Londonda 2 gündə 12 liderlə görüş - Paşinyanın Azərbaycanı təcrid etmək siyasətinin iflasına yeni fakt...
Azər Həsrət: “Bütün bunlar onu göstərir ki, onlar heç vaxt dövlətimizi təcrid etməyə nail ola bilməyəcəklər”
Prezident İlham Əliyev Avropa Siyasi Birliyinin 4-cü Zirvə toplantısında 12 ölkə və təşkilat lideri ilə görüşüb. Bu barədə dövlət başçısının sosial media hesablarında paylaşım edilib.
Sözügedən görüşlərin demək olar hamısı qarşı tərəfin təşəbbüsü ilə reallaşıb. Azərbaycan Prezidentinin 12 ölkə və təşkilat lideri ilə görüşməsi bir daha sübut edir ki, Ermənistanın antiterror əməliyyatı nəticəsində ermənilərin Qarabağdan öz istəyi ilə kütləvi köçməsi üstündə Azərbaycanı beynəlxalq izolyasiyaya salmağa bəslədiyi bütün ümidlər puç oldu. Bunun özü Ermənistanın gözləntilərinin puç olduğunu göstərən faktdır. Ermənistan və müttəfiqləri çox ümid edirdilər ki, 100 min erməninin köçüb getməsinə görə Azərbaycanı beynəlxalq təcridə salacaqlar, hamı üz döndərəcək, təzyiq edəcək, amma bütün bu gözləntilər fiaskoya uğradı. Xarici ölkələrin dövlət başçıları öz təşəbbüsü ilə Prezident Əliyevlə görüşdülər.
Sözügedən məsələni baki-xeber.com-a şərh edən siyasi şərhçi Azər Həsrət buna bir neçə prizmadan yanaşdı: “Hər şeydən əvvəl bir məsələni xüsusi vurğulamaq lazımdır ki, BMT Təhlükəsizlik Şurasının 5 daimi üzvündən ən azı üçü ilə Azərbaycan Prezidentinin çox yüksək səviyyədə münasibətləri var. Bunlar Rusiyadır, Çindir, Böyük Britaniyadır. Dördüncü ölkə olan Birləşmiş Ştatlarla problemlər demək olar yoxdur. Müəyyən xaric səsləri nəzərə almasaq ABŞ-la Azərbaycanın münasibətləri yüksək səviyyədədir. Beşinci dövlət olan Fransa isə sadəcə olaraq Emmanuel Makronun naşılığı üzündən Azərbaycanla qarşıdurmaya gedir. O qarşıdurmanın da nəticəsi bəllidir. Azərbaycan Fransa müstəmləkəçiliyini dünyanın hər yerində tanıdılması üçün əlindən gələni edir. Üstəlik, burada uduzan tərəf Fransadır. Yəni bunun fonunda Prezident İlham Əliyevin Böyük Britaniyaya dəvət edilməsi, orada iştirakı və çıxışı mühüm hadisədir. Eyni zamanda qarşı tərəfin istəyi ilə liderlərlə ayrı-ayrılıqda görüşməsi yenə də etimadın və istəyin olmasından xəbər verir. Bu isə o deməkdir ki, Prezident Əliyev arzuolunan liderdir. Aparıcı dünya dövlətləri Azərbaycan lideri ilə münasibətlərin ayaqda tutulmasında maraqlıdır. Nəinki bizi heç kim təcrid edə bilməyib və edə bilməyəcək, əksinə dünya dövlətləri yüksək səviyyədə Azərbaycana maraq göstərir. Ən önəmlisi isə odur ki, münasibətləri daha da yaxşılaşdırmağa çalışırlar. Avropa Siyasi Birliyinin 4-cü Zirvə toplantısına Prezidentin dəvət edilməsi də ondan xəbər verir. Yəni bu, yüksək səviyyəli bir tədbirdir və Böyük Britaniyanın ev sahibliyi ilə keçirildi. Belə bir dövlət ölkə başçısını tədbirə dəvət edir və yüksək səviyyədə qəbul edir, ona etimad göstərir, onunla danışıqlar aparır. Prezident Əliyevlə ayrı-ayrılıqda müzakirələr aparılır. Bütün bunlar ondan xəbər verir ki, Azərbaycanı və onun Prezidentini, ümumiyyətlə bizim dövlətimizi təcrid etmək istəyənlərin arzuları çoxdan gözlərində qalıb. Onlar heç vaxt dövlətimizi təcrid etməyə nail ola bilməyəcəklər. Gedişat da onu göstərir ki, Azərbaycan bundan sonra dünyaya daha da açılacaq, nəinki təcrid ediləcək”.
Vidadi ORDAHALLI
