hüquqi və siyasi terror. 5. Erməni kimliyinin əsaslarını (kilsə, mədəniyyət və tarix) gözdən salmaq. 6. “Normal yaşamaq” üçün yeganə fürsət kimi ictimai şüura parazit həyat tərzinin aşılanması. 7. Erməni kimliyinə qarşı dağıdıcı ünsür formasında təbliğat. 8. Ermənistanı dövlətin ideologiyalarını formalaşdıran etnosiyasi vahid kimi erməni xalqına qarşı qoymaq. 9. Şəxsiyyətini və vətənini müəyyən üstünlüklərlə mübadilə etməyə yönəlmiş təbliğat üçün şərait yaratmaq (Amerika yardımı və ya Avropa ilə vizasız səyahət). 10. Cəmiyyətdə ölkənin ərazi və siyasi itkilərinə alternativin formalaşması. 11. Ölkədə müxtəlif sosial qruplar arasında “zəhərli” qarşılıqlı düşmənçilik mühitinin yaradılması. 12. Erməni cəmiyyətində Türkiyə-Azərbaycan tandeminin düşmən obrazını saxlamaq. Cənubi Qafqaz regionunda bir etnosiyasi vahid kimi Ermənistan Respublikasını məhv etmək üçün qısa “təlimat” təxminən belə görünür”. Bütün bunlar Qərbin Ermənistanla bağlı fəaliyyətinin bu ölkə üçün çoxsaylı problemlər vəd etdiyini göstərir. Ermənistanın hakim dairələrinin, eləcə də onlara yaxın ekspert və politoloqların təbliğatı budur ki, ölkə ilə Qərb arasında əməkdaşlığın dərinləşməsi birincinin dövlətçiliyinin təşviqi üçün son dərəcə vacibdir. Amma Qərb anti-Rusiya cəbhəsinin növbəti məkanı qismində Cənubi Qafqazı seçib və mövcud seçimdə Ermənistanın xidmətlərindən bəhrələnməyə çalışır. Amma Ermənistan rəhbərliyi ölkənin məhvə doğru getdiyinin də fərqində deyil.
Nahid SALAYEV
