Uşaqları dini mərasimlərə aparmaq cəhalət yoludur...
"Bakı Xəbər" qəzetinin baş redaktoru, politoloq Aydın Quliyev öz facebook səhifəsində dini cəhalət, xüsusilə uşaqların belə xoşagəlməz hallara alət edilməsinin mənfi tərəfləri barədə maraqlı paylaşım edib. A.Quliyev yazır: "Bu şəhərdə bir müəllim var, zülmətlərə nur salmaq istəyir, bir keşiş var, nuru söndürmək istəyir". Böyük fransız yazıçısı Vüktor Hüqonun sözləridir. Hüqo demir ki, müəllimlərin hamısı işıq saçır və saçmaq gücündədir. Onu da demir ki, keşişlərin hamısı "işıq gələn bütün deşiklərə barmağını tıxır...
Hüqonu gözəl anlayırıq. Müəllimlərin də, keşişlərin də, mollaların da sırasında hər cürələri var.Millətinə işıqlı yol göstərən də var, zülmətə dartmaq istəyən də var. Məşhur "Dəli Kür" filmindən çox ibrətamiz səhnələrin birini yada salım. Bir kəndin uşaqlarını Qori seminariyasına aparmaq istəyən müəllimin başına cəhalət daşıyıcısı olan mollalar dəstəsi gördünüz nə oyun açdılar. Tək bir faytonçu kasıb kişi uşağını çox inamla və səxavətlə bu cəhalət burulğanı içində ən nurlu yola salmağa cəsarət etdi. "Qoy mənim oğlum gedib oxusun" dedi . O faytonçu həmin dövrün zülmətlərinə işıq salan "müəllim nümunəsi" idi. Molla Sadıqlar isə rəhmətlik ( xristiana da rəhmət düşür) Hüqonun dediyi həmin "nura barmaq tıxan irticaçı keşişlərin nümunəsi" idi. Nəhayət müqəddəs Aşuramızdan bir gün əvvəl söz açdığımız məşhur kinodakı rus Əhmədin də sözlərini yada salım. "Övladlarınızı niyə oxutmaq istəmirsiniz? Axı niyə qəssab oğlu bütün ömrü boyu əlində balta ət doğramalıdır?!" . Çox ibrətamiz nümunələridir.
Nə qədər ki ,valideynlər kiçik yaşlı uşaqlarının əlindən tutub ya zorla, ya da inandıraraq mahiyyətini anlamadığı dini mərasimlərə, özünə zəncir vuranlara, xəsarət yetirənlərə tamaşa etməyə aparır, "qəssabın oğlu ömrü boyu əlində balta ət doğramaqdan" , mollanın oğlu mollalıqdan başqa bir yol tapa bilməyəcək. Onların hər ikisinin öz rolu, öz əhəmiyyətli funksiyası var. Ancaq niyə də uşaqların öz qabiliyyətlərini göstərmək və qabiliyyətlərinə uyğun peşəni seçmək imkanları olmasın? Əgər bu imkanları olsa , inanın ki, qəssabın ,mollanın oğlunun diplomat, akademikin oğlunun istədiyi halda futbolçu olmaq kimi çox asan seçimləri olacaq .
Biz müsəlman xalqlarının özümüzəxas xüsusiyyətlərimizdən biri dini mərasimlərimizə bağlılıqdır. Novruzu da, Ramazanı da, Aşuranı da ən əziz günlərimiz kimi tam dəyərində yaşamağı bacarmalıyıq, yaşayırıq da. Kim mane ola bilər ki... Ancaq hər kəsin bu ayinlərin icrası yollarını başa düşərək könüllü getməsinin böyük mənası,əhəmiyyəti var.Kimsə məni inandıra bilməz ki. , 15- 16 yaşına qədərki övladını yanına salıb özü ilə Aşura mərasimlərinə gətirən valideynlər övladının bu günün mahiyyətini tam anladığına əmindir.Övladını məktəbdən, təhsildən daha çox dini mərasimlərə dartan valideynlər gələcəyə nur daşıyanlar yox, millətin gələcəyini qaraldan nursuzlardır.
Birmənalı deyirəm.Uşaqları təhsilin dalınca məcburi yönəltmək olar və lazımdır. Ancaq onları yaşlarına uyğun olmayan dini mırasimlərə zorla aparmaq qətiyyən olmaz. Əksər uşaqların bu yerlərə könüllü və həvəslə getmək istədiklərinə inanmıram . Mahiyyətini anlamadığı bir şeyə necə həvəsli ola bilərlər? Əgər kimlərdəsə həvəs varsa, bu da valideynlərin onlarda yaratdığı yanlış və anlaşılmaz inamın təzahürüdür.
Uşaqların dini mərasimlərdə iştirakını özləri hər şeyi başa düşənə qədər idarə etmək lazımdır. Özü hər şeyi anlayandan sonra molla, keşiş, ya həkim, hakim, diplomat olmaq onun öz seçimi olacaq. Uşaqları dini mərasimlərə zorla aparmaq cəhalət yoludur."
Mətləb
