Ermənistan “orbitdən gedir, xanım Zaxarova Qafanda ”konsulluq axtarır”...
![Image](/uploads/posts/2024-07/zaxarova-ermenis.webp)
Qulamhüseyn Əlibəyli: “Zəngəzur dəhlizu uğrunda böyük güclərin savaşı gedir”
“Ermənistan Qərblə əməkdaşlıq edərək öz təhlükəsizliyini risqə atır”. Bunu Rusiya Xarici İşlər Nazirliyinin rəsmi nümayəndəsi Mariya Zaxarova bildirib.
“Ermənistanda NATO ilə qarşılıqlı əlaqəni artırmağa üstünlük verirlər – təbii ki, bu qəribə hadisədir. Onlar Vaşinqtonda keçirilən alyans sammitində iştirak ediblər, birgə hərbi manevrlər keçiriblər. Bu təkcə təəssüf deyil, həm də Ermənistanın gələcəyi üçün narahatlıq doğurur, çünki Aİ və ABŞ bir çox ölkələrlə belə maxinasiyaları dəfələrlə edib. Bunun necə bitdiyini çox yaxşı bilirsiniz: onlardan istifadə olunur, sonra gərəksiz kimi atılırlar”, – Zaxarova bildirib.
Zaxarova Moskvanın İrəvandan Rusiya Federasiyasının Qafanda Baş Konsulluğunun açılması ilə bağlı, o cümlədən diplomatik praktikada qəbul edilmiş paritet və qarşılıqlılıq prinsipini nəzərə almaqla əlavə addımlar gözlədiyini qeyd edib.
Burada təəccüb doğuran məqam odur ki, bu böyda vurhavurda, Ermənistanın Rusiyadan addım-addım uzaqlaşması fonunda Zaxarava Qafanda konsulluq açmaq hayındadır. Sanki iki ölkə arasında bütün işlər yolundadı, bir konsulluğun açılması qalıb. Belə bir münasibətlər fonunda Rusiyanın Ermənistandan konsulluq gözləntisi nə dərəcədə məntiqlidir?
“Rusiyanın da konsulluq açmağa can atması və bu məsələdə israr etməsi məhz bununla əlaqədardır”
Sözügedən məsələyə aydınlıq gətirən sabiq millət vəkili, hüquqşünas Qulamhüseyn Əlibəyli Zaxarovanın belə mücərrəd yanaşmasına bir neçə prizmadan yanaşdı: “Zaxarovanın dedikləri bundan əvvəl Sergey Lavrovun dedikləri ilə, demək olar ki, məzmunca üst-üstə düşür. Lavrov da Ermənistanın Qərbin təhlükəsizlik çətiri altına keçmək istəməyindən, Rusiyanın buna münasibətindən bəhs edib. Eyni zamanda Qərbin təhlükəsizlik vədinin o qədər də uğurlu olmayacağı vədini verib. Zaxarova da aşağı-yuxarı bu mövqedən çıxış edir. Əslində bunun üçün müəyyən əsaslar var. Çünki ABŞ da daxil olmaqla, Qərb ölkələri hələ 1994-cü ildən Ukraynanın da təhlükəsizliyinə zəmanət verirdilər. Ancaq məlum olduğu kimi, bu təhlükəsizliyə zəmanət ciddi nəticələrə gətirib çıxarmadı. Əksinə, Ukraynanın müharibəyə cəlb olunması və ərazilərinin ilhaq olunmasına gətirib çıxartdı. Ona görə də Zaxarovanın dediklərinin birinci hissəsi məhz Ermənistana xəbərdarlıq kimi nəzərdən keçirilə bilər. Yəni ayrı-ayrı məqamlarda Qərb Ermənistanın təhlükəsizliyindən yan qaça bilər. O ki qaldı Qafanda konsulluq açmaq məsələsinə, bu, Zəngəzur dəhlizi ilə bağlı olan məsələdir. Zəngəzur dəhlizu uğrunda böyük güclərin savaşı gedir. Rusiyanın da konsulluq açmağa can atması və bu məsələdə israr etməsi məhz bununla əlaqədardır. Ancaq yayılan məlumatlara görə, Ermənistan buna mane olmağa çalışır. Rəsmi İrəvan bir il əvvəl prinsipcə buna razılıq versə də, prosesi uzadır. Əslində bu ilin əvvəlində Rusiyanın Qafanda konsulluğu açılmalı idi, amma Paşinyan hakimiyyəti məqsədli şəkildə bundan yayınır. Bu isə iki ölkə arasında diplomatik müharibənin yeni mərhələyə qədəm qoymasına gətirib çıxarıb. Rusiya narahatdır ki, İranın, Fransanın Qafanda konsulluğu olduğu halda onların niyə olmasın. Bütün bunlar Zəngəzur dəhlizi uğrunda gedən mübarizənin göstəricisidir. Belə məlum olur ki, tərəflər bir-birinə güzəştə getməyə hazır deyillər”.
Vidadi ORDAHALLI