Paşinyan konstitusiya dəyişikliyini uzadır - 2025-in yanvarı demişdilər, indi…
![Image](/uploads/posts/2024-07/1721225852_pas-kons.webp)
Sahil Kərimli: “Azərbaycan Ermənistanın bu mövqeyi ilə heç vaxt barışmayacaq”
Ermənistanın baş naziri Nikol Paşinyan ölkə Konstitusiyasında dəyişikliklərə başlamaqla bağlı Azərbaycan Prezidenti İlham Əliyevdən vaxt istəyib.
Bu barədə “Hraparak” qəzeti Ermənistanın hakim “Vətəndaş müqaviləsi” partiyasındakı mənbəyə istinadən xəbər yayıb.
Qəzet yazır ki, Paşinyan Konstitusiyada dəyişikliklərə 2026-cı ildə keçiriləcək parlament seçkilərindən sonra başlamaq niyyətindədir. Bundan əvvəl deyirdilər ki, Ermənistan konstitusiya dəyişikliyini 2025-ci ilin yanvarında yekunlaşdıracaq. İndi də deyirlər ki, proses 2026-cı ildə yekunlaşacaq. Azərbaycan bu qədər gözləyərmi? Bu, sülh prosesini suni uzatma cəhdi sayıla bilərmi?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, ermənilər bunu məqsədli şəkildə edirlər: “Ermənistanın öz konstitusiyasında dəyişiklik etmək məsələsini uzatması, Azərbaycandan bu istiqamətdə vaxt istəməsi ilə bağlı yayılan məlumatlar ilk növbədə bu ölkənin, xüsusilə də baş nazir Nikol Paşinyan komandasının sülh müqaviləsi imzalanması istiqamətində həyata keçirdiyi qeyri-konstruktiv siyasətin bariz nümunəsidir. Ermənistan yenə də öz məkrli planlarından, sülhə təhdid olmasından əl çəkmək istəmir. Hər nə qədər Nikol Paşinyan beynəlxalq ictimaiyyəti aldatmaq, çaşdırmaq istəsə də, faktiki olaraq biz Azərbaycanın haqlı tələblərinin yerinə yetirilməməsinin şahidi oluruq. Çünki Azərbaycan Ermənistandan sülh istiqamətində qeyri-adi nəsə tələb etmir. Azərbaycanın irəli sürdüyü bütün tələblər haqlı və ədalətlidir. Ermənistan yeganə ölkədir ki, öz konstitusiyasında qonşularına qarşı ərazi iddia edir. Mən hesab edirəm ki, bu gün Ermənistanın konstitusiyasında dəyişiklik etməkdən imtina etməsi, bu məsələni bilərəkdən uzatması birbaşa sülhə maneə olan addımlardandır. Təbii ki, bu gün sülh ən əsas Ermənistanın özü üçün lazımdır. Çünki Azərbaycan dövləti qarşıya qoyduğu bütün hədəflərə addım-addım nail olub. Biz ərazi bütövlüyümüzü və süverenliyimizi tam təmin etmişik. Ermənistan hansısa şərti sərhədlərimizdə hərbi təxribatlar törətməyə çalışarsa, ölkəmiz, Azərbaycanın qüdrətli ordusu hər an sarsıdıcı zərbələr endirmək qüdrətində və qabiliyyətindədir. Ona görə də, bu gün sülh prosesinin uzadılması, ləngidilməsi, Azərbaycanın tələblərinin yerinə yetirilməməsi Ermənistan üçün gələcəkdə çox böyük faciələrə gətirib çıxara bilər. Əlbəttə, burada bir çox amillər var. Ermənistan bu məsələlərdə heç də müstəqil siyasət yürütmür. Sülh prosesinin uzadılması, Ermənistanın Azərbaycanın haqlı tələblərini yerinə yetirməməsi Cənubi Qafqazda marağı olan Avropa dairələrinin planlarının tərkib hissəsidir. Onlar Ermənistan üzərindən belə oyunlar oynayaraq, Ermənistanı sülh imzalamaqdan uzaqlaşdıraraq Azərbaycana müəyyən mənada təsir və təzyiqlər göstərmək istəyirlər. Mən hesab edirəm ki, Azərbaycan Ermənistanın bu mövqeyi ilə heç vaxt barışmayacaq. Ermənistan hər nə olursa-olsun, öz konistitusiyasında dəyişiklik etməlidir. Yalnız bundan sonra biz bu ölkə ilə sülh müqaviləsi imzalaya bilərik”.
Məhəmmədəli QƏRİBLİ