Fransanın müstəmləkələrdə gizli nüvə sınaqları Bakı konfransında ifşa edilir...
![Image](/uploads/posts/2024-07/musteqillik_herekatlarinin_qurultayi_12.webp)
Məhərrəm Zülfüqarlı: “Bu, Parisin müstəmləkələrə olan münasibətinin dəyişməməsinin göstəricisidir”
Bakıda Qvadelupa Qurtuluş Xalq Birliyi və Bakı Təşəbbüs Qrupu tərəfindən dəstəklənən ilk Fransa Müstəmləkəçiliyinə dair Konqres öz işinə başlayıb. İki günlük tədbirdə Korsika, Melaneziya, Polineziya, Karib hövzəsi ölkələri və Antil adalarından 15-dən çox siyasi partiya və müstəqillik hərəkatının liderləri iştirak edir.
2023-cü ilin iyulunda Bakıda Qoşulmama Hərəkatının nazirlər görüşündə təsis edilmiş Bakı Təşəbbüs Qrupu müstəmləkəçiliyə qarşı mübarizə elan edib. Qrup BMT-nin Nyu-York, Cenevrə və Vyanadakı qərargah-mənzillərində əhəmiyyətli tədbirlər də daxil olmaqla, 15-ə yaxın beynəlxalq konfrans təşkil edib.
Dünən konfransda Yeni Kaledoniya parlamentinin deputatı Mariya Saliqa Fransanın Polineziyada apardığı nüvə sınaqları nəticəsində çəkdikləri çoxillik əziyyətləri xatırladıb.
Görünən odur ki, Fransa müstəmləkələrdə, o cümlədən Yeni Kaledoniyada qorxulu nüvə sınaqlarını hələ də davam etdirir. Məsələn, XX əsrdə 30 il ərzində Fransız Polineziyasında Fransa tərəfindən 200-ə yaxın, 6 il ərzində isə Əlcəzairdə 17 nüvə sınağı həyata keçirilib. Həmin nüvə sınaqlarının ağır fəsadları Polineziya və Əlcəzair xalqı tərəfindən bu gün də yaşanmaqdadır. Polineziyada keçirilən 193 nüvə sınağından 147-si yeraltı olub. Hazırda da Fransa müstəmləkələrdə gizli nüvə sınaqları keçirir.
“Dünya bilməlidir ki, Fransanın müstəmləkələrdə həyata keçirdiyi nüvə sınaqları hansı fəlakətlər törədib”
Sözügedən məsələ ilə bağlı fikirlərini “Bakı-Xəbər”lə bölüşən tarix elmələri doktoru, professor Məhərrəm Zülfüqarlı hesab edir ki, bütün bunlar Fransanın müstəmləkələrə olan münasibətinin dəyişməməsinin göstəricisidir: “İndiki dövrdə Fransanın müstəmləkə siyasətinin ifşa edilməsi, bununla əlaqədar toplantıların keçirilməsi mühüm əhəmiyyət kəsb edir. Çünki Fransa son illər özünü demokratik ölkə hesab edərək millətlərin öz müqəddəratını təyin etmək hüququ pərdəsi altında Qafqazda erməniləri müdafiə etməklə məşğuldur. O cümlədən, Azərbaycandan könüllü şəkildə köçən erməniləri müdafiə etməklə məşğuldur. Ancaq ötən əsrin 80-ci illərinin sonu, 90-cı illərin əvvəllərində azərbaycanlıların başına gətirilən faciələrdən bir kəlmə də danışmır. Bu onu göstərir ki, Fransa riyakar siyasət yeridir. Ona görə də dünyanın bir daha Fransa müstəmləkələrində baş verən hadisələrlə tanış olmasına ehtiyac var. Dünya bilməlidir ki, Fransanın müstəmləkələrdə həyata keçirdiyi nüvə sınaqları hansı fəlakətlər törədib. Bu, böyük ekoloji faciədir və əfsuslar olsun ki, bu gün də davam edir. Çünki nüvə sınaqları torpağı, suyu zəhərləməklə yanaşı, həm də insanları müxtəlif xəstəliklərə düçar edən bir faciədir. Ona görə də həmin ölkənin vətəndaşları haqlı olaraq bu cür antihumanist siyasət yeridən rejimdən, dövlətdən canlarını qutarıb müstəqil olmaq istəyirlər. Çünki bu gün də Fransa bir sıra dənizaşırı adalarda gizli nüvə sınaqları keçirir. Ona görə də Azərbaycan belə tədbirlərə ev sahibliyi edərək, bu adaları Fransanın təsirindən azad etməyə çalışır. Bununla həm də Fransanın ikiüzlü siyasətini ifşa edirlər. Fransanın Ermənistana və ermənilərə verdiyi dəstəyin heç də erməni sevgisindən deyil, öz şəxsi imperialist maraqlarından irəli gəldiyini bir daha biz dünyaya bəyan edirik. Bir gün Fransa Ermənistandan da poliqon kimi istifadə edə bilər ki, bu da bütün Cənubi Qafqazda fəsadlar yarada bilər”.
Vidadi ORDAHALLI