İlham Əliyev Avropa Siyasi Birliyində - Praqadan Londonadək...
Rəşad Bayramov: “Onlar Ermənistana göstərə biləcəkləri təzyiqlə sülh sazişinin tez bir zamanda imzalanmasına nail ola bilərlər”
İyulun 18-də Böyük Britaniyada Avropa Siyasi Birliyinin 4-cü sammiti öz işinə başlayıb. Sammitə Avropa İttifaqının (Aİ) üzvləri, Azərbaycan, Türkiyə, Gürcüstan, Ermənistan daxil olmaqla 50-yə yaxın ölkənin liderləri dəvət edilib.
Böyük Britaniya və Şimali İrlandiya Birləşmiş Krallığının Baş naziri Kir Starmer Vudstok şəhərindəki Blenheim sarayında 50-yə yaxın ölkənin liderlərini qəbul edib. Avropa Siyasi Birliyinin Sammitində müzakirə olunacaq əsas məsələlər Ukraynada baş verən hadisələr və qeyri-qanuni miqrasiyadır. Sammit çərçivəsində tematik müzakirələr də nəzərdə tutulub.
Prezident İlham Əliyev də sammitdə iştirak edir. Dövlət başçısı Avropa Siyasi Birliyinin Çexiya və Moldovada keçirilən sammitində iştirak edib. Azərbaycan Fransanın təxribatçı mövqeyinə görə İspaniyada keçirilən sammitdə iştirak etməkdən imtina edib.
Qeyd edək ki, Çexiya və Moldovada keçirilən sammit çərçivəsində Azərbaycan və Ermənistan liderləri arasında görüşlər keçirilib. Britaniyadakı sammitdə Azərbaycan və Ermənistan liderlərinin İngiltərədə görüşə biləcəyi də istisna edilmir.
Bu formatda toplantılarda iştirakın və ümumiyyətlə Avropa qurumlarının Azərbaycanla Ermənistan arasında olan münasibətlərin normallaşmasına nə kimi faydası ola bilər?
Politoloq Rəşad Bayramov “Bakı-Xəbər”ə açıqlamasında bildirdi ki, məlum olduğu kimi, ötən il oktyabrın 5-də Avropa Siyasi Birliyinin Qranadada üçüncü Zirvə toplantısı təşkil edildi: “Tədbir Azərbaycan üçün də önəmli ola bilərdi. Çünki orada Prezident İlham Əliyevlə Ermənistan baş naziri Nikol Paşinyan arasında Avropa İttifaqı Şurasının prezidenti Şarl Mişelin vasitəçiliyi ilə görüşün təşkili planlaşdırılırdı. Görüşdə, eyni zamanda, Fransa Prezidenti Emmanuel Makronun və Almaniya Kansleri Olaf Şoltsun iştirakı nəzərdə tutulmuşdu.
Lakin Azərbaycan Prezidenti gögrüşə qatılmaqdan imtina etdi. Ona görə ki, ölkəmizin, belə demək mümkünsə, “beşli masa”nı Türkiyə ilə “altılı masa”ya çevrilmək təklifi keçmədi. Belədə beşli masa dördlü masaya çevrildi. Azərbaycan hətta işğal dönəmində belə heç bir konstruktiv təmasdan yayınmayıb. Ancaq
Fransa rəsmilərinin ermənipərəst bəyanatları, XİN başçısının Ermənistana səfəri və hərbi əməkdaşlıq, silah-sursat veriləcəyi haqda açıqlamalar, Aİ Şurasının Prezidenti Şarl Mişelin həmin vaxt Azərbaycanı ittiham edən açıqlaması fonunda Azərbaycan bu formatda danışıqlarda iştiraka lüzum görmədi. Çünki belə format Azərbaycana lazım deyil. Bakı regiondan uzaq ölkələrlə regionun problemlərini müzakirə etməyə lüzum görmür. Bakı hesab edir ki, bu məsələlər regional çərçivədə müzakirə və həll edilə bilər. Bununla belə, əvvəlki Aİ-Azərbaycan-Ermənistan üçlü formatı və ya tərəflər arasında təkbətək görüş gündəmə gələrsə, Azərbaycan görüşdə iştirak edə bilər.
Fransanın iştirak etdiyi heç bir format Azərbaycan üçün məqbul deyil. Azərbaycan regional əməkdaşlıq, sabitlik və inkişaf üçün vacib təşəbbüslər göstərir. Azərbaycan Ermənistanla sülh sazişi imzalanmasının, sərhədlərin müəyyənləşdirilməsinin, regionda kommunikasiya xətlərinin, həmçinin Zəngəzur dəhlizinin açılmasının tərəfdarıdır. Bütün bunların fonunda veriləcək istənilən töhfə bizim üçün məqbuldur. Hazırda Avropa təsisatlarının Ermənistana təsiri böyükdür. Onlar Ermənistana göstərə biləcəkləri təzyiqlə sülh sazişinin tez bir zamanda imzalanmasına nail ola bilərlər”.
Məhəmmədəli QƏRİBLİ
