Şuşa Media Forumunun başlatdığı prosesi "Euronews" kanalı davam etdirdi...
Elşən Həsənov: “Azərbaycanın başladığı və uğurla davam etdirdiyi bu proses dünyadakı təhlükəsizliyin təmini üçün də mühüm əhəmiyyət daşıyır”
Şuşada iyulun 20-də öz işinə başlayan və üç gün davam edən “Yalan məlumatların ifşası: Dezinformasiyaya qarşı mübarizə” Forumu başa çatıb.
Prezident İlham Əliyevin iştirak etdiyi Forum çərçivəsində “Təsirin qiymətləndirilməsi: Dezinformasiyanın əhatə dairəsini müəyyənləşdirmək”, “Dezinformasiyaya qarşı daha davamlı cəmiyyət qurmaq üçün siyasət və təşəbbüslər”, “Süni intellektin reallığa, mediaya və dezinformasiyaya təsiri: Media savadlılığının təşviqi” və “İqlim hərəkatı və media” mövzularında dörd panel sessiya keçirilib.
Panel sessiyalarda müxtəlif ölkələrdən olan rəsmilər, media və vətəndaş cəmiyyəti, dövlət və biznes nümayəndələri, beynəlxalq təşkilatların təmsilçiləri və media ekspertləri ətraflı fikir və təcrübə mübadiləsi aparıblar.
Qeyd edək ki, hazırda yalan məlumatların yayılması ilə bağlı bütün dünyada ciddi mübarizə aparılır. Məsələn, ən nüfuzlu xəbər kanalı olan “Euronews”un yaydığı xəbərdə deyilir ki, son bir neçə ay arzində 500 min hesabdan yayılan 4 milyona yaxın “feyk” xəbər sosial şəbəkələrdən silinib. Təbiidir ki, burada söhbət Avropa ölkələri əleyhinə olan yalan məlumatlardan gedir. Deməli, bu qənaətə gəlirik ki, Şuşada keçirilən Forum həm məzmun, həm də zaman baxımından dünyadakı reallıqlara tam uyğundur. Göründüyü kimi, Avropa ölkələri Azərbaycanın Şuşada başlatdığı prosesi sürətlə həyata keçirir.
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, ümumiyyətlə, saxta xəbərin çox geniş yayılması, xüsusilə texnologiyaların inkişafı ilə bağlıdır: “Çünki bundan illər öncə sadəcə peşəkar media etik standartlar və hüquq çərçivəsində fəaliyyət göstərirdisə, indi artıq xəbəri yalnız peşəkar yaymır. Veb texnologiyası ilə hər kəs yayıcı ola bilir. Bu, hər kəsin yayıcı olması, həm də qeyri-peşəkarların və ya məqsədli şəxslərin saxta xəbərləri tirajlaması deməkdir. İndi informasiya axını o qədər sürətlidir ki, istənilən anda saxta xəbərin axınını təmin edən insanları və yaxud platformaları anlamaq olmur. Xüsusilə də adlarına media deyirlərsə, jurnalist deyirlərsə. Vətəndaşı anlamaq olar ki, o doğru xəbər mexanizmlərindən xəbərsizdir. Amma media platforması üçün bu yolverilməz bir haldır. Saxta xəbərlərin yayılması məsələsi odur ki, artıq bir nəzarətsizlik var. Hər vətəndaş istədiyi kimi websitə yarada bilir. İstədiyi kimi Facebook səhifəsi açır. Heç bir etikanı, jurnalistika prinsiplərini gözləmədən başlayır məlumatlar yaymağa. Mənbələr çoxaldıqca, təbii ki, bunun necə yayılmasının bir kontrol çərçivəsi olmadığı üçün, bunları hər bir vətəndaş bilmədiyi üçün saxta xəbərlər yayılır. Hamı jurnalist deyil ki, xəbər necə yayılmalıdır bilsin. Saxta xəbərlər yayılır. Çünki insanlar informasiya almaq istəyir. Amma onlara necə informasiya çatdırılır, bu artıq başqa məsələdir. Yalan informasiya aldadıcı, müəyyən maraqlara xidmət üçün istifadə olunur. Feyk xəbər insanların həyatına və hətta dövlətlərin işinə təhlükə yaradır. Bu baxımdan da, Azərbaycanın başladığı və uğurla davam etdirdiyi bu proses dünyadakı təhlükəsizliyin təmini üçün də mühüm əhəmiyyət daşıyır”.
Məhəmmədəli QƏRİBLİ
