Qatı antiazərbaycançı Metsola yenidən Avroparlamentin sədri oldu - siyasət dəyişməyəcək...
Əli Orucov: “Avroparlamentin Azərbaycana münasibətində dəyişiklik gözlənilmir”
Avropa İttifaqı ölkələrində keçirilən seçkilərdən sonra Avropa Parlamenti Baş Assambleyası Strasburqda toplanıb. Belə ki, 720 millət vəkilinin qatıldığı iclasda növbəti 5 il üçün Avropa Parlamentinə sədr seçilib.
Hazırkı prezident, Avropa Xalq Partiyasının namizədi Roberta Metsola ilə Sol Qrupdan olan ispaniyalı deputat İrene Montero arasında seçim edən deputatların mütləq əksəriyyəti Metsolaya səs verib. Qapalı səsvermədə Metsola 562, Montero isə 61 səs toplayıb.
Onu da qeyd edək ki, bu ilin iyununda Brüsseldə keçirilən sammitdə Avropa İttifaqı ölkələrinin liderləri blok liderlərinin növbəti beş il üçün namizədliyini təsdiqləyib. Ursula fon der Lyayen Avropa Komissiyasının sədri olaraq qalır. Portuqaliyanın keçmiş Baş naziri Antonio Kosta Avropa Şurasının rəhbəri postunda Şarl Mişeli əvəz edəcək. Kaya Kallas isə əvvəllər Cosep Borrelin rəhbərlik etdiyi Avropa İttifaqının Xarici Siyasət İdarəsinə rəhbərlik edəcək.
Onu da qeyd edək ki, R.Metsola bundan əvvəl də Avroparlamentin sədri olanda dəfələrlə Azərbaycana qarşı qətnamələrin qəbulunda fəal rol oynayıb. Yəni bu o deməkdir ki, Avropa strukturlarının Azərbaycana münasibəti dəyişməyəcək. Ən azından, Avroparlamentin münasibəti dəyişməyəcək. Çünki AP-yə yeni seçkilərdən sonra da R.Metsolanın vəzifəsi dəyişmədi. Deməli bu, məqsədyönlü şəkidə idarə olunur. O baxımdan, Avropa Parlamentinin Azərbaycana münasibətində dəyişiklik gözlənilirmi?
“Ancaq bundan fərqli olaraq, Avropa Komissiyası ilə bağlı problem olmayacaq”
Sözügedən məsələni “Bakı-Xəbər”ə şərh edən edən AMİP funksioneri Əli Orucov hesab edir ki, konkret olaraq Avroparlamentin Azərbaycana münasibətində dəyişiklik gözlənilmir: “Ən azından ona görə ki, R.Metsola yenidən AP-yə sədrlik edəcək. Digər tərəfdən, yeni deputatların içərisində Azərbaycana qarşı qərəzli mövqeyi ilə seçilən şəxslər elə də az deyil. Halbuki, onların bəziləri bilavasitə erməni lobbisi ilə bu və ya digər dərəcədə bağlıdır. Ancaq AP-nin qərarları tövsiyə xarakterli olduğu üçün bunun hansısa ciddi təhlükəsi yoxdur. Başqa bir tərəfdən, Azərbaycanla Ermənistan arasında ən azından çərçivə sülh sazişi imzalansa, hesab edirəm ki, Avroparlament timsalında ölkəmizə yönəlik təzyiqlər, ard-arda qərəzli qətnamələrin sayı azala bilər. Bu, hardasa yeni vəziyyət yarada bilər. Həmçinin Ukraynada müharibə uzansa və enerji daşıyıcıları, nəqliyyat daşımaları ilə bağlı Azərbaycana olan ehtiyac bu kimi məsələlərə öz təsirini göstərəcək. Avropa Komissiyasına gəldikdə isə, hesab edirəm, ciddi problem olmayacaq. Çünki Avropa Komissiyasının sədri Ursula fon der Lyayenin Azərbaycana qarşı hansısa açıq, qərəzli fəaliyyəti olmayıb. Üstəlik, Ursulanın iştirakı ilə 2022-ci ilin iyulunda Azərbaycan ilə Avropa İttifaqı arasında enerji sahəsində strateji tərəfdaşlığa dair Anlaşma Memorandumu imzalanıb. Azərbaycan Mərkəzi Asiya ilə Avropa arasında vacib tranzit ölkə rolunda çıxış edir. 2027-ci ilə qədər Azərbaycan Avropaya qaz ixracını 20 milyard kubmetrə çatdıracaq. Bundan başqa, Avropaya elektrik enerjisi ixracı gündəlikdədir. Bütün bunlar onu deməyə əsas verir ki, Avropa Komissiyası ilə bağlı problem olmayacaq. Bu qurum da Aİ-nin əsas orqanı hesab olunur. Başqa bir tərəfdən, qurumun xarici siyasət idarəsinə Estoniyanın xarici işlər naziri Kaya Kallas rəhbərlik edəcək. K.Kallas Cosep Borreldən yaxşı olacaq. Ona görə ki, Borrel erməni lobbisinin nökəri idi”.
Vidadi ORDAHALLI
