Abituriyentlərin balını artıran dələduzlar dəstəsi peyda olub...
Cavanşir Əliyev: “Vətəndaşlar bu məsələdə ayıq olmalı, dələduzlardan uzaq durmalıdırlar”
Qəbul imtahanları zamanı abituriyentləri aldatmağa çalışan dələduzların sayı da artır. Sosial şəbəkələrdə Dövlət İmtahan Mərkəzinin (DİM) həyata keçirdiyi qəbul imtahanının nəticələrini artıra biləcəklərini iddia edən şəxslər bu yolla vətəndaşları aldadırlar.
Dələduzlar hətta blok balını maksimum 150 bal artıra bildiklərini də iddia edirlər. Bununla bağlı elanlar o qədər sürətlə yayılır ki, bu işlə məşğul olanlara inanıb ödəniş edənlər də az deyil. Buna görə vətəndaşlardan 100 - 250 manat civarında pul istənilir.
“Son vaxtlar bir sıra dələduz qruplar sosial şəbəkə vasitəsilə müxtəlif adlar altında vətəndaşları, əsas da imtahan iştirakçılarını aldatmağa cəhd göstərir”
Təhsil eksperti Cavanşir Əliyev “Bakı-Xəbər”ə açıqlamasında bildirdi ki, son vaxtlar bir sıra dələduz qruplar sosial şəbəkə vasitəsilə müxtəlif adlar altında vətəndaşları, əsas da imtahan iştirakçılarını aldatmağa cəhd göstərir: “Bu dələduzlar balları artıra biləcəklərini vəd edir. Təəssüf ki, bəzi sadəlövh vətəndaşlar qurulan bu tora düşürlər və anlayanda onlar üçün gec olur. Nəzərə çatdırım ki, abituriyentin cavabladığı cavablar əsasında bal müəyyən olunur. Abituriyentin səhv yazdığı suallara necə bal hesablana bilər? Vətəndaşlar bu məsələdə ayıq olmalı, dələduzlardan uzaq durmalıdırlar. İndi elə zamandır ki, müxtəlif sahələr üzrə dələduzlar peyda olub. Bu gün sabah kimsə çıxıb desə ki, ölənləri geri gətirirəm, təəccüblənmərəm. Çünki bu tip dələduzlara inanıb, pul verənlər az deyil”.
Həmsöhbətimiz xüsusi olaraq bildirdi ki, vətəndaşlar bu tip saxta elanlara inanmamalıdır. Abituriyentin topladığı bal yalnız qurumun rəsmi saytlarında yerləşdirilir. Ballara kənar müdaxilələrin edilməsi mümkün deyil: “Bu gün sosial şəbəkədə bəzi şəxslər insanların saflığından istifadə edib, onları aldadır. Aidiyyəti qurumlar bu məsələdə aktiv olmalı, insanların etibarından istifadə edənlər cəzalandırılmalıdır. Saxta elan paylaşan səhifələr aşkar olunaraq bağlanmalıdır”.
Günel CƏLİLOVA
