MSK ilə bağlı YAP-a da xəbərdarlıq göndərilib?..
Bəhruz Quliyev: “Bu gün fors-major hal kimi MSK-nın tam tərkibinin yenidən formalaşmasına zərurət yoxdur”
Sentyabrın 1-də ölkəmizdə növbədənkənar parlament seçkiləri keçiriləcək. Hazırda seçkiyə hazırlıq prosesi gedir və bir sıra prosedurlar həyata keçirilir, namizədlərin qeydiyyata alınması davam edir, qarşıda namizədlərin təbliğat-təşviqat kampaniyası və sair məsələlər var. Bu öz yerində.
Son vaxtlar belə məlumatlar dolaşır ki, MSK üzvləri tam tərkibdə yenilənəcək və hətta YAP-a da xəbərdarlıq edilib ki, MSK-ya yeni üzvlərini versin.
Ümumiyyətlə, seçki kampaniyasının gedişində MSK-nı tam tərkibdə dəyişmək siyasi və hüquqi baxımdan nə qədər mümkündür?
“Kiminsə MSK üzvlərinin bu vəziyyətdə dəyişməsi ilə bağlı iddiası cəfəngiyatdır”
“SƏS” Media Qrupunun rəhbəri, politoloq Bəhruz Quliyev “Bakı-Xəbər”ə bildirdi ki, Azərbaycanda seçki mühiti sağlamdır, şəffafdır və namizədlər seçkidə iştirak etmək hüququndan istifadə edirlər. “Seçki Məcəlləsində nəzərdə tutulmuş qaydada, hüquqi akta uyğun olaraq hər bir vətəndaş seçki prosesində hər hansı formada iştirak edə bilər. Söhbət 18 yaşı tamam olanlardan gedir. Buna da heç bir əngəl yaradılmır. Hər kəsin də seçmək, seçilmək hüququndan istifadə etmək üçün münbit şərait var. İlk növbədə demək istəyirəm ki, Azərbaycanda kimin nə deməyindən, hansı böhtan atmağından asılı olmayaraq, tam demokratik, şəffaf mühit formalaşıb və bu proses də davam edir.
MSK-nın üzvlərinin dəyişilməsi barədə deyilənlərə gəlincə, qeyd edim ki, hər parlament seçkilərindən sonra partiyalar tərəfindən və müstəqil qaydada, bitərəf kimi təqdim edilən üzvlər arasından parlament MSK üzvlərini təsdiq edir. Hər dəfə yeni seçilən parlament növbəti MSK-nın tərkibini formalaşdırır. Bu gün isə fors-major hal kimi MSK-nın tam tərkibinin yenidən formalaşmasına zərurət yoxdur. Əgər MSK-nın bir neçə üzvü dünyasını dəyişərsə, yaxud xəstələnərsə, iş qabiliyyətini itirərsə, səhhəti ilə əlaqədar MSK-nın iclaslarında iştirak edə bilməmək məcburiyyətində qalarsa, yəni səsvermədə kvorum olmazsa, onda məsələyə hər hansı formada baxıla bilər. Amma bugünkü vəziyyətdə buna ehtiyac duyulmur. Bilirsiz ki, parlament son iclasını keçirdi və parlament heç vaxt bu gün üçün yenidən MSK-nı formalaşdırmaq səlahiyyətində deyil. Kiminsə MSK üzvlərinin bu vəziyyətdə dəyişməsi ilə bağlı iddiası cəfəngiyatdır”-deyə B.Quliyev qeyd etdi.
Onun sözlərinə görə, gələcəkdə MSK-ya təqdim edilən üzvlərə baxıla, tərkib dəyişilə, yenilənə bilər, bu da partiyalardan, bitərəf qaydada öz namizdəliyini irəli sürənlərdən aslıdır. “Burada bir qanunsuzluq yoxdur. Burada qanunsuz nə var ki? Məsələn, YAP da təqdim etdiyi siyahıda hər hansı MSK üzvünü saxlaya, ya da yeni bir üzv verə bilər. Bu da YAP-ın öz hüququdur. Kimin nə deməsindən aslı olamayaraq, bu məsələ hazırda gündəmdə deyil. Yəqin ki, seçkidən sonra bu məsələlərə bir də baxılacaq”-deyə B.Quliyev əlavə etdi.
İradə SARIYEVA
