DİN-in çox vacib strukturunu mətbuatda “Bandotdel" adlandırmaq nə qədər doğrudur...
Şəmdəddin Əliyev: “Bu, Daxili işlər nazirinin nüfuzuna və həmin İdarənin çoxsaylı peşəkar əməkdaşlarına qarşı hörmətsizliyin ifadəsi kimi qəbul oluna bilər”
Daxili İşlər Nazirliyinin (DİN) Mütəşəkkil Cinayətkarlıqla Mübarizə Baş idarəsi kimi mühüm qurumun adı əksər hallarda mediada, mətbuatda "Bandotdel" kimi təqdim olunur.
Cəmiyyətimizi ən qorxunc cinayət və hüquq pozuntuları növlərindən qorumaq və onlarla mübarizə funksiyasını daşıyan və bu yöndə həqiqətən böyük işlər görən mötəbər bir struktura bu adın qoyulması onun fəaliyyətinə xoş münasibət göstəricisi sayıla bilərmi?
Təəssüflə qeyd edə bilərik ki, biz bənzər yalnış təqdimatı Baş Prokuror yanında Korrupsiyaya qarşı Mübarizə Baş İdarəsi ilə bağlı da görürük. Bunun təqdimatı isə “Korriosiya İdarəsi” kimi təqdim olunur.
İctimai leksikonda rast gəlinən bu cür ifadələri mətbuat kimi mötəbər ictimai rəy tribunasına daşımaq düzgündürmü? Bu ifadənin pis formada gündəmə oturmasında jurnalistlərin və mətbuatın məsuliyyəti nə qədərdi?
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, tamamilə doğru olan bir mövzuya mütləq münasibət bildirilməlidir: “Zamanında çox hörmətli Vilayət Eyvazov daxili işlər naziri təyin olunandan sonra mətbuatda belə bir məlumatlar yer aldı: “Bondatdel”in keçmiş rəisinə yüksək vəzifə verildi. Belə ifadələr bu gün baş idarə statusunda fəaliyyət göstərən və Mütəşəkkil Cinayətkarlığa qarşı Mübarizə Baş İdarəsi kimi fəaliyyət istiqamətləri artıq təsdiq olunan quruma yaraşmır. Hazırda bu İdarəyə təcrübəli hüquqşünas, həm nəzəri, həm də praktik səriştəyə malik olan general - mayor Əbülfət Rzayev rəhbərlik edir. Hüquq aləmində çox böyük nüfuza malik insandır. Təbii ki, sözügedən İdarə həm də banditizmə qarşı mübarizəni özündə ehtiva edir. Biz 1991-ci ildə ikinci dəfə müstəqillik əldə etdikdən sonra belə bir İdarə yaradıldı. Sonradan keçid dövrü olduğuna, terrorçuluq hadisələri daha çox vüsət aldığına görə o şöbə bir növ fəaliyyət istiqamətləri xüsusi təyinatla həyata keçirilən bir qrupa mənsub idi. Kifayət qədər peşəkar insanlar orda vardı. Bir az keçdikdən sonra həm transmilli mütəşəkkil cinayətkarlıq, həm də ölkədə olan mütəşəkkil cinayətkarlara qarşı mübarizə sahəsində çox prinsipial mübarizə həyata keçirilməyə başladı. İl ərzində təxminən 300 - ə yaxın mütəşəkkil dəstə ifşa olunub. Eyni zamanda biz bu sahədə beynəlxalq normalara, konvensiyalara qoşulmuşuq. Artıq bu idarə əvvəl Mütəşşəkil Cinayətkarlara qarşı Mübarizə İdarəsi idisə, amma təxminən 10 ilə yaxın müddətdir ki, bu idarənin adı Mütəşəkkil Cinayətkarlığa qarşı Mübarizə Baş İdarəsi adlanır. Bu sahədə də öz fəaliyyətini davam etdirir. Mən deyərdim ki, onların fəaliyyət istiqamətləri çox yığcamdır və onların mübarizəsi, əhali ilə birlikdə çalışmaları, məxfi şəbəkə ilə işlərini qura bilmələri, tapşırıqları verə bilmələri yüksək səviyyədədir. Doğrudan da, onların həyata keçirdikləri mübarizə öz bəhrəsini verir. Amma televiziyalarda, kütləvi informasiya vasitələrində, vətəndaş cəmiyyətinin bəzi sektorlarında bu şəkildə “bondatdel” ifadəsi işlətmək, təbii ki, bu quruma yumşaq ifadə ilə hörmətsizlikdi. Belə yanaşma düzgün deyil və qeyd edim ki, il ərzində təxminən 37 min qeydə alınmış cinayətkarın sırasında banditizmlə bağlı cinayətin qeydə alınmaması mümkün deyil. Ancaq bizdə xüsusilə ağır cinayətlərin sırasında azalma müşahidə olunur. Banditizmlə bağlı cinayətlərə isə ümumiyyətlə nadir hallarda rast gəlinir . Ona görə də, bu şəkildə “bondatdel” ifadəsini işlətməyin özü tamamilə qəbuledilməzdir, bu ifadədən əl çəkmək lazımdır. Bu, Daxili işlər nazirinin nüfuzuna və həmin İdarənin çoxsaylı peşəkar əməkdaşlarına qarşı hörmətsizliyin ifadəsi kimi qəbul oluna bilər. Bu idarənin adı Mütəşəkkil Cinayətkarlığa qarşı Mübarizə Baş İdarəsidir. Eyni sözləri Baş Prokuror yanında Korrupsiyaya qarşı Mübarizə Baş İdarəsi ilə bağlı olan yanlış təqdimata da aid edə bilərik”.
Məhəmmədəli QƏRİBLİ
