Avroparlamentdə Azərbaycana qarşı qərarlar qəbul etdirənlərin biri bu qadın idi - getdi...
![Image](/uploads/posts/2024-07/kaljurand.webp)
Akif Nağı: “Avroparlamentdə Kaljurand kimi keçmiş məmurlarının özləri də bir alət olublar, vəzifədə olduqları müddətdə onlardan hər cür istifadə edilib”
Avropa Parlamentində kök salan antiazərbaycan qüvvələr bütün fürsətlərdə ölkəmizə qarşı qərəzli mövqe tuturlar. Bunlardan biri də beş il Avropa Parlamentində Cənubi Qafqazla əlaqələr üzrə nümayəndə heyətinin rəhbəri olmuş deputat Marina Kaljuranddır. Erməni mediası yazır ki, Kaljurandın bu vəzifədə səlahiyyətlərinə xitam verilməsi ilə bağlı rəsmi məlumat yayılıb. Beləliklə, bir ermənipərəst də vəzifəsindən getdi.
Adıçəkilən deputat bildirib ki, son beş ildə Cənubi Qafqaz kimi mühüm regionla əlaqələr üzrə Avropa Parlamentinin nümayəndə heyətinə rəhbərlik etmək onun üçün şərəfdir.
O, açıqlamasında Aİ-Ermənistan münasibətlərinin yüksək olduğunu da qeyd edib.
Bu xanım vəzifəsindən gedərkən son mesajında da Azərbaycana qərəzli yanaşmasından əl çəkməyib. Guya Azərbaycan erməniləri Qarabağdan “güc” tətbiq edərək “deportasiya” edib, o da buna təəssüflənir.
Kaljurand mesajında “buna baxmayaraq, davamlı sülh və Ermənistan-Azərbaycan münasibətlərinin normallaşması ehtimalı var və biz buna çalışmalıyıq” deyib.
O, həmçinin, yenə də qondarma “siyasi məhbus” iddiasında bulunub, Azərbaycanı əsassız tənqid edib. Gürcüstana da heç nornal yanaşmayıb, bu ölkənin hökumətinin son siyasi addımlarını dolayısı ilə tənqid edib. Bircə onun gözündə Cənubi Qafqazda Ermənistan “demokratik və sülhpərvər” ölkədir, başqa ölkələri gözü görməyib.
Guya bunun sözügedən nümayəndə heyətinə rəhbərlik etdiyi dövrdə Cənubi Qafqaz məsələsinə obyektiv yanaşılıb. Əlbəttə, tamamilə yanlışdır, o, birmənalı olaraq Ermənistanı və erməniləri müdafiə edib.
Avroparlamentdə Azərbaycan əleyhinə qətnamələri qəbul etdirənlərdən biri Kaljurand idi. İndi isə vəzifədən getdi. Belələri indiyə qədər bizim əleyhimizə nə qədər iş görüb.
Bu cür antiazərbaycan qüvvələrin Avroparlamentdə vəzifələrindən getməsi necə dəyərləndirilə bilər?
“O qadının bizə qarşı qəbul etdirdiyi qətnamələrin heç birinin bizim üçün bir önəmi yoxdur, kağız parçası kimi bir tərəfdə qalıblar”
Azad Vətən Partiyasının sədri Akif Nağı “Bakı-Xəbər”ə şərhində bildirdi ki, Avroparlamentin bu deputatı son açıqlamasında özü özünü ifşa edir, əsl mahiyyətini ortaya qoyur. “Bu adam Cənubi Qafqazla bağlı məsələlərə beş il rəhbərlik etsə də, hər zaman kölgədə qalıb. Estoniyanın xarici işlər naziri olub və sonra Avroparlamnetdə bu vəzifəyə gətirilmişdi. Onun adı o qədər də hallanmayıb. Yəqin özünü göstərmək istəmirmiş. Amma vəzifədə olduğu müddətdə mənfi və mənfur əməllərlə məşğul olub. Çox təəssüflər olsun ki, beş il bu vəzifədə işlədiyini fəxrlə dilə gətirir. Yenə də qərəzli mövqedən çıxış edib, yenə də ermənipərəstliyini göstərib. Ermənistanda guya demokratiyanın inkişafından danışır, sülh danışıqları ilə bağlı guya Ermənistanın sülh təşəbbüsü etdiyini göstərir, Azərbaycanın yox, Ermənistanın sülh danışıqlarını dəstəklədiyini bildirir. Azərbaycana qarşı əsassız iddialarla çıxış edir. Yəni Avropa Parlamentinin mövqeyini bilirik. Orda çalışmış, Cənubi Qafqaz istiqamətinə rəhbərlik etmiş bir adam ən azından özünün qərəzli mövqeyini, tərəf olduğunu gizlətməyə, tərəfsiz olduğunu göstərməyə çalışmalı idi. Bu açıq-aşkar öz mövqeyini bildirir. Bunların məqsədi odur ki, bütün dövlətlər bunların istədiyi xətlə getsin. Demokratiya, insan haqları kimi alətlərdən dövlətləri özlərinə tabe etmək, özlərinin qoyduğu qaydalara, prinsiplərə əməl etdirmək vasitəsi olaraq istifadə edirlər. Bu, Qərbin, ABŞ-ın yeritdiyi bir siyasətdir. Avroparlament kimi qurumlardan da öz məqsədləri üçün istifadə edirlər. Hansısa bir dövlət onların istəklərinə uyğun hərəkət edirsə, onların maraqlarını ödəyirsə, iqtisadi – siyasi maraqlarına cavab verirsə, o ölkəni tərifləyirlər, müdafiə edirlər”-deyə A.Nağı bildirdi.
