Fransa televiziyası Azərbaycana qarşı açıq-aşkar irqçi təbliğat apardı…
Məlum olduğu kimi, Fransada 33-cü Yay Olimpiya Oyunları başlayıb. 2024-cü il Paris Yay Olimpiya Oyunlarının açılış mərasimində Azərbaycana qarşı təxribat xarakterli davranış sərgilənib. Belə ki, Fransanın "France 2" telekanalında açılış mərasimində canlı yayım zamanı aparıcılar Azərbaycan idmançılarına qarşı təxribat xarakteri daşıyan ifadələr səsləndirib.
Erməni komandasının keçidi zamanı telekanalın aparıcılarından biri Ermənistana qarşı simpatiyasını gizlədə bilməyib: "Ermənistan, bizim erməni dostlarımız, tarixən fransızların ürəyinə yaxın bir ölkə".
Bununla yanaşı, aparıcı həmçinin, Qarabağdakı qondarma rejimin tarixdən silinməsi ilə bağlı təxribatçı fikirlər səsləndiribvə bu fikirlər Azərbaycan və Ermənistan idmançılarının keçidi kontekstində deyilib. Azərbaycan komandasının keçidi zamanı ölkəmiz "Ermənistanla ərazi məsələsində münaqişədə olan Qafqaz respublikası" kimi təqdim edilib. Bu isə aparıcının Ermənistan komandası ilə bağlı səsləndirdiyi fikirlərlə Azərbaycana qarşı mövqeyində kəskin ziddiyyət təşkil edib və qərəzli olmasını göstərir.
Mətin Məmmədli: “Paris Yay Olimpiya oyunlarının açılış mərasimində Fransa jurnalistlərinin ölkəmizlə, Qarabağla bağlı səsləndirdiyi fikirlər birmənalı olaraq təxribat xarakteri daşıyır”
Siyasi şərhçi Mətin Məmmədli “Bakı-Xəbər”ə şərhində bildirdi ki, Paris Yay Olimpiya oyunlarının açılış mərasimində Fransa jurnalistlərinin ölkəmizlə, Qarabağla bağlı səsləndirdiyi fikirlər birmənalı olaraq təxribat xarakteri daşıyır: "Hesab etmirəm ki, Fransanın "France 2" telekanalında açılış mərasimində canlı yayım zamanı aparıcılar təsadüfən məlum fikirləri səsləndirib. Bu fikirlər, cümlələr bir daha sübut edir ki, Fransa Azərbaycana qarşı hansı mövqedə, hansı düşüncədir. Bugünə qədər dəfələrlə qeyd etmişik ki, Fransa regionda vəziyyəti gərginləşdirən dövlətlərdən biridir. Baş verən bütün hadisələr, Fransanın atdığı hər bir addım bizim iddialarımızı təsdiq edir".
Həmsöhbətimiz təəssüf hissilə onu da əlavə etdi ki, Fransa beynəlxalq idman yarışlarından da öz siyasi məqsədləri üçün istifadə edir.
Azər Həsrət: “Xarici ölkələr, beynəlxalq təşkilatlar bu haqsızlıqla bağlı öz ədalətini göstərməlidir”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, Fransanın məlum davranışı təəsssüf hissilə izlənildi: “Xatırladım ki, 2015-ci ildə Azərbaycanda birinci Avropa Oyunları keçirilərkən Fransa kimi dövlətlər, yeri gəldi-gəlmədi, bizi topa tuturdular, böhtan-şər atırdılar. Xüsusi olaraq bildirim ki, o ölkələrin mediasında Azərbaycana qarşı qarayaxma kampaniyası aparılırdı. Halbuki, Bakıda keçirilən birinci Avropa Oyunlarında oyunlar çox mükəmməl təşkil edilmişdi. Bununla yanaşı, təşkilatı işlər də yüksək səviyyədə idi, ancaq buna baxmayaraq, ölkəmiz haqqında xoş olmayan fikirlər səsləndirirdilər. İndisə özləri bir olimpiada keçirir. 2024-cü il Paris Yay Olimpiya Oyunlarında, biz bir tərəfə, Fransa öz xristian qardaşlarının belə tənqidlərinə məruz qalır. Dünyanın dörd bir yanında Fransa olimpiadanın açılışındakı rəzalətə görə tənqid edilir. Xüsusilə də xristian dininin aşağılanması görüntülərinə görə bu ölkəyə tənqid kampaniyası başladılıb. Azərbaycanla bağlı vəziyyətə gəlincə, təəssüf hissilə deməliyik ki, olimpiya oyunlarının sülhpərvər missiyasına kölgə salacaq davranış nümayiş etdirilir. "France 2" telekanalı olimpiadaya aid olmadığı halda Azərbaycana qarşı qərəzli ifadələr işlədib, Ermənistana rəğbətini ifadə edib. Azərbaycan idmançıları keçərkən isə ölkəmizlə bağlı uyğunsuz ifadələr səsləndiriblər. Ümid edirəm ki, olimpiadanın təşkilinə məsul olan beynəlxalq qurumlar bununla bağlı tədbir görəcək. Məlumdur ki, baş vermis hadisə ilə bağlı aidiyyəti qurumlar bəyanat yayıb, müraciətlər edilib. Lazımi tədbir görülməlidir”.
A.Həsrət onu da bildirdi ki, bir müddət öncə Almaniyada Futbol üzrə Avropa çempionu keçirilərkən qardaş Türkiyədən olan idmançıya bozqurd işarəsi ilə sevincini ifadə etməsinə görə cəza verildi. Halbuki, bozqurd işarəsində qeyri-adi heç nə yoxdur, zorakılığa çağırış deyil. Buna baxmayaraq, həmin idmançı cəzalandırıldı: “Indi biz beynəlxalq qurumlardan Fransanın məlum rəzalatə görə münasibətini gözləyirik. Xarici ölkələr, beynəlxalq təşkilatlar bu haqsızlıqla bağlı öz ədalətini göstərsin. Beynəlxalq təşkilatlar türkiyəli futbolçuya bozqurd işarəsinə görə dərhal əsassız, qərəzli reaksiya verdilər. İndi buyursunlar, həmin çevikliyi burda da göstərsinlər”.
Günel CƏLİLOVA
