Azərbaycan uşaqlarının inkişaf proqramları fasiləsiz icra edilir…
![Image](/uploads/posts/2024-07/1721829046_media-logo.webp)
Uşaq və gənclərin fiziki və mənəvi inkişafı onların yaşadıqları ölkənin, cəmiyyətin, xalqın inkişafının göstəricisidir. Çünki istənilən uşaq hansı mühitdə böyüyürsə, məhz həmin mühitdə öyrəndiklərini gələcəkdə nümayiş etdirir.
Əlbəttə, hər bir uşağın və gəncin gələcəkdə layiqli vətəndaş kimi yetişməsində onun mənəvi və fiziki tərbiyəsi ilə yanaşı, təhsili də önəmli yer tutur. Bütün bunlar bir-biri ilə mütləq uzlaşmalıdır.
Təhsildə olan bəzi boşluqlarla bağlı layihələr hazırlamaq istiqamətində çalışırıq
Uşaqların Gələcəyi Naminə İctimai Birliyinin sədri Könül Quliyeva “Bakı-Xəbər”ə açıqlamasında bildirdi ki, demokratik dövlətin əsas prioriteti milli maraqları qorumağı bacaran vətəndaş cəmiyyətinin qorunmasıdır: “Bizim də ölkəmizdə QHT-lərin rolu danılmazdır. Biz Uşaqların Gələcıyi Naminə adlı təşkilat olaraq əminik ki, icra etdiyimiz bütün layihələrin bu həssas təbəqə üçün mühüm faydası var. Başlıca məqsədimiz uşaq və yeniyetmələrin təhsilə marağının artırılmasıdır. Bu yöndə kifayət qədər tədbirlər həyata keçiririk. Hər il bu yöndə yazı müsabiqələri də keçiririk. Təhsildə olan bəzi boşluqlarla bağlı layihələr hazırlamaq istiqamətində çalışırıq. Hesab edirəm ki, xüsusi əhəmiyyət kəsb etməyən fənlər ümumiləşdirilməlidir. Onları müasir bilikləri aşılayan yeni fənlərlə də əvəz etmək olar. Xüsusilə də uşaq və yeniyetmə psixologiyası məktəblərdə tədris edilməlidir. Müəllimlərimiz üçün də müasir pedaqoji təcrübənim öyrənilməsi çox faydalıdır. Orta məktəb müəllimləri nəzəri bilikləri əldə etməklə yanaşı, həm də pedaqoji təcrübə keçməlidir. Son vaxtlar siniflərdə şagirdlərin sayı ilə bağlı da təkliflərimiz var. Əgər biz hər bir şagirdə fərdi yanaşçanın tərəfdarıyıqsa, 45 dəqiqə ərzində 40 şagirdə çatdırılan elmin səviyyəsini yüksək saya bilmərik. Simiflərdə şagir sayının azaldılması ilə bağlı ciddi addımlar atılmalıdır. Qəbul prosesində abutiryentlərin əldə etdikləri yüksək nəticələr məktəblərin aktivinə yazılsa da, əslində bu, daha çox repitetorların zəhmətidir. Bu sahədə ciddi araşdırmalar aparıb, xüsusi təkliflərlə çıxış edəcəyik. Biz məktəb təhsilinin əvəzolunmazlığını təbliğ edib, onun doğrudan da elə olmasına çalışmalıyıq. Bu gün bizim ölkədə nəşriyyat və poliqrafiya işi də ürəkaçan deyil. Bu da uşaqların tərbiyyəsində mühüm rol oynayan ədəbiyyatlarının çapında ciddi problemlər yaradır. Kitabların elektronlaşması istiqamətində müəyyən nailiyyətlər olub, amma bu çox azdır. Təklif edırdim ki, ölkənin əyalətlərində olan kitabxanalarında da müasirləşmə prosesi getsin. Məktəb kitabxanaları da forma və məzmun baxımından yenilənməlidir. Çünki uşaqların formalaşması məhz məktəb illərindən başlayır. Biz uşaq təşkilatı olaraq bu boşluqların doldurulmasını çox zəruri sayırıq. İcra etdiyimiz son layihəmiz uşaqların və anaların gələcək sağlamlığı ilə bağlı “Ana südü” adlı layihə icra edirik. Layihəmiz 3 istiqamət üzrə nəzərdə tutulub. Həm veriliş hazırlamışıq, həm də maarifləndirici yazılarla çıxış edirik, əsas üstünlüyü isə tədbirlərə vermişik.
