Azərbaycan-ABŞ soyuqluğunun bir mühüm səbəbi deyildi - müxalifət, maliyyə...
Azər Həsrət: “Prezident məhz bu cür məsələlərə diqqət çəkməklə dünyaya, özəlliklə də ABŞ-a xatırlatmaq istəyir ki, biz də sizin kimi müstəqil bir dövlətik, bizim daxili işlərimizə qarışmayın...”
“Azərbaycan-ABŞ əlaqələri haqqında danışdıqda bizim, əlbəttə ki, Respublikaçılar hakimiyyəti ilə əlaqələrimiz nəzərəçarpacaq dərəcədə uğurlu və nəticəyönümlü olub”. Bu barədə Prezident İlham Əliyev “Yalan məlumatların ifşası: Dezinformasiyaya qarşı mübarizə” mövzusunda 2-ci Şuşa Qlobal Media Forumunda çıxışında bildirib.
“Eyni zamanda, Prezident Trampın dövründə bizim çox səmərəli əməkdaşlığımız olub. Onlar qarşılıqlı hörmət üzərində qurulmuşdur və qarşılıqlı dəstəyin yüksək qiymətləndirilməsindən ibarət idi”, - deyən Prezident Əliyev vurğulayıb ki, bizim ABŞ-la münasibətlərimiz demək olar hər zaman sabit olub. Qeyd edib ki, müəyyən enişli-yoxuşlu dövrlər olub, o da bizim günahımız deyildi. Çünki onlar bizim siyasi həyatımıza müdaxilə etməyə çalışırdılar, onlar siyasi müxalifəti maliyyələşdirmək cəhdləri ediblər.
Prezident bildirir ki, Respublikaçılarla münasibətlərimiz həmişə yaxşı olub. Eyni zamanda da ölkə başçısı deyir ki, bizdən asılı olmayan səbəblərdən ABŞ-la münasibətimiz heç də həmişə hamar olmayıb, enişli-yoxuşlu vaxtlar olub və onlar siyasi müxalifəti maliyyələşdirməyə cəhd ediblər.
“Biz sizə nə münasibət bəsləyiriksə, onun da qarşılığını gözləyirik”
Prezidentin Azərbaycan-ABŞ münasibətlərinə qısa, lakin böyük məna ifadə edən izahı ilə bağlı danışan siyasi şərhçi Azər Həsrət “Bakı-Xəbər”ə şərhində bildirdi ki, Azərbaycan-ABŞ münasibətləri əlbəttə, hər iki dövlətin qarşılıqlı maraqları əsasında qurulub. “Azərbaycan həmişə açıq şəkildə bəyan edib və əməldə də göstərib ki, Amerika Birləşmiş Ştatları ilə yaxın münasibətdə maraqlıdır. Biz həqiqətən də ABŞ-ın bizim regionumuzda, yəni həm Güney Qafqazda, həm Yaxın Şərqdə, həm Orta Asiyada, həm də onun ötəsindəki bölgələrdə fəaliyyətlərinə, özəlliklə də antiterror əməliyyatlarına öz töhfəmizi vermişik. Bu məsələlərdə yaxamızı kənara çəkməmişik, ABŞ-ın qlobal məsuliyyətinin alıtına biz də əlimizi qoymuşuq. Əlbəttə, qarşılıq da istərik. Bu da bizim haqqımızdır. Amma təəssüflər olsun, bəzən olub ki, ABŞ-ın bizə qarşı arzuolunmaz münasibəti ilə üz-üzə gəlmişik. Ona görə incimişik, kədərlənmişik, tənqid etmişik. Cənab Prezidentin səsləndirdiyi fikirlər də əslinə qalanda bu qəbildən dəyərləndirilməlidir. Yəni biz sizə nə münasibət bəsələyiriksə, onun da qarşılığını gözləyirik. O qarşılığı təqdim etmək çətin məsələdirmi? ABŞ üçün bizə o münasibəti göstərmək çətin deyil, çünki qlobal gücdür, bütün dünya onun 1 nömrəli qlobal güc olduğunu qəbul edir. Azərbaycan da bu məsələdə yaxasını kənara çəkmir. Sadəcə olaraq biz istəyirik ki, bərabər hüquqlu münasibətlər sistemində fəaliyyət göstərək, bir-birimizlə münasibətdə olaq”.
A.Həsrət hesab edir ki, yəni dövlətin böyüklünün-kiçikliyiyin, qlobal və qeyri-qlobal olmasının məsələyə heç də dəxli yoxdur. “Prezident məhz bu cür məsələlərə diqqət çəkməklə dünyaya, özəlliklə də ABŞ-a xatırlatmaq istəyir ki, biz də sizin kimi müstəqil bir dövlətik, bizim daxili işlərimizə qarışmayın, yaxşı, dinc münasibətlərimiz bizim də, sizin də xeyrinizədir.
ABŞ-ın siyasi müxalifəti, ümumiyyətlə, Azərbaycanda hakimiyyət və dövlət əleyhinə çalışan qrupları maliyyələşdirməsi, əlbəttə, göz önündə olmuş hadisədir. İllərcə onlar müxtəlif qrupları, siyasi qurumları dövlətə, hakimiyyətə qarşı açıq şəkildə maliyyələşdiriblər. Əlbəttə, bu, dövlət etikasına sığan bir şey deyil. Çünki bir dövlət başqa bir dövlətin daxili siyasətinə qarışmamalıdır. Özəlliklə də daxili siyasi qrupları bu və digər şəkildə təşviq etməli, yaxud da dəstəkləməli deyil. Amma təəssüflər olsun ki, ABŞ bunu edib, özü də açıq şəkildə göz önündə edib. Cənab Prezident məhz onu vurğulayır ki, belə şeylər yolverilməz və qəbuledilməzdir. İndi kimsə başa düşmürsə onları başa salırıq. Kimsə başa düşürsə hesabını götürsün və anlasın ki, Azərbaycan daxilində bu cür davranışlar, əlbəttə, yolverilməzdir. Heç kim Azərbaycanın daxilində belə fəaliyyətlərə dözümlü yanaşan deyil” - deyə A.Həsrət bildirdi.
İradə SARIYEVA
