Qərb yaşıl enerji ilə yeni "dünya qəsdi" hazırlayır - Əliyevin çox ciddi eyhamı...
Çingiz İsmayılov: “Ənənəvi mənbələrdən tam imtina edib, bütöv yaşıl energetikaya keçmək yaxın əlli ildə mümkünsüzdür”
Azərbaycan Prezidenti İlham Əliyev iyulun 20-də “Yalan məlumatların ifşası: Dezinformasiyaya qarşı mübarizə” mövzusunda 2-ci Şuşa Qlobal Media Forumunda yaşıl enerji ilə bağlı problemlərin ola biləcəyinə toxunub və deyib ki, bu gün qaz faktoru enerji təhlükəsizliyinin bir nömrəli amilidir:
“Mən istisna etmirəm, bəlkə də gün gələcək, bizə yaşıl enerjini də irad tutacaqlar. Çünki yaşıl enerji ilə bağlı indi üzə çıxan bir çox məqamlar var ki, insanları və qərar qəbul edənləri düşünməyə vadar edir. Yəni o məmulatların utilizasiyası necə olacaq? Batareyaların, akkumulyatorların taleyi necə olacaq? Yəni indidən artıq bunun altına da bir mina qoyurlar ki, lazım olan vaxtda kiminsə başında çatlasın”.
Ölkə başçısının bu həyəcan təbili ilə bağlı uyğun sahənin ekspertləri nə düşünür?
Ekologiya üzrə ekspert, professor Çingiz İsmayılov “Bakı-Xəbər”ə açıqlamasında bildirdi ki, biz dəyişən dünyada yaşayırıq və daim bu dəyişmələr baş verib: “Siyasi, iqtisadi, sosial və ekoloji dəyişimlər hər zaman olub. Biz anlamalıyıq ki, milyon illər öncə də yeniliklər olub. Bəzən bu proses çox intensiv gedir, bəzən nisbətən zəif gedir. Belə dünyada insan can atır ki, təbii nemətlər emal etsin, onu öz məqsədlərinə uyğun istehsal etsin. Bunun üçün istehsal prosesi yaranır. İstehsal təbii proseslərin dəyişməsinə əlavə təsiredici amildir. Bu istehsalın içində enerji istehsalı ən vacib təsiredici amillərin birinə çevrilib. Enerji istehsalı ənənəvi, alternativ mənbələrdən asılı olaraq ətrafımızdakı çevrələrə öz təsirini göstərir. Ona görə də, gələcək haqqında danışanda, müxtəlif mənbələr əsasında enerji daşıyıcılarının istehsalına diqqət yönəlməlidir. Yəni ənənəvi mənbələrdən tam imtina edib, bütöv yaşıl energetikaya keçmək yaxın əlli ildə mümkünsüzdür. Bu tədricən baş verəcək. Düşünürəm ki, bütövlükdə yaşıl enerjiyə keçilməsi də düzgün olmazdı. Təbii proseslərdə də dəyişikliklər baş verir. Ənənəvi külək enerji stansiyalarını qura bilsək də, sabah o külək azala bilər. Günəş enerjisinin, radiasiyanın həcmi dəyişə bilər. Ona görə də, təbii proseslərin gedişini qanunauyğun olaraq tam anlamırıq. Təbiətdə elə hadisələr baş verir ki, fizika və ya digər elmlər onun izahını verə bilmir. Ona görə də düşünürəm ki, yaxın əlli ildə biz kombinləşdirilmiş enerji mənbələri əsasında strategiyamızı qurmalıyıq. Həm ənənəvi, həm də alternativ enerji mənbələri buna aiddir”.
Məhəmmədəli QƏRİBLİ
