Avropa strukturlarında rəhbər qadınların sayı artır - çoxu da Azərbaycana düşmən...
![Image](/uploads/posts/2024-07/avropa-birliyi.webp)
Yəhya Babanlı: “Avropada aydın şəkildə matriarxal dövr başlayıb”
Məlum olduğu kimi, Avropa Parlamentinə seçkilər keçiriləndən sonra Avropa İttifaqındakı strukturların sədrləri məlum olub. Hazırkı prezident, Avropa Xalq Partiyasının namizədi Roberta Metsola AP-nin sədri seçilib. Ursula fon der Lyayen Avropa Komissiyasının sədri olaraq qalır.
Portuqaliyanın keçmiş Baş naziri Antonio Kosta Avropa Şurasının rəhbəri postunda Şarl Mişeli əvəz edəcək. Estoniyanın xarici işlər naziri Kaya Kallas isə əvvəllər Cosep Borrelin rəhbərlik etdiyi Avropa İttifaqının Xarici Siyasət İdarəsinə rəhbərlik edəcək.
Bu arada məlum olub ki, Avropa İttifaqının Cənubi Qafqaz və Gürcüstan üzrə yeni xüsusi nümayəndəsi Maqdalena Qronon olacaq. Bu barədə Avropa İttifaqının (Aİ) Siyasi və Təhlükəsizlik Komitəsi qərar verib. Beləliklə, Maqdalena Qrono 2017-ci ildən bu vəzifəni tutan Toivo Klaarı əvəz edəcək.
Burada diqqət çəkən məqam odur ki, Avroittifaqın bundan sonrakı siyasətinin müəyyən olunmasında qadın siyasətçilərin rolu artacaq. Roberta Metsola, Ursula fon der Lyayen, Kaya Kallas və Maqdalena Qronon. Yeri gəlmişkən, bunlardan bəziləri Azərbaycana qərəzli münasibət bəsləyir. Məsələn, Avroparlamentin sədri R. Metsola.
“Nə qədər qərəzli olsalarda, regional güc və reallıqları nəzərə almalı, sülh və təhlükəsizlik təşəbbüslərinə qoşulmalıdırlar”
Sözügedən məsələni “Bakı-Xəbər”ə şərh tarix elmləri üzrə fəlsəfə doktoru, politoloq Yəhya Babanlı bütün bunlara bir neçə aspektdən yanaşdı: “Əksər hallarda bu tip strukturların (təşkilatların) strateji vizyonunda çoxyönlü baxış olur. Konkret Avropa Parlamentini götürsək, onun strategiyasını 3 hissəyə bölə bilərik. Birincisi, regional və ya daimi üzv ölkələrə xüsusi münasibət. İkincisi, strukturun müəyyənləşdirdiyi kurs və ya siyasət. Üçüncüsü, təşkilatın rəhbərlərinin mənsub olduğu dövlət və xalqın digər ölkələrlə əlaqələri. Büruzə verməsələr də, bu xüsus ikitərəfli və çoxtərəfli əməkdaşlıqda, habelə müvafiq səlahiyyət sahibi olduqda açıq və ya qapalı formada özünü göstərir. Avropada aydın şəkildə matriarxal dövr başlayıb. Bunun nə dərəcədə müsbət və ya mənfi olmağı müzakirə mövzusu deyil. Yeni komandanın Azərbaycana münasibətinə gəldikdə, inanmıram ki, birmənalı şəkildə obyektivizm olsun. Çünki Avropanın bəzi strukturları son dövrlər bütün məsələlərə ikili standartla yanaşır. Hətta irqi, dini və s. ayrıseçkilikdən çəkinmirlər. Nə qədər qərəzli olsalarda, regional güc və reallıqları nəzərə almalı, sülh və təhlükəsizlik təşəbbüslərinə qoşulmalıdırlar. Yaxın gələcəkdə mövqelər dəyişə, Avropa ilə Cənubi Qafqaz arasında yeni mərhələ başlaya bilər. Fransada Yay Olimpiya Oyunları, Azərbaycanda COP29 və s. beynəlxalq tədbirlərin fonunda yeni düzən əmələ gələcək. Sədr xanım R.Metsolaya gəldikdə isə, şəxsləri deyil, prosesləri müzakirə etsək daha məqsədəuyğun olar zənnimcə”.
Vidadi ORDAHALLI