Həkimlərin iştirakı ilə analara maarifləndirici tövsiyələr veririk”
Dünya ictimaiyyəti bir daha gördü ki…
Könül Quliyeva hesab edir ki, gənclərin hər mənada sağlam yetişməsində təhsil ocaqlarının özünəməxsus yeri vardır: “Bu baxımdan da hər kəs yaxşı bilir ki, uşaq və gənclərimizin layiqli vətəndaş olmaları üçün təhsil ocaqlarının, eləcə də həmin təhsil ocaqlarında çalışan pedoqoji kollektivin, müəllimlərin öhdəsinə böyük məsuliyyət düşür. Çünki tədris müəssisələrinin əsas vəzifəsi məhz gəncliyimizin milli ruhda, milli-mənəvi tərbiyədə yetişməsini təmin etməkdir və məhz bu baxımdan həmin müəssisələr, eləcə də o müəəssisələrdə çalışan pedaqoqlar uşaq və gənclərin düzgün tərbiyə almalarına, gələcəkdə cəmiyyətə sağlam düşüncəli vətəndaş kimi inteqrasiya olunmalarına, şəxsiyyət olaraq formalaşmalarına, milli ruhda böyümələrinə, təhsilə məsuliyyətlə yanaşmalarına birbaşa cavabdehlik daşıyırlar. Məhz gənclərimizin 44 günlük Vətən Müharibəsində necə qəhrəmanlıq göstərdiklərinin bütün dünya şahidi oldu: “Dünya ictimaiyyəti bir daha gördü ki, Azərbaycan gəncləri vətənpərvərlik ruhunda, milli-mənəvi dəyərlərə hörmət və ehtiram hissi ilə yetişib, inkişaf edib. Heç şübhəsiz ki, hər kəs onun da fərqindədir ki, bütün bunların kökündə məhz ölkə Prezidentinin apardığı düzgün, düşünülmüş, məqsədyönlü siyasət dayanır və bunu təkzib etmək mümkün deyil. Fərqindədir ki, məhz bu siyasət ölkəmizin, onun torpaqlarının, ərazi bütövlüyünün, suverenliyinin gələcəkdə də daha etibarlı şəkildə qorunacağına indidən əmin olmağa əsas verir. Çünki belə bir uğurlu siyasətin yaradılması nikbin proqnozlar üçün əsaslı zəmin yaradır. Ona görə ki, ölkəmizdə uşaq və gənclərin fiziki, eləcə də mənəvi inkişafına göstərilən diqqət göz önündədir”.
Xalqımızın milli-mənəvi dəyərlərinə əsaslanan dövlət-uşaq siyasətinin əsasında cəmiyyətimizin əsas özəyi olan ailələrin sosial müdafiəsinin gücləndirilməsi, təhsilin və səhiyyənin səviyyəsinin artırılması, uşaq yaradıcılığının dəstəklənməsi dayanır. Bu gün biz əminliklə deyə bilərik ki, uşaqlar və gənclərimizin gələcəyi etibarlı əllərdədir. Onların layiqli vətəndaş kimi böyüməsi, təhsil alması, cəmiyyətdə mövqe tutması üçün Azərbaycan dövləti bütün imkan və şəraiti yaradıb. Qarşıdakı 10 ildə isə gənclərin və uşaqların fiziki, intellektual və mənəvi inkişafının təmin edilməsi sahəsində daha əhəmiyyətli addımlar atılacaq.
Məhəmmədəli QƏRİBLİ
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.