Macarıstana AB və NATO-dan çıxmaq təklif edildi... Üstəlik, Rusiya ilə ittifaq...
Ramil Məmmədli: “Bu fəallıq Avropanın lider ölkələri olan Almaniya və Fransanı qane etmir”
Polşa Xarici işlər nazirinin müavini Teofil Bartoşevski deyib ki, Macarıstan Rusiya ilə ayrıca birlik yaratmaq üçün Avropa İttifaqı və NATO-dan çıxmaq imkanlarını nəzərdən keçirməlidir:
“Həqiqətən başa düşmürəm ki, Macarıstan niyə sevmədiyi və guya ona pis münasibət bəsləyən təşkilatların (Aİ, NATO) üzvü kimi qalmaq istəyir? Niyə Macarıstanın Baş naziri Viktor Orban Rusiya Prezidenti Vladimir Putinlə ittifaq yaratmır?
Diplomat xatırladıb ki, Polşa, Macarıstandan fərqli olaraq, Rusiya ilə heç bir iş görmür və Orbanın siyasəti səbəbindən onun ölkəsi artıq beynəlxalq ictimaiyyətdən kənarda qalıb.
Polşa diplomatının bu reaksiyasına Orban belə cavab verib:
“Aİ və Qərbin Moskvaya qarşı siyasəti məntiqsizdir. Çünki Rusiya, böyük ərazilərinin olmasına baxmayaraq, yaxşı idarə edilən bir ölkədir. Rusiyanın neostalinist avtokratiya kimi təsvir edilməsi reallığa uyğun gəlmir”.
Macarıstanın NATO və Aİ-dən çıxması mümkündürmü?
Hərbi-siyasi şərhçi Ramil Məmmədli “Bakı-Xəbər”ə açıqlamasında bildirdi ki,
Orban kifayət qədər cəsarətli mövqe ortaya qoyur: “O, Ukrayna müharibəsindəki mövqeyinə görə Avropanı sərt tənqid edir. Orban Avropanın Rusiya-Ukrayna müharibəsini alovlandırdığını söyləyir. Deyir ki, Avropa ABŞ-dan ayrı bir siyasət yürütməlidir. Çünki döyüşən iki tərəfin də əsl qurbanı Avropa iqtisadiyyatı və əhalisidir.
Onun sözlərinə görə, Rusiya-Ukrayna münaqişəsinin həll yolu cəbhədə deyil. Sitat:”Biz insanlar dünya sülhü istəyirik. Bir-birinizi öldürməyi dayandırın. Danışıqlara başlayaq, ya da ən azından anlayın ki, meydanda həll yoxdur”.
Bütün bunlar o demək deyil ki, Orban ölkəsini NATO və Aİ-dən çıxarmaq istəyir. Avropada Rusiyanın NATO ölkələrindən birinə hücum edəcəyi ilə bağlı təbliğat aparılanda Orban qeyd edib ki, Rusiyanın NATO ölkələrindən birinə hücum etmə ehtimalı son dərəcə aşağıdır: “Alyansın bir üzvünə kiminsə hücum etməsi ehtimalı son dərəcə azdır və bu, təkcə Rusiyaya aid deyil, istənilən ölkəyə aiddir. NATO müdafiə ittifaqıdır və Alyansın hər hansı üzvünün suverenliyini pozan heç bir hərbi hərəkətə dözməyəcək. Ona görə də mən Qərb siyasətçilərinin guya Rusiya təhlükəsi ilə bağlı bütün bu bəyanatlarını Qərbin manevri və Avropanın Rusiya ilə müharibəyə hazırlaşması kimi şərh edirəm”.
Göründüyü kimi, Orban yeri gələndə NATO-nun təəssübkeşi kimi çıxış edir. Macarıstanın Avropa və NATO-da ciddi mövqeyi var. Avropadakı güclər çalışar ki, Orban kimi obyektiv adamı hakimiyyətdən uzaqlaşdırsın. Bu heç də o demək deyil ki, onu üzv olduğu qurumlardan çıxararlar. NATO müharibə gücünə qarış-qarış Şərqə doğru genişlənir. Ukrayna müharibəsi məhz buna görədir. Belə niyyətdə olan qurum öz yanındakı ölkədəki mövqeyini niyə asanlıqla əldən versin ki? Sadəcə, belə açıqlamalarla Orbanı bir qədər qəlibə salmaq istəyirlər. Macarıstan Avropa İttifaqında sədrliyə başlayarkən, xarici və təhlükəsizlik siyasəti istiqamətində fəallığını artırıb. Ölkənin Baş naziri Viktor Orban əvvəlcə Kiyevdə Ukrayna Prezidenti Zelenski ilə görüşüb, daha sonra Kreml sahibi Vladimir Putinlə təmas qurub. Bu fəallıq Avropanın lider ölkələri olan Almaniya və Fransanı qane etmir. Ona görə də Orbana belə hücumlar təşkil edirlər”.
Məhəmmədəli QƏRİBLİ
