Makron Fransanı “olimpiya rüsvayçılığına” saldı...
Rauf Zeyni: “Fransada Olimpiya Oyunlarının başlandığı gün belə kütləvi hadisələrin, təxribatların, etirazların baş verməsi və ciddi daxili gərginliklərin yaşanması Makron və onun komandasının yarıtmaz siyasətinin nəticəsidir”
Paris-2024 Yay Olimpiya Oyunlarına ev sahibliyi edən Fransada günü-gündən çoxalıb şişən daxili problemlər o həddə çatıb ki, narazı əhali təxribat törətməyə başlayıb. Özü də belə nüfuzlu bir tədbirin keçirildiyi vaxtda. Parislilər Olimpiya Oyunlarının keçirilməsini başdan istəmirdilər. Baş verənlər də bu narazılığın rüsvayçı göstəricilərindəndir. Oyunların başlanmasına bir neçə saat qalmış aləm bir-birinə qarışdı.
Xarici medianın yaydığı məlumata görə, iyulun 26-da gecə saat 1-dən 05:30-dək Fransa Milli Dəmir Yolları Şirkətinin (SNCF) sürət qatarları (TGV) şəbəkəsinə qarşı beş təxribat cəhdi qeydə alınıb, onlardan yalnız birinin qarşısı alınıb. Nəticədə 800 min sərnişin qatarların gecikməsi və ya reyslərin ləğv edilməsi ilə üzləşib.
Təxribatlar planlı şəkildə və eyni vaxtda həyata keçirilib. Hadisələr zamanı sürücülərin təhlükəsizliyi və açarların işləməsi üçün vacib olan fiber-optik kabellərin kəsilməsi, sonradan yandırılması baş verib. Yerli mətbuat bu hadisələrin ictimaiyyətə aid məkanlarda baş verdiyini qeyd edərək, bu işdə prosesi bilən şəxsin və şəxslərin əli olduğunu ehtimal edib.
Paris prokurorluğu Fransa Milli Dəmir Yolları Şirkətinin (SNCF) bütün saytlarına qəsdən ziyan vurulması ilə bağlı istintaq işi açıb. İstintaq bir neçə ittihamı, eləcə də xalqın əsas maraqlarına ziyan vura biləcək əmlakın korlanması və məlumatların avtomatlaşdırılmış sisteminə hücumu əhatə edir.
Ölkədə Atlantik, Şərq və Şimal istiqamətlərində sürət qatarlarının (TGV) hərəkəti dayanıb. SNCF səyahətçilərə səfərlərini təxirə salmağı və stansiyalara getməməyi tövsiyə edib. Bildirilib ki, bütün biletlər dəyişdiriləcək və geri qaytarılacaq.
Beynəlxalq Olimpiya Komitəsinin prezidenti Tomas Bax Fransa hakimiyyətinə etimad göstərdiyini, bütün lazımi tədbirlərin görüldüyünü və hakimiyyətə 180 beynəlxalq kəşfiyyat xidmətinin kömək etdiyini vurğulayıb.
Olimpiya Oyunlarının açılış mərasiminə bir neçə saat qalmış baş verən bu hücum Parisə gələn çox sayda səyahətçinin və turistin səfərini çətinləşdirib.
Göründüyü kimi, Fransada Olimpiya Oyunlarının başlandığı gün daxildə çox ciddi proseslər meydana gəlib, ciddi faktlar qeyd alınıb, dəmir yolu şəbəkəsi çökdürülüb, insanlar narazılıq edir. İnsanlar etiraz edirlər ki, belə bahalı tədbiri keçirməkdənsə ölkənin daxili sosial-iqtisadi məsələlərinin həlli ilə məşğul olmaq lazımdır, bütün sahələrdə problem yaranıb, sistemin pozulması var. Dəmir yoluna, fiber-optik kabellərə qarşı ən azı beş dəfə təxribat törədilib, fiber-optik kanalları kəsiblər, yandırıblar. Diqqətçəkən məqamlardan biri odur ki, bu təxribatların çoxu həm də insanların gur olduğu yerlərdə baş verib. Təxribatların olduğu yerlər insanların kütləvi toplaşdığı, hərəkət etdiyi yerlərə yaxın olub. Demək olar ki, insanların bu işdə antipatiyası mühüm rol oynayıb.
