ABŞ hakimiyyəti Senatın böhtançı bəyanatına izah verməlidir - Qarabağ ermənilərinə genosid?..

Elşən Həsənov: “Azərbaycan öz milli maraqlarına zidd olan bütün məkrli, qərəzli, ikiüzlü münasibətlərə adekvat cavab vermək iqtidarındadır”

Ötən həftə ABŞ Senatının uyğun komitələrindən biri bir sıra tədbirləri, o cümlədən Ermənistana 65 milyon dollarlıq yardımı özündə əks etdirən 2025-ci maliyyə ili üçün Xarici Əməliyyatlar haqqında qanun layihəsini təsdiqləyib. 

ABŞ Senatı Ermənistana 65 milyon dollar məbləğində yardım nəzərdə tutan qanun layihəsini qəbul edib. Bu barədə Amerika Erməni Assambleyası məlumat yayıb. Məlumatda bildirilir ki, onlar Senatın erməni xalqına olan  dəstəyini alqışlayırlar. Onlar bunu həm də belə izah edirlər ki, bu yardım Azərbaycan hakimiyyətinin 100 min erməniyə qarşı həyata keçirdiyi “genosid” siyasətinə görədir və güya həmin pul Qarabağdan qaçan ermənilərə xərclənəcək. 

Əvvəla, Senatın bu adla ermənilərə yardım etməsi ədalətsizlikdir. Çünki Azərbaycan heç vaxt Qarabağdakı ermənilərə qarşı “genosid” həyata keçirməyib. Əksinə, onlar mərkəzi hakimiyyətə qarşı separatizmə əl atıblar. Ermənistanın birbaşa iştirakı ilə 30 il ərazilərimizi işğalda saxlayıblar. Bizə həm maddi, həm də mənəvi ziyan vurublar.

Azərbaycan Qarabağda yaşayan ermənilərin ölkə vətəndaşı olaraq yaşaması üçün şərtlərini də elan etdi. Onlar bunu qəbul etmədikləri üçün Ermənistana keçməyi üstün tutdular. Belə olan təqdirdə ABŞ Senatının bu adla ermənilərə göstərdiyi “humanizmə” hansı adı verə bilərik?

Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, bu, ABŞ Senatının ölkəmizə qarşı qərəzli davranmasının  ilk əlaməti deyil: “ABŞ Senatı Azərbaycana hərbi yardımın dayandırılmasını nəzərdə tutan “ABŞ Senatı Azərbaycana hərbi yardımın dayandırılmasını nəzərdə tutan “2003-cü il Ermənistan Müdafiə Aktı” adlı sənəd qəbul etdi. Noyabrın 15-də təsdiq edilmiş qanun layihəsi ABŞ administrasiyasının Azadlığa Dəstək Aktına 907 saylı Düzəlişin dayandırılması səlahiyyətinin ləğvini nəzərdə tutur.

Həmin qanun layihəsinin müəllifi 2023-cü ilin sentyabrında Ermənistana səfər etmiş ABŞ nümayəndə heyətinə rəhbərlik edən senator Cerri Piters olub.

Çox qondarma əsaslarla Ermənistana 65 milyon məbləğində yardımın ayrılması qərəzli münasibətin davamı hesab edilə bilər. Son dövrdə ABŞ-ım rəsmi qurumlarının Azərbaycana qarşı ifadə etdikləri qərəzli qərarları  iki ölkə arasında strateji münasibətlərə ciddi zərbə kimi qiymətləndirilir. Sözügedən qanunun qəbul edilməsi və Azərbaycana qarşı irəli sürülən əsassız ittihamlar regionda sülh və sabitlik yaradılması səylərinə ciddi maneçilik törədir.

Bayden Administrasiyasının təhriki ilə anti-Azərbaycan, korrupsiyaçı, islamofob senatorların saxta məlumatları əsasında ABŞ Senatının qəbul etdiyi bu qərar ikili standartların və selektiv yanaşmanın növbəti bariz nümunəsidir.

Ermənistanın Azərbaycana qarşı işğalının genişləndiyi 1992-ci ildə Qarabağda Xocalı soyqırımı ilə yanaşı, Şuşa rayonunun Malıbəyli, Aşağı Quşçular və Yuxarı Quşçular kəndlərində azərbaycanlı əhaliyə qarşı kütləvi qırğın aktları törədilərkən, Şuşa və Laçında etnik təmizləmə aparılarkən ABŞ tərəfi BMT Təhlükəsizlik Şurasının daimi üzvü kimi Azərbaycan xalqına qarşı qətliamların qarşısını almağa səy göstərmək əvəzinə, bu ölkənin qanunvericilik orqanı erməni təbliğatının təsiri altında “Azadlığa Dəstək Aktı” adlanan qanuna 907-ci Düzəlişi qəbul etdi. Bununla da ABŞ hökumətinin Azərbaycana maliyyə yardımı göstərməsi qadağan olundu. Keçmiş SSRİ respublikaları arasında Azərbaycan yeganə ölkə idi ki, əleyhinə bu cür qərar qəbul edilib. Nəticə etibarilə ABŞ-ın təcavüzkar Ermənistana verdiyi maliyyə dəstəyi Azərbaycan torpaqlarının işğalına kömək göstərdi.

Azərbaycanın ərazi bütövlüyünü təmin etməsi onun suveren hüququdur. Biz heç kimi genosidə məruz qoymamışıq. Qarabağdakı ermənilərin qalıb Azərbaycan vətəndaşı kimi yaşaması üçün təkliflər də olundu. Onlar bunu qəbul etməyib, könüllü olaraq Ermənistana keçdilər. Onların Laçın yolundan  necə keçdiklərini əks etdirən görüntülər var. Hətta mal-qaralarını belə aparmağa şərait yaradılmışdı. Amerikanın son illərdə həyata keçirdiyi xarici siyasətin iflasa uğradığının şahidiyik. Xüsusilə Əfqanıstan və Yaxın Şərqdən əli üzülən ABŞ Ermənistan vasitəsilə Cənubi Qafqaza girməyə çalışır. Daha dəqiq desək, Ermənistanın zəifliyindən öz məkrli siyasətini həyata keçirmək üçün istifadə edir. Üzdə erməni lobbisinin arzularını gerçəkləşdirirmiş kimi görünsə də, ABŞ hər vasitə ilə Ermənistandan və ermənilərdən istifadə edir. Nəzərə almadıqları isə Azərbaycanın 90-cı illərdəki səviyyədə olmamağıdır. Azərbaycan hər zaman beynəlxalq hüququn norma və prinsiplərinə uyğun hərəkət edərək, öz milli maraqlarını reallaşdırıb. Bu gün Azərbaycan öz milli maraqlarına zidd olan bütün məkrli, qərəzli, ikiüzlü münaisbətlərə adekvat cavab vermək iqtidarındadır”.

Məhəmmədəli QƏRİBLİ