İrəvan aeroportunda ruslara qarşı dözülməz diskriminasiya faktları...
![Image](/uploads/posts/2024-07/irevan-aero.webp)
“Rus vətəndaşlarının hava limanında üzləşdiyi münasibət Ermənistanın antirusiya ovqatının göstəricilərindən biri kimi xarakerizə edilə bilər”
Rusiya Prezidenti yanında Vətəndaş Cəmiyyətinin İnkişafı və İnsan Haqları Şurasının (İHŞ) rəhbəri Valeri Fadeyev İrəvan hava limanında ruslara qarşı ayrı-seçkilik halları ilə bağlı Ermənistanın Rusiyadakı səfiri Vaqarşak Arutyunyana müraciət edib. Bu barədə Aysor.am məlumat yayıb.
Bildirilib ki, Ermənistanın “FlyOne” aviadaşıyıcısının nümayəndələri və Zvartnots Beynəlxalq Hava Limanının əməkdaşları tərəfindən hüquqlarının pozulması halları ilə üzləşmiş Rusiya vətəndaşlarının Vətəndaş Cəmiyyətinin İnkişafı və İnsan Haqları Şurasına müraciətləri daxil olub.
Valeri Fadeyevin müraciətində “açıq mənbələrdəki nəşrləri oxuyaraq belə qənaətə gəldik ki, təsvir olunan hal, təəssüf ki, yeganə hal deyil”-deyə bildirilib.
O, səfirdən bununla bağlı Rusiya tərəfin mövqeyini Ermənistanın səlahiyyətli orqanlarının diqqətinə çatdırmasını istəyib və bildirib ki, Rusiya vətəndaşlarına qarşı bu cür insidentlərin yaşanması yolverilməzdir.
“Şura xüsusilə bildirir ki, iyulun 6-da rusiyalı opera müğənnisi Svetlana Kasyan azyaşlı qızı ilə Almaniyadan İrəvan vasitəsilə qastrol səfərindən qayıdırmış və əvvəlcədən hava limanına gəlsələr də, əlavə ödəniş müqabilində “qeydiyyatdan keçiblər”. Onlara oturacaqda uçuş və heç bir kompensasiya təklif edilməyib. Bu haldan narahat olan sərnişinlərin köməyi ilə o, təyyarəyə minsə də, aviaşirkətin nümayəndələri onu və uşağı ayaq üstə uçmağa dəvət ediblər, havaya qalxmazdan əvvəl bir stəkan su belə verməkdən imtina ediblər. Uçuş zamanı uşağını qucağında saxlayan bir sərnişin onlara oturmağa icazə verib”-deyə Şura sədrinin səfirə təqdim etdiyi müraciətdə bildirilib.
Bundan əlavə, Şura qeyd edib ki, iyunun 3-də Roma - İrəvan - Moskva marşrutu ilə uçan bir qrup rusiyalı Romadan uçuş gecikdiyi üçün Moskvaya uçan təyyarəyə minməyib. “Lakin hava limanının əməkdaşları, problemi həll etmək əvəzinə, heç bir izahat vermədən onları saxlayıb və polis şöbəsinə aparıblar”-deyə müraciətdə vurğulanıb.
Rusiya tərəfi bildirib ki, bu ölkənin vətəndaşlarına qarşı Ermənistanda ayrı-seçkilik və diskriminasiya halları mövcuddur.
“Ermənistanda antirusiya əhval-ruhiyyəsinin artması faktdır”
Məsələ ilə bağlı Müasir İnkişaf Birliyinin sədri, siyasi şərhçi Mübariz Göyüşlü “Bakı-Xəbər”ə bildirdi ki, son illər Ermənistanda ruslara qarşı ayrıseçkilik, diskriminasiya halları geniş yayılıb. M.Göyüşlünün fikrincə, bu da ondan qaynaqlanır ki, Ermənistanda ruslara qarşı kəskin nifrət formalaşıb. “Ermənistanda antirusiya əhval-ruhiyyəsinin artması faktdır. Bu da özbaşına baş verən bir hadisə deyil, hakimiyyət tərəfindən idarə olunan bir prosesdir. Yəni Paşinyan hökumətinin də marağındadır ki, Ermənistanda antirusiya ovqatı daha da güclənsin, böyük bir dalğaya çevrilsin, ermənilərdə ruslara, Rusiyaya qarşı böyük bir nifrət formalaşsın. Bu mənada Paşinyan və onun komandası mümkün qədər Ermənistanda bütün sahələrdə antirus proseslərini alovlandırmaqda, qıcıqlandırmaqda maraqlıdır”.
Bir müddət əvvələ qədər Zvartnots Beynəlxalq Hava Limanını Rusiya hərbiçilərinin qoruduğunu deyən M.Göyüşlü bildirdi ki, Paşinyan hökuməti orada rus hərbiçilərinə ehtiyac olmadığını bildirib onları oradan çıxarmağa nail oldu. Azərbaycanla sərhədlərdə də rus hərbçilərinin dayandığını deyən M.Göyüşlü sonradan Ermənistanın buna da etiraz etdiyini, onların oradan çıxarılması tələbini gündəmə gətirdiyini vurğuladı. O qeyd etdi ki, rus hərbçilərinin bu şəkildə neytrallaşdırılması Rusiya tərəfini də kəskin şəkildə qıcıqlandırdı. Müsahibimiz qeyd etdi ki, gedən proseslər də Rusiyanı qane etmir.
“Bu məsələyə bir neçə tərəfdən yanaşmaq olar. Birincisi, ola bilsin ki, orada Rusiya vətəndaşlarına qarşı hansısa bir narahatlıq yaşadılsın, amma bunun Rusiya tərəfindən şişirdilmiş bir prosesə çevrilməsi də istisna deyil. Çünki Rusiya Ermənistandan narazı olduğu üçün, ola bilsin, vətəndaşlarının narazılığını müəyyən bir həddə gətirib ondan Ermənistan əleyhinə istifadə etməyə çalışır. Bu da ola bilər. İkinci tərəfdən də, Ermənistanda ruslara qarşı aqressiv münasibət var. Bu baxımdan bu ölkədə Rusiya vətəndaşlarına qarşı ayrıseçkilik, diskriminasiya hallarının baş verdiyi gizlin deyil. Rus vətəndaşlarının hava limanında üzləşdiyi münasibət Ermənistanın antirusiya ovqatının göstəricilərindən biri kimi xarakerizə edilə bilər”-deyə M.Göyüşlü bildirdi.
İradə SARIYEVA