Makronla Paşinyan Ermənistan üzərindən Ukraynaya hərbi ixrac planı cızıblar...
Elşən Həsənov: “Rusiya ilə Ukrayna arasında müharibə təkcə döyüş meydanında deyil, həm də qlobal silah bazarında aparılır”
Ermənistan baş naziri Nikol Paşinyan, Avropa Şurasının rəhbərliyi və Emmanuel Makronun Londonda Avropa Siyasi Birliyinin sammiti çərçivəsində əldə etdiyi razılaşmalara əsasən, Fransa hərbi texnikasının ən böyük payı Ermənistana yalnız kağız üzərində çatdırılacaq.
Bu barədə erməni mediası məlumat yayıb.
İddia edilib ki, əslində bu silahlar Ukraynaya göndərilmək üçündür: “128 VAB zirehli transportyoru, 18 SEZAR özüyeriyən artilleriya qurğusu, 24 AMX-10RC yüngül tankı, o cümlədən tank əleyhinə sistemlər, yük maşınları və radar avadanlığı Avropa Sülh Fondu tərəfindən Ermənistan Respublikasının maraqları naminə alınacaq, lakin Fransa ərazisində formalaşdırılmış, təlim keçmiş və Ukraynada döyüşən erməni hərbi birləşmələrinə göndəriləcək”.
Belə qənaətə gəlmək olarmı ki, Makronla Paşinyan Ermənistan üzərindən Ukraynaya hərbi ixrac planı cızıblar?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, ola bilsin Fransa və ABŞ Ermənistana bu təklifləri verib: “Amma bu Ermənistan üçün çox risklidir. Bu xəbərləri təkzib edirlər, amma bu xəbərlər Qərb mətbuatında yayımlanıb. Artıq Rusiya mətbuatı da bu mövzuya yer ayırmağa başlayıb. Amma bu məsələ təkzib ilə bitməyəcək. Yəni Ermənistan ortaya ciddi faktlar qoymalıdır ki, belə bir hal baş verməyib. Rusiyada Ermənistan hakimiyyətinə inamsızlıq var. Əgər bu fakt təsdiqlənərsə onda Rusiya artıq düyməyə basacaq və Ermənistanla münasibətlər indikindən daha çox gərginləşəcək. Ola bilsin ki, Rusiya artıq Ermənistanı cəzalandırmaq barəsində düşünəcək. Rusiya ilə Ukrayna arasında müharibə təkcə döyüş meydanında deyil, həm də qlobal silah bazarında aparılır. Amma hətta bu sahədə, xüsusilə Ermənistan kimi, beynəlxalq aləmə qarşı ikiüzlülüyü açıq-aşkar görünən vicdansız oyunçular da var”.
Məhəmmədəli QƏRİBLİ
