Naxçıvanın turizm və nəqliyyat potensialından nə qədər səmərəli istifadə olunur...
Əli Əlirzayev: “Naxçıvanda daxili turizm hazırda inkişaf mərhələsindədir”
Azərbaycanın ayrılmaz tərkib hissəsi olan, Qədim İpək Yolunun mərkəzində yerləşən Naxçıvan Muxtar Respublikası Azərbaycanın Şərqə açılan qapısı olmaqla zəngin dövlətçilik tarixinə malikdir. Məlum olduğu kimi, Prezident İlham Əliyev "Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramının təsdiq edilməsi haqqında" sərəncam imzalayıb.
Dövlət proqramının məqsədi davamlı iqtisadi artımı təmin etməklə, vətəndaşların həyat səviyyəsini yaxşılaşdırmaqla Naxçıvanın sosial-iqtisadi yüksəlişinə nail olmaqdır. O da bəllidir ki, Naxçıvanın turizm və logistika imkanları da genişdir. Maraqlıdır, Naxçıvanın nəqliyyat və turizm potensialından xüsusilə son 2 ildə nə qədər səmərəli istifadə olunub? Ümumiyyətlə hakimiyyət dəyişikliyindən sonra bu sahədə Naxçıvanda qalxma, ya enmə var?
“Naxçıvanın nəqliyyat sahəsi ilə bağlı vəziyyət son illər yaxşıya doğru dəyişib”
Iqtisadçı ekspert Əli Əlirzayev “Bakı-Xəbər”ə şərhində bildirdi ki, son iki il ərzində Naxçıvan iqtisadiyyatı sürətlə inkişaf edib. Xüsusilə Naxçıvanda daxili turizm hazırda inkişaf mərhələsindədir: “Naxçıvanda sağlamlıq, tarixi, dini, ekoloji və kənd turizmi inkişaf edir. Həmçinin, bu bölgənin sakinləri də turizmin inkişafında maraqlıdır. Naxçıvan Muxtar Respublikası turizmin inkişafını şərtləndirən əsas göstəricilərə, ilk növbədə, mükəmməl nəqliyyat infrastrukturuna malikdir. Təsadüfi deyil ki, turist məmnunluğunu səciyyələndirən xidmətlərdən biri də nəqliyyat xidmətidir. Naxçıvanın inkişaf konsepsiyasına uyğun olaraq burada ən müasir standartlara cavab verən nəqliyyat infrastrukturu qurulub. Bu gün Naxçıvan Beynəlxalq Hava Limanından Bakı, Gəncə, İstanbul, Moskva şəhərləri istiqamətlərində uçuşlar həyata keçirilir. Muxtar respublikada bir neçə avtovağzal var. Naxçıvan şəhərindən muxtar respublikanın bütün yaşayış məntəqələrinə avtobus marşrutları işləyir. 24 saat taksi xidməti göstərilir. Naxçıvan şəhərində turist marşrutu da fəaliyyət göstərir.
Naxçıvanın nəqliyyat baxımından əsas göstəricilərindən biri də muxtar respublikanın ən ucqar dağ kəndlərinə belə rahat asfalt yollarla getməyin mümkün olmasıdır”.
Həmsöhbətimiz onu da əlavə etdi ki, Naxçıvanda dini turizmin inkişafı istiqamətində görülən işlər, dini-mədəni abidələrin bərpası və qorunması mənəvi dəyərlərimizin dünyaya tanıdılmasında vasitə rolunu oynayır: “Naxçıvan təbiətinin özəllikləri bu diyarda müalicə turizminin inkişafına geniş imkanlar yaradır. Bu baxımdan Duzdağ Fizioterapiya Mərkəzi artıq uzun illərdir ki, nəinki Azərbaycanda, ölkəmizin hüdudlarından kənarda da fərqli bir müalicə mərkəzi kimi tanınır və muxtar respublikanın turistlər üçün cəlbediciliyini artırır. Ekoloji təmiz hava, günəş radiasiyasının bolluğu ilə yanaşı, təbii mineral sularla zəngin olması Naxçıvanda sağlamlıq turizminin inkişafına əhəmiyyətli təsir edir. Azərbaycanın mineral su ehtiyatının 60 faizi Naxçıvan Muxtar Respublikasının payına düşür. Bir sözlə, Naxçıvan turizmi davamlı inkişaf yolundadır. Həyata keçirilən tədbirlərin nəticəsi olaraq muxtar respublika sürətlə turistlər üçün daha cəlbedici bölgəyə çevrilir”.
İqtisadçı onu da əlavə etdi ki, Naxçıvanın nəqliyyat sahəsi ilə bağlı vəziyyət son illər dəyişib. Logistika ilə bağlı Naxçıvanda böyük layihələr həyata keçirilir: “Naxçıvanda hakimiyyət dəyişikliyi qeydə alınandan sonra iqtisadi inkişaf artıb. İnkişaf iqtisadiyyatın bütün sferalarında görünür”.
Günel CƏLİLOVA