A.Nağının fikrincə, hansı ölkə onların tabeliyinə keçmək istəmir, özünün milli maralarından, dövlət maraqlarından çıxış edir, o dövlətlərə qarşı qərəzli mövqe tuturlar, qarayaxma həyata keçirirlər. “Azərbaycana qarşı niyə belə qərəzli mövqe tutduqlarının səbəbi də aydındır. Həmin o Kaljurand da digər özü kimiləri kimi iddia edir ki, guya Azərbaycan gücə əl atıb və Qarabağdan erməni əhalisinin çıxmasına səbəb olub. Bu ağ yalandı. Bu, gözümüzün qarşısında baş verən bir hadisənin saxtalaşdırılmasıdır. Demokratiya və insan haqları mücərrəd bir ternindir və onunla bağlı sağa da, sola da fikirlər söyləmək olar. Bununla bağlı hərənin öz fikri ola bilər. Amma fakt ortadadır ki, Azərbaycan erməni əhalinin orda qalması üçün konkret mövqe ortaya qoydu, onlara şərait yaradacağını bildirdi. Məntiqli şəkildə göstərdi ki, onlar Azərbaycan vətəndaşları kimi Azərbaycan qanunlarına tabe olub yaşayamaq, Azərbaycanın ərazi bütövlüyü çərçivəsində fəaliyyət göstərib qalmaq istəyirlərsə qalıb yaşasınlar. Yox, bunu qəbul etmirlərsə, getməlidirlər. Qarabağda yaşayan ermənilərin çoxu cani idi, Azərbaycana qarşı cinayətlərdə iştirak etdikləri üçün yığışıb getdilər. Avroparlamentin Cənubi Qafqaz məsələləri üzrə nümayəndə heyətinin keçmiş rəhbəri bu faktı görmək istəmir. Bu reallığı görmək istəməyib Azərbaycana qarşı əsassız iddialar irəli sürürlər. Məqsədləri Azərbaycanı qaralamaqdır. Çünki Azərbaycan onların sözləri ilə otrurub-durmur, özünün müstəqil siyasətini yeridir. Məsələnin mahiyyəti bundan ibarətdir. Azərbaycan bunların hamısını bilir, bu cür məmurlar özləri özlərini vaxtaşırı ifşa edir. Azərbaycan da bu cür özünüifşalardan istifadə etməli, belələri ilə bağlı məlumatlar yaymalıdır, göstərməlidir. Ən əsası isə odur ki, Azərbaycan öz siyasətini davam etdirməlidir. Azərbaycan rəhbərliyi hər şeyi gözəl görür və onların məqsədlərinin nədən ibarət olduğunu bilir. Dövlət və milli maraqlarımıza uyğun addımlar atılmalıdır. Bunu Avroparlamentin hansısa bir təmsilçisi bəyənəcək, bəyənməyəcək, təqdir edəcək-etməyəcək, bu onların öz işləridir. Bunların bizə heç bir dəxli yoxdur. Bu qadın “arzu” edir ki, Azərbaycan Avropa Parlamentinin iradlarına, təkliflərinə, tövsiyyələrinə əməl etsin. Avroparlamentdə Kaljurand kimi keçmiş məmurlarının (elə indikilər də ) özləri də bir alət olublar, vəzifədə olduqları müddətdə onlardan da hər cür istifadə edilib. Bu baxımdan gedib öz problemləri ilə məşğul olsun, Estoniyanın problemlərini həll etsin. Avropanın o qədər problemləri var ki, onların həllinə çalşsın. Avropada başdan-ayağa insan haqları pozulur. Estoniyanın özündə rusdilli əhaliyə qarşı ən əcaib formada tədbirlər həyata keçirilir. Halbuki, onlar da insandır, onların da öz dillərində danışmağa haqları var. Bizim rusları və yaxud Rusiyanı müdafiə etmək fikrimiz yoxdur. Amma əgər insan haqlarından danışılırsa, Estoniyanın özündə insan hüquqlarının pozulmasından da, rusdilli əhaliyə göstərilən təzyiqlərdən də danışsınlar. Özlərinin problemlərini həll etsinlər. Bizim üçün onların dedikləri fikrin, hazırladıqları sənədlərin, qəbul etdikləri qərarların heç bir əhəmiyyəti yoxdur. O qadının bizə qarşı qəbul etdirdiyi qətnamələrin heç birinin bizim üçün bir önəmi yoxdur, kağız parçası kimi bir tərəfdə qalıblar. Yəni o da, başqaları da bunu birmənalı şəkildə bilməlidirlər. Azərbaycan çox düzgün şəkildə öz yolunu müəyyənləşdirib. Azərbaycanda kimlərsə onlara züy tutursa və sevinirsə ki, hansısa beynəlxalq hegemon qurum Azərbaycana qarşı fikir səsləndirdi, qərar qəbul etdi, bu adamlar Azərbaycanın düşmənləridir”-deyə A.Nağı bildirdi.
İradə SARIYEVA