Xalq artisti Roza Cəlilova ilə gənclərin görüşü keçirilib
Azərbaycan Respublikası Mədəniyyət Nazirliyi və Gənclər və İdman Nazirliyi, Bakı Gənclər Mərkəzinin dəstəyi və “İRƏLİ” İctimai Birliyinin təşkilatçılığı ilə Azərbaycan Respublikasının Xalq artisti, xoreoqraf, rəqqasə Roza Cəlilova ilə gənclərin görüşü keçirilib.
Bakixeber.com xəbər verir ki, “MədəniyyətimİZ” proqramı çərçivəsində baş tutan tədbiri giriş sözü ilə açan layihə koordinatoru Riad Cəbrayılov proqram çərçivəsində həyata keçirilən mədəniyyət xadimləri ilə maarifləndirici və interaktiv görüşlərin əhəmiyyətindən bəhs edib. Azərbaycan rəqs mədəniyyətinin tarixi və inkişafından, müasir dövrümüzdə rəqs sənətinin təbliği və gənclərin sağlam ruhda yetişməsində Roza Cəlilovanın sənətdəki rolundan danışıb.
Daha sonra xoreoqraf Roza Cəlilova həyat və yaradıcılığı ilə bağlı tarixi xatirələrini bölüşüb. Azərbaycan rəqs mədəniyyətinin inkişafı kontekstində müasir ənənələrinin təbliği, gənc rəqqasların yaradıcı fəaliyyətindən söhbət açılıb. Tədbir “Azərbaycan rəqs sənəti tarixi: keçdiyimiz yol, ənənələr və müasirlik”, “Ümummilli Lider Heydər Əliyevlə bağlı olan xatirlər” və “Milli rəqs mədəniyyətinin təbliği, gənclərin yaradıcılığının inkişafı” mövzularında panel müzakirə ilə davam edib.
Görüşün bədii hissəsində Beynəlxalq Müsabiqələr Laureatı Lenay Seyidəlizadə, Aslanə Əliyeva, Bakı Xoreoqrafiya Akademiyasının tələbələri, “Qayğı” Mərkəzinin rəqs kollektivinin ifalarında müxtəlif kompozisiyalar təqdim olunub. Respublikanın Əməkdar artisti Elza Seyidcahanın ifasında “Haxışta” nəğməsi səslənib.
“MədəniyyətimİZ” proqramı Azərbaycan incəsənətinin gənclər arasında təbliği, mədəniyyətin gündəlik həyat tərzinə çevirilməsi, gənclərin milli-mənəvi dəyərlərə xas və vətənpərvər ruhda yetişməsinə nail olmaq məqsədilə həyata keçirilir. Proqram çərçivəsində müxtəlif mədəniyyət nümayəndələri ilə musiqili görüşlərin təşkili nəzərdə tutulur.
Nigar ƏLİYEVA