Olimpiya Oyunlarının belə uğursuzluqla başlanmasında Makronun və onun komandasının məsuliyyəti nə qədərdi?
“...Fransa hökumətinin məsuliyyət daşıdığı gizlin deyil”
Müstəqil ekspert Rauf Zeyni baki-xeber.com-a şərhində bildirdi ki, bu gün Fransada yaşanan bütün mənfi olayların səbəbkarı Makron və onun siyasi komandasıdır. “Fransada Olimpiya Oyunlarının başlandığı gün belə kütləvi hadisələrin, təxribatların, etirazların baş verməsi və ciddi daxili gərginliklərin yaşanması Makron və onun komandasının yarıtmaz siyasətinin nəticəsidir. Bunlar Fransa prezidenti Makronun və onun komandasının ölkəni necə idarə etməsini göstərir. Çünki bu gün müəyyən millətlərin və xalqların siyasəti yalnız öz ölkələrinin sosial problemlərinin həll olunması, təhlükəsizliyinin təmin edilməsi, qonşularla dinc şəraitdə yaşamaqdır, regionda sülhün, stabilliyin, dünyada barışın olmasını tərənnüm etməkdir. Amma təəssüflər olsun ki, Fransa kimi dövlətlər bu istiqamətdə düşünmək əvəzinə Ermənistanı silahlandırır, maliyyələşdirir, öz azadlıqlarını təmin etmək istəyən xalqların azadlığını boğmağa çalışır. Amma gördüyünüz kimi, bu məsələlərə də vəsait sərf edir. Ermənistanı maliyyələşdirməkdənsə, kütləvi qırğın silahları ilə təmin etməkdənsə, ölkə daxilindəki narazılıqları aradan qaldırmaq, sosial problemlərin həlli ilə məşğul olmaq lazımdır. Fransa hökumətinin apardığı bu siyasət çox təzadlar və fəsadlar yaradır. Ona görə də bu gün Olimpiya Oyunları günü əhalinin sosial narazlığı baş verib, dəmir yolu çökdürülüb, fibro-optik xətlər kəsilib. Bunlar da çox ciddi bəşəri problemləri ortaya qoyur. Yəni BMT Təhlükəsizlik Şurasının üzvü olan ölkələr düşünsünlər ki, dünyanı idarə etmək üçün birinci növbədə həm iqtisadi, həm sosial, həm siyasi, həm hüquqi, həm də digər baxımdan ədalət prinsipini ortaya qoymaq lazımdır”-deyə R.Zeyni bildirdi.
R.Zeyninin sözlərinə görə, azsaylı xalqlara, digər ölkələrə, millətlərə qarşı nə qədər ədalətsizlik edəcəklərsə, bunların hamısı bumeranq effekti verəcək və onların öz ölkəsinə qayıdacaq, bunu unutmasınlar. “Vəziyyətin bu həddə çatmasında Fransa hökumətinin məsuliyyət daşıdığı gizlin deyil...
Hər halda, biz Olimpiya Oyunlarına uğurlar arzu edirik, ora müxtəlif ölkələrdən gələn idmançılar öz zəhmətləri hesabına nəticələr əldə edib bayraqlarını ucaldacaqlar. Bizim idmançılarımız da orada iştirak edir, hər birinə qələbə əzmi diləyirəm. Qoy Azərbaycan idmançılarının hamısı məhz Fransada Azərbaycanın bayrağını qaldırsınlar”-deyə R.Zeyni vurğuladı.
İradə SARIYEVA
